ലാപ്‌ടോപ്പിലും കമ്പ്യൂട്ടറിലും യുഎസ്ബി പോര്‍ട്ടുകള്‍ ശ്രദ്ധിച്ചിട്ടില്ലേ? പെന്‍ഡ്രൈവ് കണക്ട് ചെയ്യാനും മൊബൈല്‍ ഫോണ്‍ ചാര്‍ജ് ചെയ്യാനും ഫയലുകള്‍ കൈമാറാനുമെല്ലാം ഇവ ആവശ്യമാണ്. ചില പോര്‍ട്ടുകള്‍ നീല നിറത്തിലും ചിലത് കറുപ്പ്, ചുവപ്പ്, മഞ്ഞ തുടങ്ങിയ നിറങ്ങളിലും കാണപ്പെടുന്നത് ശ്രദ്ധിച്ചിട്ടുണ്ടോ? ഇത് എന്തിനെ സൂചിപ്പിക്കുന്നതാണെന്ന് അറിയാം.

വെള്ള നിറത്തിലുള്ള യുഎസ്ബി പോര്‍ട്ട്

പഴയ യുഎസ്ബി 1.x സാങ്കേതികവിദ്യയുമായി വെള്ള നിറത്തിലുള്ള പോര്‍ട്ടുകള്‍ സാധാരണയായി ബന്ധപ്പെടുത്താറുണ്ട്. താരതമ്യേന ഇവയുടെ ഡാറ്റ കൈമാറ്റ വേഗത വളരെ കുറവാണ്. പഴയ കമ്പ്യൂട്ടറുകളിലും ഉപകരണങ്ങളിലുമാണ് ഇത്തരം പോര്‍ട്ടുകള്‍ കൂടുതലായി കണ്ടിരുന്നത്.

കറുപ്പ് നിറത്തിലുള്ളവ - കറുപ്പ് നിറത്തിലുള്ള യുഎസ്ബി പോര്‍ട്ടുകള്‍ പൊതുവെ യുഎസ്ബി 2.0 സാങ്കേതികവിദ്യയുമായി ബന്ധപ്പെട്ടവയാണ്. ഇവയ്ക്ക് പരമാവധി 480 എംബിപിഎസ് വേഗതയില്‍ ഡാറ്റ കൈമാറാന്‍ കഴിയും. മൗസ്, കീബോര്‍ഡ്, പ്രിന്റര്‍ തുടങ്ങിയ ഉപകരണങ്ങള്‍ ബന്ധിപ്പിക്കാന്‍ ഈ വേഗത സാധാരണയായി മതിയാകും. എന്നാല്‍ വലിയ ഫയലുകള്‍ കൈമാറുമ്പോള്‍ കൂടുതല്‍ വേഗതയുള്ള പോര്‍ട്ടുകളെ അപേക്ഷിച്ച് സമയം കൂടുതലെടുത്തേക്കാം.

നീല നിറം

നീല നിറത്തിലുള്ള യുഎസ്ബി പോര്‍ട്ടുകള്‍ സാധാരണയായി യുഎസ്ബില 3.0 അഥവാ 5 ജിബിപിഎസ് വേഗതയുള്ള സാങ്കേതിക വിദ്യയുമായി ബന്ധപ്പെട്ടിരിക്കുന്നു. ഉദാഹരണത്തിന് വലിയ വീഡിയോ ഫയലുകള്‍ പെന്‍ഡ്രൈവിലേക്കോ എക്സ്റ്റേണല്‍ ഹാര്‍ഡ് ഡിസ്‌കിലേക്കോ പകര്‍ത്തുമ്പോള്‍ ഇത്തരം പോര്‍ട്ടുകള്‍ പ്രയോജനപ്പെടാം. എന്നാല്‍ യഥാര്‍ഥ വേഗത പോര്‍ട്ടിന്റെ ശേഷി, ഉപയോഗിക്കുന്ന കേബിള്‍, കണക്ട് ചെയ്ത ഉപകരണം എന്നിവയെയും ആശ്രയിച്ചിരിക്കും.

ചുവപ്പും മഞ്ഞയും നിറങ്ങള്‍

ചുവപ്പ്, മഞ്ഞ, ഓറഞ്ച് നിറങ്ങളിലുള്ള പോര്‍ട്ടുകള്‍ ചില ഉപകരണങ്ങളില്‍ പ്രത്യേക ചാര്‍ജിങ് സൗകര്യങ്ങളെയോ കൂടുതല്‍ വൈദ്യുതി നല്‍കാനുള്ള ശേഷിയെയോ സൂചിപ്പിക്കാം. കമ്പ്യൂട്ടര്‍ സ്ലീപ് മോഡിലോ ഓഫായിരിക്കുമ്പോഴോ പോലും ചില പോര്‍ട്ടുകള്‍ വഴി മൊബൈല്‍ ഫോണ്‍ ചാര്‍ജ് ചെയ്യാന്‍ സാധിച്ചേക്കാം. എന്നാല്‍ ചുവപ്പ് നിറമാണെങ്കില്‍ കൂടുതല്‍ വേഗതയുണ്ടെന്നും മഞ്ഞ നിറമാണെങ്കില്‍ ഫാസ്റ്റ് ചാര്‍ജിങ് ഉറപ്പാണെന്നും കരുതരുത്. ഓരോ കമ്പനിയുടെയും രൂപകല്‍പ്പനയും സാങ്കേതികവിദ്യയും വ്യത്യസ്തമായിരിക്കാം.

-