കാലിഫോർണിയ: സ്പെയിനിനെ ​ഗോളടിക്കാൻ സമ്മതിക്കാതെ കാബോ വെർദെ സമനിലയിൽ കുരുക്കിയപ്പോൾ സമൂഹ മാധ്യമങ്ങളിൽ കാബോ വെർദെ 'വെറുതെ അല്ല' എന്ന വാക്യങ്ങൾ നിറഞ്ഞിരുന്നു. സ്പെയിനിനു പിന്നാലെ അക്കാര്യം ഉറു​ഗ്വെയ്ക്കു മനസിലായി. ഉറു​ഗ്വെയേയും അവർ സമനിലയിൽ പിടിച്ചു. ഇത്തവണ 2 എണ്ണം വാങ്ങിയെങ്കിൽ 2 എണ്ണം അവർ മടക്കി നൽകി. സ്പെയിനിനെതിരേ ആദ്യ ലോകകപ്പ് പോയന്റാണെങ്കിൽ ഇക്കുറി ആദ്യ ലോകകപ്പ് ഗോൾ. പക്ഷേ ഒന്നിൽ നിർത്തിയില്ല എന്നു മാത്രം. ഇരു ടീമുകളും രണ്ട് ഗോൾവീതമടിച്ച് സമനിലയിൽ പിരിഞ്ഞു.

മത്സരത്തിൽ മികച്ച മുന്നേറ്റങ്ങളുമായി ഉറു​ഗ്വെയെ വിറപ്പിച്ചാണ് കാബോ വെർദെ തുടങ്ങിയത്. കൗണ്ടർ അറ്റാക്കുകളിൽ ഉറു​ഗ്വെ പ്രതിരോധം പതറുന്ന കാഴ്ച. 21ാം മിനിറ്റിൽ ഉറു​ഗ്വെയെ ഞെട്ടിച്ച് കാബോ വെർദെയാണ് ലീഡെടുത്തത്. ഫ്രീകിക്ക് മികച്ച ഷോട്ടിലൂടെ ലക്ഷ്യത്തിലെത്തിച്ച് കെവിൻ പീന ടീമിന് ചരിത്ര ഗോൾ സമ്മാനിച്ചു. കാബോ വെർദെയുടെ ആദ്യ ലോകകപ്പ് ഗോൾ.

​ഗോൾ ആദ്യം വഴങ്ങിയെങ്കിലും ഉറു​ഗ്വെ തിരിച്ചുവന്ന് ലീഡെടുത്തു. മാക്‌സി അരാഹോ 44ാാം മിനിറ്റിൽ സമനില ഗോൾ നേടി. ഇടതു വിങ്ങിൽ നിന്നുവന്ന ക്രോസ് ഹെഡറിലൂടെ പോസ്റ്റിൽ തട്ടിത്തെറിച്ചു. അത് അരാഹോ അനായാസം വലയിലാക്കി. പിന്നാലെ ആദ്യ പകുതിയുടെ ഇഞ്ച്വറി സമയത്ത് അഗസ്റ്റിൻ കനോബിയോയും ഗോളടിച്ചതോടെ ഉറു​ഗ്വെ തന്നെ ആദ്യ പകുതിയിൽ മുന്നിൽ നിന്നു.

രണ്ടാം പകുതിയിലും വിട്ടുകൊടുക്കാതെ പോരാടുന്ന കാബെ വെർദെ സംഘത്തെയാണ് മൈതാനത്ത് കണ്ടത്. കാബോ വെർദെയുടെ മുന്നേറ്റനിര പലകുറി ഉറു​ഗ്വെ ഗോൾമുഖം വിറപ്പിച്ചു. ഉറു​ഗ്വെ പ്രതിരോധം ശരിക്കും വിയർത്തു. കാബോ വെർദെ പകരക്കാരെ കളത്തിലിറക്കി ഉണർന്നു കളിച്ചു. പിന്നാലെ അവർ സമനില ​ഗോളും അടിച്ചു.

ഉറു​ഗ്വെ പ്രതിരോധത്തിന്റെ പിഴവിൽ നിന്നാണ് ഗോൾ പിറന്നത്. ഉറു​ഗ്വെ പ്രതിരോധ താരത്തിന്റെ പാസ് ലക്ഷ്യം തെറ്റി. ഓടി വന്ന ഗോൾ കീപ്പർക്ക് പന്ത് കിട്ടും മുൻപ് തന്നെ കാബോ വെർദെയുടെ ഹെലിയോ വരേല പോസ്റ്റിലേക്ക് ഷോട്ടുതിർത്തു. ആളില്ലാ വലയിലേക്ക് പന്ത് പതിച്ചതോടെ ​കാബോ വെർദെ മറ്റൊരു വമ്പൻമാരെ ജയിക്കാൻ സമ്മതിക്കാതെ രണ്ടാം തവണയും കളം വിട്ടു.