ധാക്ക: ഇന്ത്യക്കെതിരെ തുടരെ രണ്ട് ടെസ്റ്റുകള് തോറ്റ് ബംഗ്ലാദേശ് പര്യടനത്തിനെത്തിയ വെസ്റ്റ് ഇന്ഡീസിനു ആദ്യ ഏകദിന പോരാട്ടത്തിലും തോല്വി തന്നെ. 3 മത്സരങ്ങളടങ്ങിയ ഏകദിന, ടി20 പരമ്പരകള് കളിക്കാനെത്തിയ വിന്ഡീസിനെ ആദ്യ പോരാട്ടത്തില് ബംഗ്ലാദേശ് 74 റണ്സിനു വീഴ്ത്തി.
ആദ്യം ബാറ്റ് ചെയ്ത ബംഗ്ലാദേശിനെ 49.4 ഓവറില് 207 റണ്സില് ഒതുക്കാന് വിന്ഡീസ് ബൗളിങിനായി. എന്നാല് വിജയം തേടിയിറങ്ങിയ വിന്ഡീസ് മികച്ച തുടക്കമിട്ട ശേഷം തകര്ന്നു തരിപ്പണമായി. അവരുടെ പോരാട്ടം 39 ഓവറില് വെറും 133 റണ്സില് അവസാനിച്ചു.
44 റണ്സെടുത്ത ഓപ്പണര് ബ്രണ്ടന് കിങാണ് ടോപ് സ്കോറര്. സഹ ഓപ്പണര് അലിക്ക് ആതന്സ് 27 റണ്സും അടിച്ചു. പിന്നീട് വിന്ഡീസ് ബാറ്റര്മാരുടെ പവലിയനിലേക്കുള്ള ഘോഷയാത്രയായിരുന്നു. ക്യാപ്റ്റന് ഷായ് ഹോപ് (15), ജസ്റ്റിന് ഗ്രീവ്സ് (12) എന്നിവരാണ് രണ്ടക്കം കടന്ന മറ്റുള്ളവര്.
ബംഗ്ലാദേശിനായി റിഷാദ് ഹുസൈന് 9 ഓവറില് 35 റണ്സ് വഴങ്ങി 6 വിക്കറ്റുകള് വീഴ്ത്തി വിന്ഡീസിനെ തകര്ക്കുന്നതില് മുന്നില് നിന്നു. മുസ്തഫിസുര് റഹ്മാന് 2 വിക്കറ്റെടുത്തു. തന്വിര് ഇസ്ലാം, മെഹ്ദി ഹസന് മിറാസ് എന്നിവര് ഓരോ വിക്കറ്റെടുത്തു.
തുടക്കത്തില് തകര്ന്ന ബംഗ്ലാദേശ് തൗഹിത് ഹൃദോയ് നേടിയ അര്ധ സെഞ്ച്വറിയിലാണ് അടിത്തറയിട്ടത്. താരം 51 റണ്സെടുത്തു. മഹിദുല് ഇസ്ലാം 36 റണ്സെടുത്ത് പിന്തുണച്ചു. നജ്മല് ഹുസൈന് ഷാന്റോയും തിളങ്ങി. താരം 32 റണ്സെടുത്തു. 13 പന്തില് 26 റണ്സടിച്ച് റിഷാദ് ഹുസൈന് 200ന്റെ വക്കിലെത്തിച്ചു. ബാറ്റിങിലും ബൗളിങിലും തിളങ്ങി റിഷാദ് കളിയിലെ താരവുമായി.
വെസ്റ്റ് ഇന്ഡീസിനായി ജയ്ഡന് സീല്സ് 3 വിക്കറ്റെടുത്തു. റോസ്റ്റന് ചെയ്സ്, ജസ്റ്റിന് ഗ്രീവ്സ് എന്നിവര് രണ്ട് വീതം വിക്കറ്റുകള് സ്വന്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates