ദുബായ്: സെപ്റ്റംബര്‍ മാസത്തിലെ മികച്ച താരത്തിനുള്ള പുരസ്‌കാരത്തിനുള്ള മൂന്ന് താരങ്ങളുടെ ചുരുക്ക പട്ടിക പുറത്തിറക്കി ഐസിസി. ഓസ്‌ട്രേലിയന്‍ താരം ട്രാവിസ് ഹെഡ്, ശ്രീലങ്കന്‍ താരങ്ങളായ പ്രബാത് ജയസൂര്യ, കാമിന്ദു മെന്‍ഡിസ് എന്നിവരാണ് പട്ടികയിലിടം കണ്ടത്. ഇവരില്‍ ഒരാള്‍ക്കായിരിക്കും പുരസ്‌കാരം.

സെപ്റ്റംബറില്‍ ഓസ്‌ട്രേലിയക്കായി വൈറ്റ് ബോള്‍ ക്രിക്കറ്റില്‍ മിന്നും ഫോമിലാണ് ട്രാവിസ് ഹെഡ് കളിച്ചത്. പ്രബാത് ജയസൂര്യ സ്പിന്‍ ബൗളിങില്‍ തിളങ്ങിയപ്പോള്‍ മെന്‍ഡിസ് ബാറ്റിങിലാണ് മിന്നിയത്.

ഇംഗ്ലണ്ട്, സ്‌കോട്‌ലന്‍ഡ് ടീമുകള്‍ക്കെതിരെ 5 ടി20 മത്സരങ്ങളില്‍ നിന്നു ഹെഡ് 182 റണ്‍സ് അടിച്ചു. സ്‌ട്രൈക്ക് റേറ്റ് 245.94 ആയിരുന്നു. ഇംഗ്ലണ്ടിനെതിരെ 23 പന്തില്‍ 59 റണ്‍സും സ്‌കോട്‌ലന്‍ഡിനെതിരെ 25 പന്തില്‍ 80 റണ്‍സ് ഹെഡ് വാരി. ഏകദിനത്തിലും ഹെഡ് തിളങ്ങി. താരം ഇംഗ്ലണ്ടിനെതിരായ പോരാട്ടത്തില്‍ 248 റണ്‍സ് കണ്ടെത്തി.

ഇറാനില്‍ പോയി എവേ കളിച്ചില്ല; മോഹന്‍ ബഗാനെ ചാംപ്യന്‍സ് ലീഗില്‍ നിന്നു പുറത്താക്കി

ലങ്കന്‍ സ്പിന്നര്‍ പ്രബാത് ജയസൂര്യ ടെസ്റ്റില്‍ മികച്ച ബൗളിങാണ് പുറത്തെടുത്തത്. ന്യൂസിലന്‍ഡിനെതിരായ പോരാട്ടത്തില്‍ ലങ്കയെ പരമ്പര വിജയത്തിലേക്ക് നയിക്കുന്നതില്‍ താരം നിര്‍ണായക സാന്നിധ്യമായിരുന്നു. പരമ്പരയിലെ രണ്ട് ടെസ്റ്റിലും താരം 9 വിക്കറ്റുകള്‍ വീഴ്ത്തി.

ടെസ്റ്റില്‍ സെപ്റ്റംബറില്‍ കാമിന്ദു മെന്‍ഡിസ് മികച്ച ബാറ്റിങാണ് നടത്തിയത്. താരം 451 റണ്‍സുകള്‍ കണ്ടെത്തി. ന്യൂസിലന്‍ഡിനെതിരായ രണ്ടാം ടെസ്റ്റില്‍ പുറത്താകാതെ 182 റണ്‍സ് എടുത്ത് താരം ടീം ടോട്ടല്‍ 600 കടത്തിയിരുന്നു. ആദ്യ ടെസ്റ്റിലും താരം സെഞ്ച്വറിയടിച്ചു.