മംഗളൂരു - മഡ്ഗാവ് വന്ദേ ഭാരത് കോഴിക്കോട്ടേക്ക് നീട്ടാനുള്ള നീക്കത്തിനെതിരെ കാസർകോട്ടെ യാത്രക്കാരുടെ സംഘടനകൾ

കാസർകോട്: മംഗളൂരു സെൻട്രൽ - മഡ്ഗാവ് വന്ദേ ഭാരത് എക്സ്പ്രസ് കോഴിക്കോട്ടേക്ക് നീട്ടാനുള്ള റെയിൽവേയുടെ ആലോചനകൾക്കെതിരെ കാസർകോട്ടെ റെയിൽവേ യാത്രക്കാർക്കിടയിൽ കടുത്ത പ്രതിഷേധം. ഈ നീക്കം ഗുണത്തേക്കാളേറെ തദ്ദേശീയരായ ദിനപത്ര യാത്രക്കാർക്ക് വലിയ ദോഷം ചെയ്യുമെന്നാണ് യാത്രക്കാരുടെ സംഘടനകൾ വ്യക്തമാക്കുന്നത്.2023 ഡിസംബറിൽ രാജ്യത്തെ 40-ാമത് വന്ദേ ഭാരത് ട്രെയിനായിട്ടാണ് മംഗളൂരു - മഡ്ഗാവ് സർവീസ് ആരംഭിച്ചത്. ചൊവ്വാഴ്ച ഒഴികെ ആഴ്ചയിൽ ആറ് ദിവസവും രാവിലെ 8.30-ന് മംഗളൂരുവിൽ നിന്ന് പുറപ്പെട്ട് ഉച്ചയ്ക്ക് 1.45-ന് മഡ്ഗാവിലെത്തുന്ന രീതിയിലാണ് ഇതിന്റെ സമയം.

തുടക്കത്തിൽ മികച്ച പ്രതികരണമുണ്ടായെങ്കിലും മാസങ്ങൾക്കകം ഈ 8 കോച്ചുകളുള്ള ട്രെയിനിലെ യാത്രക്കാരുടെ എണ്ണം ആദ്യം 50 ശതമാനമായും പിന്നീട് 36 മുതൽ 43 ശതമാനം വരെയുമായി കുത്തനെ ഇടിഞ്ഞു. ഇതോടെയാണ് വരുമാനം കൂട്ടാനായി ട്രെയിൻ തെക്കോട്ട് കോഴിക്കോട്ടേക്കോ അല്ലെങ്കിൽ വടക്കോട്ട് മുംബൈയിലേക്കോ നീട്ടാൻ റെയിൽവേ അധികൃതർ നിർദേശം തയാറാക്കിയത്.

ലോക്കൽ ട്രെയിനുകളെ പിടിച്ചിടും; മാവേലിയും മലബാറും ദുരിതത്തിലാകും

നിലവിൽ ഉയർന്ന വരുമാനമുള്ള രണ്ട് വന്ദേ ഭാരത് ട്രെയിനുകൾ കാസർകോട് സർവീസ് നടത്തുന്നുണ്ട്. മംഗളൂരു - തിരുവനന്തപുരം വന്ദേ ഭാരത് 180% ഒക്യുപൻസിയോടെ രാജ്യത്ത് ഒന്നാം സ്ഥാനത്തും, കാസർകോട് - തിരുവനന്തപുരം വന്ദേ ഭാരത് 165% ഒക്യുപൻസിയോടെ തൊട്ടുപിന്നിലുമുണ്ട്. ത്തരം സാഹചര്യത്തിൽ കുറഞ്ഞ വരുമാനമുള്ള മറ്റൊരു വന്ദേ ഭാരത് മലബാർ മേഖലയിലേക്ക് നീട്ടുന്നത് പ്രാദേശിക ട്രെയിൻ ഗതാഗതത്തെ പൂർണ്ണമായി തകിടം മറിക്കുമെന്ന് കാസർകോട് ഡിസ്ട്രിക്റ്റ് റെയിൽ പാസഞ്ചേഴ്സ് അസോസിയേഷൻ കൺവീനർ നിസാർ പെരുവാട് ആരോപിച്ചു.

കേരളത്തിൽ മൂന്നാമത്തെയും നാലാമത്തെയും റെയിൽവേ ലൈനുകൾ നിർമ്മിച്ച് അടിസ്ഥാന സൗകര്യങ്ങൾ വികസിപ്പിക്കാതെ പ്രീമിയം ട്രെയിനുകൾ കൂട്ടുന്നത് യുക്തിരഹിതമാണ്. വിഐപി ട്രെയിനുകൾക്ക് മുൻഗണന നൽകുന്നതിനായി ഈ റൂട്ടിലോടുന്ന ജനപ്രിയ സർവീസുകളായ മാവേലി എക്സ്പ്രസ്, മലബാർ എക്സ്പ്രസ്, അന്ത്യോദയ എക്സ്പ്രസ്, പോണ്ടിച്ചേരി - മംഗളൂരു എക്സ്പ്രസ്, കാച്ചേഗുഡ - കുംത എക്സ്പ്രസ്, ചെറുവത്തൂർ - മംഗളൂരു പാസഞ്ചർ എന്നിവ പല സ്റ്റേഷനുകളിലും ദീർഘനേരം പിടിച്ചിടേണ്ടി വരും. ഇത് കണ്ണൂർ, കാസർകോട് ജില്ലകളിൽ നിന്ന് ദിവസേന മംഗളൂരുവിലേക്കും തിരിച്ചും യാത്ര ചെയ്യുന്ന ആയിരക്കണക്കിന് ഓഫീസ ജീവനക്കാരെയും വിദ്യാർത്ഥികളെയും ദുരിതത്തിലാക്കും.

എം.പി ഇടപെടുന്നു; റെയിൽവേ സോണൽ ഓഫീസിലേക്ക് മാർച്ച്

പദ്ധതിക്കെതിരെയുള്ള തങ്ങളുടെ ശക്തമായ വിയോജിപ്പ് അസോസിയേഷൻ ഭാരവാഹികൾ കാസർകോട് എം.പി രാജ്‌മോഹൻ ഉണ്ണിത്താനും റെയിൽവേ സോണൽ അധികൃതർക്കും നിവേദനമായി അയച്ചിട്ടുണ്ട്. യാത്രക്കാരുടെ ആശങ്കകൾ പൂർണ്ണമായും ഉൾക്കൊള്ളുന്നുവെന്നും വിഷയം കേന്ദ്ര റെയിൽവേ മന്ത്രാലയത്തിന്റെ ശ്രദ്ധയിൽപ്പെടുത്തുമെന്നും രാജ്‌മോഹൻ ഉണ്ണിത്താൻ എംപി ഉറപ്പുനൽകിയതായി അസോസിയേഷൻ പ്രസിഡന്റ് ആർ. പ്രശാന്ത് കുമാർ അറിയിച്ചു.