ഹാമില്‍ട്ടന്‍: ഇന്ത്യയും ന്യൂസിലന്‍ഡും തമ്മിലുള്ള മൂന്നാമത്തെ ഏകദിന പോരാട്ടം ഉപേക്ഷിച്ചു. കനത്ത മഴയെ തുടര്‍ന്നു ഒരു പന്ത് പോലും എറിയാന്‍ സാധിക്കില്ലെന്നു വ്യക്തമായതിനു പിന്നാലെയാണ് മത്സരം ഉപേക്ഷിച്ചത്.

ഇന്ത്യന്‍ സമയം ഇന്ന് രാവിലെ 7.30 മുതലാണ് മത്സരം നടക്കേണ്ടിയിരുന്നത്. എന്നാല്‍ കനത്ത മഴയെ തുടര്‍ന്നു ആദ്യം ടോസ് ചെയ്യാന്‍ പോലും സാധിച്ചില്ല. പിന്നീട് മഴ മാറി ടോസ് ഇട്ടെങ്കിലും തൊട്ടുപിന്നാലെ വീണ്ടും മഴ തുടങ്ങി. ടോസ് നേടി ഇന്ത്യ അതിനിടെ ബൗളിങ് തിരഞ്ഞെടുത്തിരുന്നു.

അഞ്ച് മത്സരങ്ങളടങ്ങിയ പരമ്പരയില്‍ നിലവില്‍ ഇന്ത്യ 2-0ത്തിനു മുന്നിലാണ്. ഇതോടെ അവസാന രണ്ട് മത്സരങ്ങളും ആതിഥേയര്‍ക്ക് നിര്‍ണായകമായി. ഏകദിന പരമ്പര കൈവിടില്ലെന്നു ഇന്ത്യ ഉറപ്പാക്കി. അവസാന രണ്ട് മത്സരങ്ങളും ജയിച്ച് പരമ്പര 4-0ത്തിനു സ്വന്തമാക്കുകയാണ് ഇനി ഇന്ത്യക്ക് മുന്നിലുള്ള വെല്ലുവിളി.