ദുബായ്: ഈ ഐപിഎല്ലില്‍ പരമ ദയനീയ പ്രകടനം പുറത്തെടുത്ത ടീം ഏതാണെന്ന് ചോദിച്ചാല്‍ അതിനുത്തരം ചെന്നൈ സൂപ്പര്‍ കിങ്‌സ് എന്നാണ്. ഐപിഎല്ലിന്റെ ചരിത്രത്തില്‍ ആദ്യമായാണ് സിഎസ്‌കെയുടെ പ്രകടനത്തിലെ ഈ നിലവാരത്തകര്‍ച്ച. ഐപിഎല്ലില്‍ ഏറ്റവും മികച്ച വിജയ ശതമാനമുള്ള ടീമിന്റെ തകര്‍ച്ച കടുത്ത ആരാധകരെ പോലും അമ്പരപ്പിക്കുന്നതായിരുന്നു.
ഇപ്പോഴിതാ ടീമിന്റെ പ്രകടനം മോശമായിരുന്നുവെന്ന് തുറന്നു സമ്മതിച്ച് രംഗത്തെത്തിയിരിക്കുകയാണ് സിഎസ്‌കെയുടെ വിന്‍ഡീസ് ഓള്‍റൗണ്ടര്‍ ഡ്വെയ്ന്‍ ബ്രാവോ. പരിക്കിനെ തുടര്‍ന്ന് ടീമില്‍ നിന്ന് പുറത്തായ ബ്രാവോയ്ക്ക് ശേഷിക്കുന്ന ഐപിഎല്‍ പോരാട്ടങ്ങളില്‍ കളിക്കാന്‍ സാധിക്കില്ല. ഇതിന് പിന്നാലെയാണ് ടീമിന്റെ പ്രകടനത്തെ കുറിച്ച് താരം അഭിപ്രായം പറഞ്ഞിരിക്കുന്നത്.
പരിക്കിനെ തുടര്‍ന്ന് ടീമിനോട് വിട പറയുകയാണെന്ന് വ്യക്തമാക്കി ബ്രാവോ ആരാധകര്‍ക്കായി ഒരു വീഡിയോ പോസ്റ്റ് ചെയ്തിരുന്നു. ഇതിലാണ് താരത്തിന്റെ തുറന്നു പറച്ചില്‍.
ടീമിനോട് വിട പറയുക എന്നത് വളരെ വിഷമകരമായ കാര്യമാണെന്ന് ബ്രാവോ വ്യക്തമാക്കി. പരിക്കേറ്റ് പുറത്ത് പോകേണ്ടി വന്നതില്‍ ദുഃഖമുണ്ട്. ആരാധകര്‍ ടീമിന് നല്‍കുന്ന പിന്തുണ തുടരണമെന്നും ബ്രാവോ വീഡിയോയിലൂടെ അഭ്യര്‍ഥിച്ചു.
'ഈ ഫലം ഞങ്ങള്‍ പ്രതീക്ഷിച്ചതല്ല. ആരാധകര്‍ക്ക് മികച്ച സീസണ്‍ സമ്മാനിക്കാന്‍ സാധിച്ചില്ല. ഞങ്ങളുടെ ആരാധകര്‍ ഇത് ആഗ്രഹിക്കുന്നില്ല. എങ്കിലും ഞങ്ങള്‍ ഏറ്റവും മികച്ച പ്രകടനം തന്നെയാണ് പുറത്തെടുത്തത്. ചില സമയങ്ങളില്‍ മികച്ച പ്രകടനം നടത്തിയാലും വിചാരിച്ച ഫലം ലഭിക്കില്ല'- ബ്രാവോ വ്യക്തമാക്കി.
'ഞങ്ങളെ പിന്തുണയ്ക്കുന്നത് തുടരണം. ഞങ്ങള്‍ ചാമ്പ്യന്മാരെപ്പോലെ സിഎസ്‌കെ കരുത്തരായി മടങ്ങിവരുമെന്ന് എനിക്ക് ഉറപ്പ് നല്‍കാന്‍ കഴിയും. ഏറ്റവും വിജയകരമായ ഫ്രാഞ്ചൈസികളിലൊന്നായ സിഎസ്‌കെയുടെ അംഗങ്ങളും ആരാധകരും ആയിരിക്കുന്നതില്‍ അഭിമാനിക്കുന്നു'- ബ്രാവോ കൂട്ടിച്ചേര്‍ത്തു.
ഒക്ടോബര്‍ 17ന് നടന്ന ഡല്‍ഹി ക്യാപിറ്റല്‍സിനെതിരായ പോരാട്ടത്തിനിടെയാണ് ബ്രാവോയ്ക്ക് പരിക്കേറ്റത്. ഈ സീസണില്‍ ആറ് കളികളിലാണ് താരം ചെന്നൈയ്ക്കായി കളിക്കാനിറങ്ങിയത്. രണ്ട് ഇന്നിങ്‌സുകള്‍ മാത്രം ബാറ്റ് ചെയ്ത ബ്രാവോ ഏഴ് റണ്‍സ് മാത്രമാണ് കണ്ടെത്തിയത്. ആറ് കളികളില്‍ നിന്നായി ആറ് വിക്കറ്റുകളും സീസണില്‍ താരം സ്വന്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates