ആരാധകര് കാത്തിരിക്കുന്ന ചിത്രമാണ് ഓം. മമ്മൂട്ടിയും ധനുഷും പ്രധാന വേഷങ്ങളിലെത്തുന്ന ചിത്രത്തിന്റെ സംവിധാനം രാജ്കുമാര് പെരിയസ്വാമിയാണ്. മമ്മൂട്ടിയുടെ പിറന്നാള് ദിനത്തില് ആരാധകര്ക്ക് ആവേശം പകര്ന്നു കൊണ്ട് പുതിയ ടീസര് പുറത്ത് വിട്ടിരിക്കുകയാണ് അണിയറ പ്രവര്ത്തകര്. ചിത്രത്തിലെ മമ്മൂട്ടിയുടെ കഥാപാത്രമായ കാര്ത്തികേയനെ അവതരിപ്പിക്കുന്നതാണ് പുതിയ ടീസര്.
സിയ എന്നറിയപ്പെടുന്ന കാര്ത്തികേയന് എന്ന ഇന്റര്നാഷണല് സ്മഗ്ലര് ആയിട്ടാണ് ചിത്രത്തില് മമ്മൂട്ടിയെത്തുന്നത്. മാസും ക്ലാസും ചേര്ന്നൊരു കഥാപാത്രമാകും മമ്മൂട്ടിയുടേതെന്നാണ് ടീസര് നല്കുന്ന സൂചന. മമ്മൂട്ടിയും ധനുഷും ഒന്നിച്ച് വരുന്നത് കാണാന് കാത്തിരിക്കുകയാണ് ആരാധകര്. ടീസറില് ഇരുവരേയും ഒരുമിച്ച് അവതരിപ്പിക്കുന്നുണ്ട്. അതേസമയം, നായകനായ ധനുഷിനെ മമ്മൂട്ടി സൈഡാക്കുമെന്നും ചിലര് പറയുന്നുണ്ട്.
അമരന് ശേഷം രാജ്കുമാര് ഒരുക്കുന്ന ചിത്രമാണ് ഓം. ചിത്രത്തിന്റെ റിലീസ് ഒക്ടബോര് 16 നാണ്. ധനുഷിന്റെ വണ്ടര്ബാല് ഫിലിംസ്, ആര്ടേക്ക് സ്റ്റുഡിയോസ് എന്നിവര് ചേര്ന്നാണ് ചിത്രം നിര്മിക്കുന്നത്. ചിത്രത്തില് നായികയായി എത്തുന്നത് സായ് പല്ലവിയാണ്. ശ്രീലീയും ചിത്രത്തിലുണ്ട്. രണ്ട് ഭാഗങ്ങളിലായി ഒരുങ്ങുന്ന ചിത്രമാണ് ഓം. പേരന്പിന് ശേഷം മമ്മൂട്ടി അഭിനയിക്കുന്ന തമിഴ് ചിത്രമാണിത്.
സായ് അഭ്യങ്കര് ആണ് ചിത്രത്തിന് സംഗീതമൊരുക്കുന്നത്. മമ്മൂട്ടിയുടെ ക്യാരക്ടര് ഇന്ട്രോയ്ക്ക് സായ് നല്കിയ സംഗീതവും സോഷ്യല് മീഡിയയുടെ കയ്യടി നേടുന്നുണ്ട്. തിയേറ്ററില് മമ്മൂട്ടിയുടെ രംഗങ്ങള്ക്ക് സായ് തീ ഇടുമെന്ന് തന്നെയാണ് ആരാധകര് പ്രതീക്ഷിക്കുന്നത്. അതേസമയം ചിത്രത്തിലൊരു പ്രധാന വേഷത്തില് ഇന്ദ്രന്സുമെത്തുന്നുണ്ടെന്നാണ് റിപ്പോര്ട്ടുകള്. ഓമിന് പിന്നാലെ നിതീഷ് സഹദേവ് ഒരുക്കുന്ന മേള, ഖാലിദ് റഹ്മാന് ചിത്രം മട്ടാഞ്ചേരി മാഫിയ തുടങ്ങിയവയും മമ്മൂട്ടിയുടേതായി അണിയറയിലുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
