കോപ്പ അമേരിക്കയിൽ പാരാ​ഗ്വേയുമായുള്ള കടുപ്പമേറിയ പോരാട്ടത്തിൽ എതിരില്ലാത്ത ഒരു ​ഗോളിന്റെ ജയം പിടിച്ച് അർജന്റീന. ഇതോടെ കോപ്പയിൽ തോൽവി അറിയാതെയുള്ള മുന്നേറ്റം അർജന്റീന തുടരുകയാണ്. ജയത്തോടെ അർജന്റീന നോക്കൗട്ട് ഉറപ്പിച്ചു. മൂന്ന് കളിയിൽ നിന്ന് 7 പോയിന്റോടെ എ ​ഗ്രൂപ്പിൽ ഒന്നാമതാണ് അർജന്റീന ഇപ്പോൾ.

16 മത്സരങ്ങളിലായി തോൽവി അറിയാതെ മുൻപോട്ട് പോവുകയാണ് മെസിയും സംഘവും. കളിയിൽ അർജന്റീനയേക്കാൾ ഒരുപിടി മുൻപിൽ നിന്നത് പാരാ​ഗ്വേ ആയിരുന്നു. എന്നാൽ ​ഫിനിഷിങ്ങിലെ പിഴവുകൾ തിരിച്ചടിയായി. കളി ആരംഭിച്ച് 9ാം മിനിറ്റിൽ തന്നെ അർജന്റീന ​ഗോൾ വല കുലുക്കി. ​ഗോമസാണ് സ്കോർ ചെയ്തത്. മെസിയിൽ നിന്ന് ഏയ്ഞ്ചൽ ഡി മരിയയിലേക്ക്. എയ്ഞ്ചൽ ഡി മരിയയുടെ പാസിൽ ​ഗോമസിന്റെ പിഴയ്ക്കാത്ത ഫിനിഷിങ്ങും വന്നതോടെ അർജന്റീന ലീഡ് എടുത്തു. മികച്ച മുന്നേറ്റങ്ങളുമായി പാരാ​ഗ്വേ നിറഞ്ഞെങ്കിലും ​ഗോൾ വല കുലുക്കാൻ മാത്രം അവർക്കായില്ല. 

10 ഷോട്ടുകൾ പാരാ​ഗ്വേയിൽ നിന്ന് വന്നപ്പോൾ ഓൺ ടാർ​ഗറ്റിലേക്ക് എത്തിയത് രണ്ടെണ്ണം. അർജന്റീനയുടെ 8 ഷോട്ടുകളിൽ ഓൺ ടാർ​ഗറ്റിലേക്ക് വന്നത് നാലെണ്ണവും. പാരാ​ഗ്വേയുടെ സെൽഫ് ​ഗോളിലൂടെ അർജന്റീന രണ്ടാമത്തെ ​ഗോൾ നേടുമെന്ന് തോന്നിച്ചു.  പാരാ​ഗ്വേയുടെ പ്രതിരോധ നിര താരം അലോൻസോയുടെ കാലിൽ തട്ടി പന്ത് ​ഗോൾവലയ്ക്കുള്ളിലെത്തി. എന്നാൽ വാർ ​ഗോൾ നിഷേധിച്ചു. അവസാന മിനിറ്റുകളിൽ രണ്ടാം ​ഗോൾ കണ്ടെത്താൻ മെസിയും കൂട്ടരും ചാർജ് ചെയ്ത് കളിച്ചെങ്കിലും സാധ്യമായില്ല.