മുംബൈ: ഇന്ത്യൻ ഏകദിന നായകനും വെറ്ററൻ താരവുമായ രോഹിത് ശർമയുടെ അർധ രാത്രിയിലെ ആശുപത്രി സന്ദർശനം ആരാധകരിൽ ആശങ്ക പരത്തി. മുംബൈയിലെ കോകിലബെൻ ആശുപത്രിയിലാണ് താരം അർധ രാത്രിയിൽ എത്തിയത്. സൂപ്പർ താരം എന്തിനാണ് ആശുപത്രിയിൽ എത്തിയത് എന്നതു സംബന്ധിച്ച വിവരങ്ങൾ ആശുപത്രി അധികൃതർ പുറത്തു വിട്ടിട്ടില്ല. ഇതോടെയാണ് ആരാധകർ ആശങ്കയിലായത്.

ടെസ്റ്റ്, ടി20 ഫോർമാറ്റുകളിൽ നിന്നു വിരമിച്ച രോഹിത് ഇന്ത്യയുടെ ഏകദിന ടീമിൽ മാത്രമാണ് നിലവിൽ കളിക്കുന്നത്. ഒക്ടോബറിൽ ഓസ്ട്രേലിയക്കെതിരായ ഏക​ദിന പരമ്പരയാണ് ഇനി രോഹിതിനു മുന്നിലുള്ളത്. വെറ്ററൻ താരത്തിനു പരിക്കേറ്റതായി വിവരമൊന്നുമില്ല. അസുഖങ്ങൾ ഉള്ളതായും റിപ്പോർട്ടുകളില്ല.

ഓസ്ട്രേലിയൻ പര്യടനം തുടങ്ങാനിരിക്കെ രോഹിത് ബിസിസിഐയുടെ ഫിറ്റ്നസ് ടെസ്റ്റുകൾ മുഴുവൻ പാസായിട്ടുണ്ട്. യോയോ, ബ്രങ്കോ ടെസ്റ്റുകൾ താരം മികച്ച മാർക്കിൽ തന്നെ പാസായി. ഏക​ദിന പരമ്പരയ്ക്കു മുന്നോടിയായി രോഹിത് ഇന്ത്യ എ ടീമിൽ കളിച്ചേക്കും. പരമ്പരയ്ക്കു പിന്നാലെ രോഹിത് വിരമിക്കൽ പ്രഖ്യാപിക്കുമെന്നാണ് പ്രതീക്ഷിക്കുന്നത്.