'ചേട്ടന് ശ്ലോകങ്ങളൊക്കെ കുറേ അറിയാം, ഞാൻ അങ്ങനെയല്ല; നന്ദി പറഞ്ഞു കൊണ്ട് മാത്രമേ ഞാനെന്റെ പ്രാർഥന ആരംഭിക്കാറുള്ളൂ'

നടനെന്നതിലുപരി ആത്മീയ കാര്യങ്ങളിലും ഏറെ താല്പര്യമുള്ള നടനാണ് മോഹൻലാൽ. ആത്മീയ യാത്രയെക്കുറിച്ചും ​ഗുരുക്കൻമാരെക്കുറിച്ചുമൊക്കെ അദ്ദേഹം പലപ്പോഴായി അഭിമുഖങ്ങളിലൂടെ തുറന്നുപറഞ്ഞിട്ടുണ്ട്. മോഹൻലാലിൽ നിന്ന് തികച്ചും വേറിട്ട ആത്മീയതയാണ് തന്റേതെന്ന് പറയുകയാണ് അദ്ദേഹത്തിന്റെ ഭാര്യ സുചിത്ര മോഹൻലാൽ.

തന്റെ പ്രാർഥന എപ്പോഴും ദൈവത്തോട് നേരിട്ടാണെന്നും ഇടനിലക്കാർ ആരുമില്ലെന്നും സുചിത്ര പറയുന്നു. കാൻ ചാനൽ മീഡിയയോട് സംസാരിക്കുകയായിരുന്നു സുചിത്ര. "ഭക്തിയെ സംബന്ധിച്ച് എന്റെ കാര്യങ്ങൾ അദ്ദേഹത്തിൽ നിന്ന് വ്യത്യസ്തമാണ്. ചേട്ടന് ശ്ലോകം പോലെയുള്ള കാര്യങ്ങൾ കുറേ അറിയാം. എനിക്ക് അതൊന്നും അറിയില്ല. ആ ഒരു രീതിയിലുള്ള പ്രാർഥനയേ അല്ല എന്റേത്.

ഞാൻ എല്ലാ ദിവസവും അമ്പലത്തിൽ പോകുന്ന ആളുമല്ല, ഇടയ്ക്ക് പോകും. എന്റെ സംസാരങ്ങൾ ദൈവത്തോടാണ്. ദിവസവും ഞാൻ പ്രാർഥിക്കും, പക്ഷേ എന്റെ പ്രാർഥന തന്നെ സംസാരമാണ്. കുറേ ആളുകൾക്ക് ​ഗുരു ഒക്കെയുണ്ട്. പക്ഷേ എനിക്ക് അങ്ങനെയില്ല. കാരണം, എനിക്ക് ദൈവവുമായി നേരിട്ട് ബന്ധമുണ്ട്. ഞാൻ സംസാരിക്കും. അദ്ദേഹം എന്റെ പ്രാർഥനകൾ കേൾക്കും.

എന്റെ പ്രാർഥന ദൈവം കേൾക്കുന്നുണ്ട്. അത്രയും കാര്യമായി ഞാൻ സംസാരിക്കുന്നുണ്ട്. അദ്ദേഹം എന്നെ കേൾക്കുന്നുമുണ്ട്. എനിക്ക് ആ ഒരു അനുവാദം മാത്രം മതി. എന്റെ പ്രാർഥന എന്ന് പറഞ്ഞാൽ ദൈവവുമായി നേരിട്ടുള്ള സംസാരങ്ങളാണ്. അതിനിടയിൽ ആരുമില്ല. ഞാൻ സംസാരിക്കുന്നു, അദ്ദേഹം കേൾക്കുന്നു, അത്രയേ ഉള്ളൂ.

തീർച്ചയായും പ്രാർഥിക്കുമ്പോൾ ഞാനെന്റെ ആവശ്യങ്ങൾ പറയും. ഇത്രയും ചെയ്ത് തന്നതിന് നന്ദി പറഞ്ഞു കൊണ്ട് മാത്രമേ ഞാനെന്റെ പ്രാർഥന ആരംഭിക്കാറുള്ളൂ. അതുകഴിഞ്ഞിട്ട് ഞാൻ അത്, ഇത്...എന്റെ ആവശ്യങ്ങളൊക്കെ പറയും. കാരണം എനിക്കറിയാം അദ്ദേഹം എനിക്ക് വേണ്ടി അതൊക്കെ ചെയ്യുമെന്ന്". - സുചിത്ര മോഹൻലാൽ പറഞ്ഞു.