തിരുവനന്തപുരം: കേരള ക്രിക്കറ്റ് ലീ​ഗിൽ മികവ് പുലർത്തിയാൽ മലയാളി താരങ്ങൾക്ക് ഐപിഎൽ കളിക്കാനുള്ള അവസരമുണ്ട്. മിടുക്കരായ താരങ്ങളെ തേടി കളി കാണാൻ സ്റ്റേഡിയത്തിൽ എത്തുന്നത് ചില്ലറക്കാരല്ല.

മുംബൈ ഇന്ത്യൻസ്, രാജസ്ഥാൻ റോയൽസ്, കൊൽക്കത്ത നൈറ്റ്റൈഡേഴ്സ്, റോയൽ ചലഞ്ചേഴ്സ് ബം​ഗളൂരു ടീമുകൾക്കായി താരങ്ങളെ തിരയുന്ന ടാലന്റ് സ്കൗട്ടുകൾ കെസിഎൽ മത്സരങ്ങൾ കാണാനായി ​ഗ്രീൻഫീൽഡ് സ്റ്റേഡിയത്തിൽ വരുന്നുണ്ട്.

മുൻ ഇന്ത്യൻ വിക്കറ്റ് കീപ്പർ കിരൺ മൊറേയാണ് മുംബൈ ഇന്ത്യൻസിനായി ഇത്തവണ കാര്യവട്ടത്തുള്ളത്. കൊൽക്കത്തയ്ക്കായി മുൻ കേരള രഞ്ജി താരവും കേരളത്തിൽ ചീഫ് സെലക്ടറുമായ പി പ്രശാന്താണ് താരങ്ങളെ തിരയുന്നത്.

രാജസ്ഥാനായി മൽകേഷ് രമേഷ് ​ഗാന്ധിയാണ് സ്കൗട്ടായി എത്തിയിരിക്കുന്നത്. ആർസിബിക്കായി അശ്വിൻ വെങ്കിട്ടരാമനും താര വേട്ടയ്ക്കായി കളത്തിലുണ്ട്.