റാഞ്ചി: ഇന്ത്യന്‍ മുന്‍ നായകന്‍ എംഎസ് ധോനി റാഞ്ചിയില്‍ നിന്ന് മുംബൈയിലേക്ക് താമസം മാറുന്നുവെന്ന റിപ്പോര്‍ട്ടുകള്‍ നിഷേധിച്ച് കുടുംബം. റാഞ്ചിയിലെ ഫാം ഹൗസ് വിട്ട് ധോനി എങ്ങോട്ടും പോകുന്നില്ലെന്നാണ് ധോനിയുടെ ഭാര്യ സാക്ഷി ധോനിയെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്യുന്നത്.

ദുബായി, മുംബൈ, കൊല്‍ക്കത്ത, ജാര്‍ഖണ്ഡ് എന്നിവിടങ്ങളിലെ തന്റെ ക്രിക്കറ്റ് അക്കാദമിയുടെ പ്രവര്‍ത്തനങ്ങള്‍ കൂടുതല്‍ സജീവമാക്കാന്‍ ധോനി മുംബൈയിലേക്ക് താമസം മാറുന്നതായാണ് റിപ്പോര്‍ട്ടുകള്‍ വന്നത്. ഫാം ഹൗസിലെ ജീവിതം ത്രില്ലടിപ്പിക്കുന്നതാണെന്ന് അടുത്തിടെ സാക്ഷി ധോനി സമൂഹമാധ്യമങ്ങളിലൂടെ പറഞ്ഞിരുന്നു.

റാഞ്ചിയില്‍ 43 ഏക്കറിലായാണ് ധോനിയുടെ ഫാം ഹൗസ്. ഇതില്‍ 10 ഏക്കറില്‍ പച്ചക്കറി കൃഷി നടത്തുകയാണ് ഇന്ത്യയെ ലോക കിരീടത്തിലേക്ക് എത്തിച്ച നായകന്‍. നാല് വര്‍ഷം മുന്‍പാണ് ഇവിടേക്ക് ധോനിയും കുടുംബവും താമസം മാറ്റിയത്. ജാര്‍ഖണ്ഡ് സര്‍ക്കാര്‍ നല്‍കിയ ഹര്‍മു ബൈപാസിന് സമീപം നിര്‍മിച്ച വീട്ടിലായിരുന്നു അതിന് മുന്‍പ് താമസം.

റാഞ്ചിയിലെ ഫാം ഹൗസില്‍ കൃഷി ചെയ്ത ഉത്പന്നങ്ങള്‍ ദുബായിലേക്ക് കയറ്റി അയച്ച് ധോനി വാര്‍ത്തകളില്‍ നിറഞ്ഞിരുന്നു. മധ്യപ്രദേശിലെ ജാബുവയില്‍ നിന്ന് 2000 കരിങ്കോഴികളേയും ധോനി തന്റെ ഫാമിലേക്ക് എത്തിച്ചിരുന്നു. ഈ കടക്‌നാഥ് കോഴിയുടെ ഇറച്ചിക്ക് ഭൗമസൂചിക പദവിയുണ്ട്.