ബെര്ലിന്: അന്താരാഷ്ട്ര ഫുട്ബോളില് നിന്നു വിരമിക്കല് പ്രഖ്യാപിച്ച് ജര്മന് ഇതിഹാസ താരം തോമസ് മുള്ളര്. ഇത്തവണ സ്വന്തം നാട്ടില് നടന്ന യൂറോ കപ്പില് കിരീടം നേടി കരിയര് അവസാനിപ്പിക്കാനുള്ള ആഗ്രഹം ക്വാര്ട്ടറില് സ്പെയിനിനു മുന്നില് അവസാനിച്ചിരുന്നു. പിന്നാലെയാണ് വിരമിക്കല് പ്രഖ്യാപിച്ചത്.
ജര്മനിക്കായി 131 മത്സരങ്ങാണ് മുള്ളര് കളിച്ചത്. 14 വര്ഷം നീണ്ട അന്താരാഷ്ട്ര കരിയറില് 45 ഗോളുകളും താരം നേടി. മുള്ളറും പടിയിറങ്ങിയതോടെ 2014 ലോകകപ്പ് നേടിയ താരങ്ങളില് ഇനി ടീമില് ശേഷിക്കുന്നത് ഗോള് കീപ്പര് മാനുവല് നൂയര് മാത്രം. വിരമിച്ച ശേഷം യൂറോയ്ക്ക് തിരിച്ചെത്തിയ ഇതിഹാസ മധ്യനിര താരം ടോണി ക്രൂസും ഈയടുത്താണ് ടീം വിട്ടത്. പിന്നാലെയാണ് മുള്ളറുടെ പ്രഖ്യാപനം.
'ഇത്രയും കാലം എന്നെ പിന്തുണച്ച ആരാധകര്ക്കു നന്ദി. 131 മത്സരങ്ങള് ജര്മനിക്കായി കളിച്ചു. 45 ഗോളുകള് നേടി. ഞാന് ഗുഡ് ബൈ പറയുന്നു. രാജ്യത്തെ പ്രതിനിധീകരിച്ചതില് അഭിമാനിക്കുന്നു. 2026 ലോകകപ്പില് ആരാധകനായി ജര്മനിക്കു വേണ്ടി കൈകളുയര്ത്തി ഞാനുണ്ടാകും. കളിക്കാരനെന്ന നിലയില് പക്ഷേ ഇനി മൈതാനത്ത് എന്നെ കാണില്ല'- വിരമിക്കല് വീഡിയോ സന്ദേശത്തില് താരം വ്യക്തമാക്കി.
വാര്ത്തകള് അപ്പപ്പോള് ലഭിക്കാന് സമകാലിക മലയാളം ആപ് ഡൗണ്ലോഡ് ചെയ്യുക ഏറ്റവും പുതിയ വാര്ത്തകള്
അറ്റാക്കിങ് മിഡ്ഫീല്ഡറായും ഫോര്വേഡായും കളിക്കുന്ന മുള്ളര് പൂര്ണമായും ടീം മാനായിരുന്നു. സഹ താരങ്ങള്ക്ക് ഗോളവസരങ്ങള് ഒരുക്കി നല്കിയും നിര്ണായക ഘട്ടത്തില് ഗോളുകള് നേടിയും താരം ജര്മന് ഫുട്ബോളില് നിറഞ്ഞു നിന്നു. കളിയെ അതിന്റെ സ്പിരിറ്റില് ഉള്ക്കൊണ്ടു തന്ത്രപരമായ നീക്കങ്ങള് നടത്താനും ഗോളുകള്ക്ക് വഴിയൊരുക്കാനും ഗോളടിക്കാനുമൊക്കെ സവിശേഷമായ സാമര്ഥ്യം പുലര്ത്തിയ താരമാണ് മുള്ളര്.
2014ല് ലോകകപ്പ് നേടിയ ജര്മന് ടീമില് അംഗമായിരുന്നു മുള്ളര്. 2010ലാണ് താരം ജര്മന് ദേശീയ ടീമിലെത്തുന്നത്. 2010ലെ ലോകകപ്പില് ഏറ്റവും കൂടുതല് ഗോളടിച്ചതിനു ഗോള്ഡന് ബൂട്ട് പുരസ്കാരവും അതേ അധ്യായത്തില് തന്നെ മികച്ച യുവ താരത്തിനുള്ള അവാര്ഡും മുള്ളര് സ്വന്തമാക്കി.
ക്ലബ് ഫുട്ബോളില് ബയേണ് മ്യൂണിക്കിന്റെ താരമാണ് മുള്ളര്. ബാവേറിയന്സിനായി ഇനിയും മുള്ളറെ കളത്തില് കാണാം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates