റിയോ ഡി ജനീറോ: മുന്‍ ബ്രസീല്‍ മധ്യനിര താരം ഓസ്‌ക്കാറിനെ ഹൃദയ സംബന്ധമായ ആരോഗ്യ പ്രശ്‌നങ്ങളെ തുടര്‍ന്നു ആശുപത്രിയില്‍ പ്രവേശിപ്പിച്ചു. പ്രീ സീസണ്‍ പരിശീലനത്തിനിടെ താരം കുഴഞ്ഞു വീണതിനു പിന്നാലെയാണ് ആശുപത്രിയിലെത്തിച്ചത്. നിലവില്‍ താരം ഡോക്ടര്‍മാരുടെ നിരീക്ഷണത്തിലാണ്.

മുന്‍ ചെല്‍സി താരമായ 34കാരന്‍ നെയ്മറിനൊപ്പം 2014ലെ ലോകകപ്പില്‍ ബ്രസീലിന്റെ നിര്‍ണായക താരമായിരുന്നു. നിലവില്‍ ബ്രസീല്‍ ക്ലബ് സാവോ പോളോയ്ക്കായി കളിക്കുകയാണ് ഓസ്‌ക്കാര്‍.

പരിശീലനത്തിന്റെ ഭാഗമായി നടന്ന ഫിറ്റ്‌നസ് ടെസ്റ്റിനിടെ താരം ബൈക്കോടിച്ചിരുന്നു. അതിനിടെയാണ് നെഞ്ചുവേദന അനുഭവപ്പെട്ട് താരം വീണത്. നിലവില്‍ ഓസ്‌ക്കാറിന്റെ ആരോഗ്യനില തൃപ്തികരമാണെന്നു സാവോ പോളോ ക്ലബ് വാര്‍ത്താക്കുറിപ്പിലൂടെ അറിയിച്ചു.