മുംബൈ: തന്റെ രാജ്യാന്തര ക്രിക്കറ്റ് കരിയർ നശിക്കാനുള്ള പ്രധാന കാരണം ഐപിഎൽ ആണെന്ന ​ഗുരുതര ആരോപണവുമായി മുൻ ഇം​ഗ്ലണ്ട് ക്യാപ്റ്റൻ കെവി‍ൻ പീറ്റേഴ്സൻ. ഐപിഎൽ 19ാം സീസൺ പുരോ​ഗമിക്കുന്നതിനിടെയാണ് മുൻ താരത്തിന്റെ ഞെട്ടിക്കുന്ന വെളിപ്പെടുത്തൽ. ഐപിഎല്ലിൽ റോയൽ ചലഞ്ചേഴ്സ് ബം​ഗളൂരു, ഡൽഹി ക്യാപിറ്റൽസ് (അന്ന് ഡൽഹി ഡെയർഡെവിൾസ്), സൺറൈസേഴ്സ് ഹൈദരാബാദ് ടീമുകൾക്കായി പീറ്റേഴ്സൻ കളിച്ചിട്ടുണ്ട്. കഴിഞ്ഞ സീസണിൽ ഡൽഹി ക്യാപിറ്റൽസിന്റെ മെന്ററായും താരം പ്രവർത്തിച്ചു.

ഐപിഎൽ കളിക്കാൻ വേണ്ടി ഇം​ഗ്ലണ്ട് ആൻഡ് വെയ്ൽസ് ക്രിക്കറ്റ് ബോർഡുമായുണ്ടായ (ഇസിബി) തർക്കമാണ് തന്റെ കരിയർ അകാലത്തിൽ അവസാനിക്കാൻ കാരണമെന്നു അദ്ദേഹം പറയുന്നു. യുട്യൂബർ രൺവീൽ അല്ലാബാദിയുമായുള്ള സംഭാഷണത്തിലാണ് കെവിൻ പീറ്റേഴ്സന്റെ തുറന്നുപറച്ചിൽ. ഐപിഎല്ലിന്റെ ആദ്യ വർഷങ്ങളിൽ തന്നെ വേട്ടയാടാൻ ഇസിബി മാധ്യമങ്ങളെ ഉപയോ​ഗിച്ചുവെന്ന ആരോപണവും പീറ്റേഴ്സൻ അഭിമുത്തിൽ ഉന്നയിക്കുന്നു.

'ഞാൻ ത്യാ​ഗങ്ങൾ സഹിച്ചാണ് ഐപിഎൽ കളിച്ചത്. എനിക്ക് എന്റെ കരിയർ തന്നെ നഷ്ടമായി. ഇസിബിയിലെ എല്ലാവരും എനിക്കെതിരെ തിരിയാനുള്ള കാരണവും അതാണ്. എന്റെ ഇം​ഗ്ലണ്ട് കരിയർ അവസാനിക്കുമ്പോൾ എനിക്ക് 33 വയസായിരുന്നു. 104 ടെസ്റ്റുകളാണ് കളിച്ചത്. ഞാൻ 150-160 ടെസ്റ്റുകളെങ്കിലും കളിക്കണമെന്നു ആ​ഗ്രഹിച്ചിരുന്നു. 12,000- 13,000 റൺസ് നേടാനും ലക്ഷ്യമിട്ടിരുന്നു. അതായിരുന്നു എനിക്കു വേണ്ടിയിരുന്നത്. ദി ടെല​ഗ്രാഫ് പത്രത്തെ ഉപയോ​ഗിച്ച് ഇസിബി എന്നെ വേട്ടയാടി. അത് വലിയ തോതിൽ അന്നു വാർത്തയുമായിരുന്നു. ഇപ്പോൾ സമാധാനവും സന്തോഷവും നിറഞ്ഞ ഒരു ജീവിതമാണ് ഞാൻ നയിക്കുന്നത്. അതിനാൽ അതുമായി ബന്ധപ്പെട്ട കൂടുതൽ കാര്യങ്ങളിലേക്ക് പോകാൻ താത്പര്യമില്ല.'

2008ൽ പ്രഥമ ഐപിഎൽ സീസണിൽ കളിക്കാൻ ഇം​ഗ്ലണ്ട് താരങ്ങൾക്ക് ഇസിബി അനുമതി നൽകിയിരുന്നില്ല. ആ സീസണിൽ ദിമിത്രി മസ്കരാനസ് മാത്രമാണ് ഐപിഎൽ കളിച്ച ഇം​ഗ്ലണ്ട് താരം. 2009ൽ മൂന്നാഴ്ച കളിക്കാനുള്ള അനുമതിയാണ് ഇം​ഗ്ലീഷ് താരങ്ങൾക്കു കിട്ടിയത്. പിന്നാലെയാണ് കെവിൻ പീറ്റേഴ്സൻ ആർസിബിയിൽ എത്തുന്നത്. പിന്നീട് ഐപിഎല്ലിനു മുൻ​ഗണന നൽകാനുള്ള പീറ്റേഴ്സന്റെ തീരുമാനം ഇസിബിയെ ചൊടിപ്പിച്ചു. ഐപിഎൽ കളിക്കാനുള്ള തന്റെ തീരുമാനം കരിയറിനെ ബാധിച്ചെങ്കിലും പുതു തലമുറയിലെ ഇം​ഗ്ലീഷ് താരങ്ങൾക്കും ഫ്രാഞ്ചൈസി ക്രിക്കറ്റിൽ പങ്കെടുക്കാനുള്ള സ്വാതന്ത്ര്യം നേടിയെടുക്കാൻ തന്റെ സമീപനം സഹായിച്ചതായി പീറ്റേഴ്സൻ പറയുന്നു.

'കഴിഞ്ഞ ദിവസം ഞാൻ ജോസ് ബട്ലറെ ഇന്റർവ്യു ചെയ്തിരുന്നു. അദ്ദേഹവും എന്നോടു നന്ദി പറഞ്ഞു. ഞാൻ ചെയ്ത ത്യാ​ഗങ്ങൾ കാരണം പുതിയ കളിക്കാർക്ക് അതിന്റെ ​ഗുണഫലങ്ങൾ ആസ്വദിക്കാൻ സാധിക്കുന്നു'- പീറ്റേഴ്സൻ വ്യക്തമാക്കി.

ഇം​ഗ്ലണ്ട് ക്രിക്കറ്റ് സംഭാവന ചെയ്ത ഇതിഹാസ താരമാണ് കെവിൻ പീറ്റേഴ്സൻ. ദക്ഷിണാഫ്രിക്കയിൽ ജനിച്ച അദ്ദേഹം ഇം​ഗ്ലണ്ടിനായാണ് രാജ്യന്തര ക്രിക്കറ്റിൽ കളിച്ചത്. ടെസ്റ്റിൽ 23 സെഞ്ച്വറികളും 35 അർധ സെഞ്ച്വറികളും അടക്കം 8,181 റൺസ് അദ്ദേഹം നേടി.