സതാംപ്ടൺ: ഇന്ത്യക്കെതിരായ ലോക ടെസ്റ്റ് ചാമ്പ്യൻഷിപ്പ് ഫൈനലിനുള്ള 15 അം​ഗ സംഘത്തെ പ്രഖ്യാപിച്ച് ന്യൂസിലാൻഡ്. സ്പെഷ്യലിസ്റ്റ് സ്പിന്നറായി അജാക്സ് പട്ടേലിനെ ടീമിൽ ഉൾപ്പെടുത്തി. 

കോളിൻ ​ഗ്രാൻഡ്ഹോം, വിൽ യങ്, ടോം ബ്ലണ്ടൽ, എന്നിവരും ടീമിൽ സ്ഥാനം നിലനിർത്തിയിട്ടുണ്ട്. ജേക്കബ് ഡഫി,ഡാരിൽ മിച്ചൽ, രചിൻ രവീന്ദ്ര, മിച്ചൽ സാന്ത്നർ എന്നിവരെയാണ് ഇം​ഗ്ലണ്ടിനെതിരായ പരമ്പരയ്ക്ക് പിന്നാലെ ഒഴിവാക്കിയത്. ഇം​ഗ്ലണ്ടിനെതിരായ രണ്ടാം ടെസ്റ്റിൽ നാല് വിക്കറ്റ് വീഴ്ത്തിയ അജാക്സ് ടെസ്റ്റ് ചാമ്പ്യൻഷിപ്പ് ഫൈനലിൽ ടീമിന് മുതൽക്കൂട്ടാവുമെന്ന് കിവീസ് മുഖ്യ പരിശീലകൻ ​ഗാരി സ്റ്റെഡ് പറഞ്ഞു.  

നായകൻ വില്യംസണിനും വിക്കറ്റ് കീപ്പർ ബാറ്റ്സ്മാൻ ബിജെ വാൾട്ടിങ്ങിനും ടെസ്റ്റ് ചാമ്പ്യൻഷിപ്പ് ഫൈനൽ ആവുമ്പോഴേക്കും ഫിറ്റ്നസ് വീണ്ടെടുക്കാൻ സാധിക്കുമെന്നാണ് പ്രതീക്ഷിക്കുന്നതെന്ന് കിവീസ് പരിശീലകൻ പറഞ്ഞു. പരിക്കിനെ തുടർന്ന് ഇരുവരും ഇം​ഗ്ലണ്ടിനെതിരായ രണ്ടാം ടെസ്റ്റ് കളിച്ചിരുന്നില്ല. പേസർമാരായ വാ​ഗ്നർ, ട്രെന്റ് ബോൾട്ട്, തിം സൗത്തി, ജാമിസൻ എന്നിവർക്കൊപ്പം ഇം​ഗ്ലണ്ടിനെതിരെ മികവ് കാണിച്ച മാറ്ര് ഹെന്റിയും ഫൈനലിനുള്ള കിവീസ് സംഘത്തിൽ ഇടം നേടി. 

ടെസ്റ്റ് ചാമ്പ്യൻഷിപ്പ് ഫൈനലിനുള്ള ന്യൂസിലാൻഡ് ടീം; കെയ്ൻ വില്യംസൺ(ക്യാപ്റ്റൻ), ടോം ബ്ലണ്ടൽ(വിക്കറ്റ് കീപ്പർ), ട്രെന്റ് ബോൾട്ട്, ഡെവോൺ കോൺവേ, ​ഗ്രാൻഡ്ഹോം, മാറ്റ് ഹെന്റി, കെയ്ൽ ജാമിസൺ, ടോം ലാതം, ഹെന്റി നിക്കോൾസ്, അജാക്സ് പട്ടേൽ, തിം സൗത്തി, റോസ് ടെയ്ലർ, വാ​ഗ്നർ, ബിജെ വാൾട്ടിങ്, വിൽ യങ്