ലണ്ടൻ: പാകിസ്ഥാൻ ചാംപ്യൻസിനെ തകർത്തെറിഞ്ഞ് ലെജൻഡ്സ് ലോക ചാംപ്യൻഷിപ്പ് കിരീടം ദക്ഷിണാഫ്രിക്ക ചാംപ്യൻസ് സ്വന്തമാക്കി. പഹൽ​ഗാം ഭീകരാക്രമണത്തിന്റെ പശ്ചാത്തലത്തിൽ ഇന്ത്യ സെമി ഫൈനൽ കളിക്കാൻ ബഹിഷ്കരിച്ചതോടെ കളിക്കാതെ തന്നെ ഫൈനലിലെത്തിയ പാകിസ്ഥാനെ പക്ഷേ ദക്ഷിണാഫ്രിക്ക നിലം തൊടീക്കാതെ പറത്തി.

ആദ്യം ബാറ്റ് ചെയ്ത പാകിസ്ഥാൻ നിശ്ചിത ഓവറിൽ 5 വിക്കറ്റ് നഷ്ടത്തിൽ 195 റൺസടിച്ചു. ദക്ഷിണാഫ്രിക്ക മാരക ബാറ്റിങുമായി കളം വാണ് വെറും 16.5 ഓവറിൽ ഒരു വിക്കറ്റ് മാത്രം നഷ്ടത്തിൽ 197 റൺസ് അടിച്ചെടുത്തു വിജയം പിടിച്ചു. ദക്ഷിണാഫ്രിക്കയ്ക്ക് 9 വിക്കറ്റ് ജയം, കിരീടം.

ഇതിഹാസ താരം എബി ഡിവില്ല്യേഴ്സ് 60 പന്തിൽ 120 റൺസുമായി പുറത്താകാതെ നിന്നു വിജയം അതിവേ​ഗത്തിലാക്കി. താരം 7 സിക്സും 12 ഫോറും പറത്തി. ഒപ്പം ജീൻ പോൾ ഡുമിനിയും കൊണ്ടുപിടിച്ചതോടെ പാകിസ്ഥാൻ ​ഹതാശരായി നിന്നു. ഡുമിനി 28 പന്തിൽ 4 ഫോറും 2 സിക്സും സഹിതം 50 റൺസെടുത്ത് പുറത്താകാതെ നിന്നു.

ടൂർണമെന്റിൽ ഡിവില്ല്യേഴ്സ് നേടുന്ന മൂന്നാം സെഞ്ച്വറി കൂടിയാണിത്. ഓപ്പണർ ഹാഷിം അംലയുടെ വിക്കറ്റ് മാത്രമാണ് ദ​ക്ഷിണാഫ്രിക്കയ്ക്ക് നഷ്ടമായത്. താരം 14 പന്തിൽ 18 റൺസെടുത്തു മടങ്ങി. ജയം തൊടുമ്പോൾ 19 പന്തുകൾ ശേഷിക്കുന്നുണ്ടായിരുന്നു. തീർത്തും ഏകപക്ഷീയമായ ജയമാണ് ദക്ഷിണാഫ്രിക്ക ചാംപ്യൻമാർ സ്വന്തമാക്കിയത്.

ഓപ്പണിങിൽ അംല- ഡിവില്ല്യേഴ്സ് സഖ്യം 36 പന്തിൽ 72 റൺസ് ചേർത്താണ് പിരിഞ്ഞത്. പിരിയാത്ത രണ്ടാം വിക്കറ്റിൽ പിന്നീട് ഡിവില്ല്യേഴ്സ്- ഡുമിനി സഖ്യം 65 പന്തിൽ 125 റൺസ് അടിച്ച് പാകിസ്ഥാനെ തുരത്തിയാണ് കിരീടം പിടിച്ചത്.

ആദ്യം ബാറ്റ് ചെയ്ത പാകിസ്ഥാനായി ഓപ്പണർ ഷർജീൽ ഖാൻ 44 പന്തിൽ 9 ഫോറും 4 സിക്സും സഹിതം 76 റൺസടിച്ച് മികച്ച തുടക്കം നൽകി. 19 പന്തിൽ 36 അടിച്ച ഉമർ അമീൻ, 15 പന്തിൽ 28 റൺസെടുത്ത ആസിഫ് അലി, ഷൊയ്ബ് മാലിക് (20), ക്യാപ്റ്റൻ മുഹമ്മദ് ​ഹഫീസ് (17) എന്നിവരും ഭേദപ്പെട്ട പ്രകടനം നടത്തി.