ദുബായ്: 16 മാസത്തെ ഇടവേളയ്ക്ക് ശേഷം ഇന്ത്യന്‍ ഫുട്‌ബോള്‍ ടീം ഇന്ന് കളിക്കളത്തിലിറങ്ങുന്നു. ഒമാന് എതിരായ സൗഹൃദമത്സരത്തിനാണ് ഇന്ത്യ ഇന്നിറങ്ങുന്നത്. രാത്രി 7.15നാണ് മത്സരം. 

സുനില്‍ ഛേത്രി ഇല്ലാതെയാണ് ഇന്ത്യ ഇറങ്ങുന്നത്. കോവിഡ് പോസിറ്റീവായതിനെ തുടര്‍ന്നാണ് ഛേത്രിക്ക് വിശ്രമം നല്‍കിയത്. യുവതാരങ്ങള്‍ നിറഞ്ഞ ടീം എന്ന പ്രത്യേകതയും ഒമാനെതിരെ ഇറങ്ങുന്ന ഇന്ത്യക്കുണ്ട്. ഈ ടീമിന്റെ ശരാശരി പ്രായം 24 വയസാണ്. 

ആഷിഖ് കരുണിയന്‍, മഷ്ഹൂര്‍ ഷെരീഫ് എന്നീ മലയാളി താരങ്ങള്‍ ടീമിലുണ്ട്. ഐഎസ്എല്ലില്‍ മികവ് പുറത്തെടുത്ത ആകാശ് മിശ്ര, ലിസ്റ്റന്‍ കൊളാസോ, ബിപിന്‍ സിങ്, അപുയ എന്നിവരും ടീമില്‍ ഇടംനേടിയിരുന്നു. 

പ്രതിരോധനിര താരം സന്ദേശ് ജിങ്കാന്‍, മധ്യനിര താരം അനിരുദ്ധ് ഥാപ്പ, ഗോള്‍കീപ്പര്‍ ഗുര്‍പ്രീത് സിങ് എന്നിവരാണ് ടീമിലെ സീനിയര്‍ താരങ്ങള്‍. ലോകകപ്പ് യോഗ്യതാ റൗണ്ടില്‍ രണ്ട് തവണ ഏറ്റുമുട്ടിയപ്പോഴും ജയം നിന്നത് ഒമാനൊപ്പമാണ്. ഫിഫ റാങ്കിങ്ങില്‍ 104ാം സ്ഥാനത്താണ് ഇന്ത്യ. ഒമാന്‍ 81ാം സ്ഥാനത്തും.