ബുലവായോ: ടെസ്റ്റ് നായകനായുള്ള അരങ്ങേറ്റത്തില്‍ തന്നെ ഏറ്റവും ഉയര്‍ന്ന വ്യക്തിഗത സ്‌കോര്‍ നേടുന്ന ക്രിക്കറ്റ് ചരിത്രത്തിലെ ആദ്യ താരമെന്ന അപൂര്‍വ റെക്കോര്‍ഡ് സ്വന്തമാക്കി ദക്ഷിണാഫ്രിക്കയുടെ താത്കാലിക നായകന്‍ വിയാന്‍ മള്‍ഡര്‍. നായകനായുള്ള അരങ്ങേറ്റത്തില്‍ തന്നെ ഇരട്ട സെഞ്ച്വറിയടിക്കുന്ന മൂന്നാമത്തെ താരമായും മള്‍ഡര്‍ മാറി. സിംബാബ്‌വെക്കെതിരായ രണ്ടാം ക്രിക്കറ്റ് ടെസ്റ്റിലാണ് താരം നായകനായി അരങ്ങേറിയത്. ടെംബ ബവുമയ്ക്കു പകരമാണ് താരം ടീമിനെ നയിക്കുന്നത്.

കരിയറിലെ കന്നി ഇരട്ട സെഞ്ച്വറിയിലേക്ക് അതിവേഗം എത്തിയ താരം നിലവില്‍ 259 പന്തില്‍ 264 റണ്‍സുമായി പുറത്താകാതെ നില്‍ക്കുന്നു. ടെസ്റ്റില്‍ അതിവേഗം 250, പ്ലസ് സ്‌കോര്‍ നേടുന്ന ദക്ഷിണാഫ്രിക്കന്‍ ബാറ്ററെന്ന നേട്ടവും മള്‍ഡര്‍ സ്വന്തമാക്കി. മത്സരത്തില്‍ താരം 34 ഫോറുകളും 3 സിക്‌സും തൂക്കി.

രണ്ടാം ടെസ്റ്റിന്റെ ആദ്യ ദിനം അവസാനിക്കുമ്പോള്‍ ദക്ഷിണാഫ്രിക്ക 4 വിക്കറ്റ് നഷ്ടത്തില്‍ 465 റണ്‍സെന്ന നിലയിലാണ്. മള്‍ഡര്‍ക്കൊപ്പം ഡെവാല്‍ഡ് ബ്രവിസാണ് ക്രീസില്‍. താരം 15 റണ്‍സെടുത്തു.

ഡേവിഡ് ബഡിങ്ഹാം (82), പ്രിട്ടോറിയസ് (78) എന്നിവര്‍ അര്‍ധ സെഞ്ച്വറിയടിച്ച് മള്‍ഡര്‍ക്ക് ശക്തമായ പിന്തുണ നല്‍കി. നിലവിലെ ലോക ടെസ്റ്റ് ചാംപ്യന്‍മാരായ ദക്ഷിണാഫ്രിക്ക പരമ്പരയിലെ ആദ്യ പോരാട്ടം വിജയിച്ചിരുന്നു. രണ്ട് മത്സരങ്ങളടങ്ങിയ പരമ്പരയില്‍ അവര്‍ 1-0ത്തിനു മുന്നില്‍.