ധാക്ക: ടി20 ലോകകപ്പിൽ നിന്ന് ടീമിനെ ഒഴിവാക്കിയ നടപടി അംഗീകരിക്കുന്നതായി ബംഗ്ലാദേശ് ക്രിക്കറ്റ് ബോർഡ്. ബംഗ്ലാദേശിന് പകരം സ്കോട്ട്ലൻഡിനെ ഉൾപ്പെടുത്താൻ ഐ സി സി എടുത്ത തീരുമാനത്തെ അംഗീകരിക്കുന്നു. ഇന്ത്യയിൽ മത്സരം കളിക്കുന്നത് സുരക്ഷാ പ്രശ്നങ്ങൾ ഉണ്ടാക്കുമെന്നത് കൊണ്ടാണ് വേദി മാറ്റണം എന്ന ആവശ്യം ഉന്നയിച്ചതെന്നും ബി സി ബി മീഡിയ കമ്മിറ്റി ചെയർമാൻ അമ്ജാദ് ഹുസൈൻ പറഞ്ഞു.

“ടൂർണമെന്റിൽ പങ്കെടുക്കാൻ ഞങ്ങൾ പരമാവധി ശ്രമിച്ചു. ഐ സി സിയുടെ തീരുമാനത്തെ പൂർണമായും ബഹുമാനിക്കുന്നു. മത്സരവേദി മാറ്റാനാകില്ലെന്നതാണ് ബോർഡിന്റെ ഭൂരിപക്ഷ തീരുമാനം. അതും ഞങ്ങൾ അംഗീകരിക്കുന്നു ” അമ്ജാദ് ഹുസൈൻ പറഞ്ഞു. ആദ്യത്തെ അപേക്ഷ തള്ളിയതിന് ശേഷവും മറ്റു വഴികളും ക്രിക്കറ്റ് ബോർഡ് നോക്കിയിരുന്നു.

എന്നാൽ ഞങ്ങളുടെ ആവശ്യം ഐ സി സി അംഗീകരിക്കാൻ തയ്യാറാകാത്ത സാഹചര്യത്തിൽ ഇനി ചെയ്യാൻ ഒന്നുമില്ലെന്നും അദ്ദേഹം വ്യക്തമാക്കി.

ഞങ്ങൾക്ക് മത്സരിക്കാൻ ഇന്ത്യയിലേക്ക് പോകാനാകില്ല, മത്സരങ്ങൾ ശ്രീലങ്കയിലേക്ക് മാറ്റാനും സാധിക്കില്ല. അതിനാൽ ബോർഡിന്റെ തീരുമാനം ഞങ്ങൾ അംഗീകരിച്ചു. ഇക്കാര്യത്തിൽ നിയമപരമായോ മധ്യസ്ഥ നടപടികളിലേക്കോ പോകില്ലെന്നും അമ്ജാദ് ഹുസൈൻ വ്യക്തമാക്കി