മാഞ്ചസ്റ്റര്‍: ഇന്ത്യ- ഇംഗ്ലണ്ട് നാലാം ക്രിക്കറ്റ് ടെസ്റ്റ് ആവേശകരമായ അന്ത്യത്തിലേക്ക്. അഞ്ചാം ദിനമായ ഇന്ന് ഇന്ത്യയ്ക്ക് മികച്ച ലീഡ് പിടിക്കേണ്ടതുണ്ട്. അതിനു സാധിക്കുന്നില്ലെന്നു ഉറപ്പായാല്‍ മത്സരം സമനിലയില്‍ അവസാനിപ്പിക്കാനുള്ള കണക്കുകൂട്ടലും ഇന്ത്യക്കുണ്ടാകും. നാലാം ദിനം കളി നിര്‍ത്തുമ്പോള്‍ രണ്ടാം ഇന്നിങ്‌സ് ബാറ്റിങ് തുടരുന്ന ഇന്ത്യ 2 വിക്കറ്റ് നഷ്ടത്തില്‍ 174 റണ്‍സെന്ന നിലയില്‍.
ഒന്നാം ഇന്നിങ്‌സില്‍ ഇന്ത്യ 358 റണ്‍സില്‍ പുറത്തായി. ഇംഗ്ലണ്ട് 669 റണ്‍സെടുത്ത് ഇന്ത്യക്ക് വെല്ലുവിളി തീര്‍ത്തു. 311 റണ്‍സിന്റെ വന്‍ ലീഡ് വഴങ്ങിയാണ് ഇന്ത്യ രണ്ടാം ഇന്നിങ്‌സ് തുടങ്ങിയത്. ഇംഗ്ലണ്ടിന്റെ സ്‌കോറിനൊപ്പമെത്താന്‍ ഇന്ത്യക്ക് 137 റണ്‍സ് കൂടി വേണം.
87 റണ്‍സുമായി കെഎല്‍ രാഹുലും 78 റണ്‍സുമായി ക്യാപ്റ്റന്‍ ശുഭ്മാന്‍ ഗില്ലുമാണ് ക്രീസില്‍. പിരിയാത്ത മൂന്നാം വിക്കറ്റില്‍ ഇരുവരും ചേര്‍ന്നു 174 റണ്‍സ് ബോര്‍ഡില്‍ ചേര്‍ത്തു.
രണ്ടാം ഇന്നിങ്‌സ് തുടങ്ങിയ ഇന്ത്യക്ക് ആദ്യ ഓവറില്‍ തന്നെ സ്‌കോര്‍ ബോര്‍ഡ് തുറക്കും മുന്‍പ് രണ്ട് വിക്കറ്റുകള്‍ നഷ്ടമായത് വന്‍ തിരിച്ചടിയായി. ഓപ്പണര്‍ യശസ്വി ജയ്‌സ്വാള്‍, മൂന്നാമനായി ക്രീസിലെത്തിയ സായ് സുദര്‍ശന്‍ എന്നിവര്‍ പൂജ്യത്തില്‍ മടങ്ങി. രണ്ട് വിക്കറ്റുകളും ക്രിസ് വോക്‌സാണ് വീഴ്ത്തിയത്. സായ് ഗോള്‍ഡന്‍ ഡക്കില്‍ പുറത്തായി. പിന്നീടാണ് രാഹുല്‍- ഗില്‍ രക്ഷാപ്രവര്‍ത്തനം. ഈ സഖ്യം ഇന്ന് എത്രത്തോളം നില്‍ക്കുമെന്നതിനെ ആശ്രയിച്ചാണ് ഇന്ത്യയുടെ ഗതി.
ജോ റൂട്ടിന്റെയും(150) ക്യാപ്റ്റന്‍ ബെന്‍ സ്റ്റോക്സിന്റെയും (141) സെഞ്ച്വറികളും ഓപ്പണര്‍മാരായ സാക്ക് ക്രൗളി (84), ബെന്‍ ഡക്കറ്റ് (94), ഒലി പോപ്പ് (71) എന്നിവരുടെ അര്‍ധ സെഞ്ച്വറികളുമാണ് ഇംഗ്ലണ്ടിന് വലിയ ടോട്ടല്‍ സമ്മാനിച്ചത്. സ്റ്റോക്സ് നേരത്തേ അഞ്ച് വിക്കറ്റുകളും നേടി മികച്ച ഓള്‍റൗണ്ട് പ്രകടനം കാഴ്ചവെച്ചിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates