മോദി സര്ക്കാരിനെതിരായ രംഗങ്ങള് ഒരുകാരണവശാലും നീക്കരുത്; ബിജെപിക്കെതിരെ പാ രഞ്ജിത്
വിജയ് ചിത്രം മെര്സലില് നിന്ന് മോദി സര്ക്കാരിനെതിരായ രംഗങ്ങള് നീക്കണം എന്നാവശ്യപ്പെട്ട ബിജെപിക്കെതിരെ സംവിധായകന് പാ രഞ്ജിത്. ഒരു കാരണവശാലും മെര്സലിലെ രംഗങ്ങള് നീക്കം ചെയ്യരുത്. ജനങ്ങള് അനുഭവിക്കുന്ന ബുദ്ധിമുട്ടുകളാണ് സിനിമയില് പ്രതിഫലിക്കുന്നത്. അതില് വിഷമിച്ചിട്ടു കാര്യമില്ല,രഞ്ജിത് പറഞ്ഞു.
ചിത്രത്തിലെ ജിഎസ്ടിയേയും ഡിജിറ്റല് ഇന്ത്യയെക്കുറിച്ചുമുള്ള രംഗങ്ങള് തെറ്റായ സന്ദേശം നല്കുന്നുവെന്നും ഞങ്ങളത് നീക്കാന് ആവശ്യപ്പെടുകയാണ്, വിജയ്യുടെ രാഷ്ട്രീയ താത്പര്യങ്ങളാണ് ഇത്തരം രംഗങ്ങള് സിനിമയില് ഉള്പ്പെടുത്തിയതിന് പിന്നിലെന്നും ആക്ഷേപിച്ച് തമിഴ്നാട് ബിജെപി സംസ്ഥാന പ്രസിഡന്റ് രംഗത്ത് വന്നിരുന്നു.
ജിഎസ്ടിയെയും ഇന്ത്യയിലെ ശിശുമരണങ്ങളെക്കുറിച്ചുമെല്ലാം ശക്തമായി തന്നെ ചിത്രത്തില് വിജയ്യുടെ കഥാപാത്രം വിമര്ശനം ഉന്നയിക്കുന്നുണ്ട്.
ഏഴ് ശതമാനം ജിഎസ്ടി നടപ്പിലാക്കുന്ന സിംഗപ്പൂരില് ജനങ്ങള്ക്ക് ചികിത്സ സൗജന്യമാവുമ്പോള് 28% ജിഎസ്ടി വാങ്ങുന്ന ഇന്ത്യയില് എന്താണ് നടക്കുന്നതെന്ന നായക കഥാപാത്രത്തിന്റെ ഡൈലോഗിന് വലിയ കയ്യടിയാണ് തീയറ്ററുകളില് ലഭിക്കുന്നത്. മോദിയുടെ സ്വപ്ന പദ്ധതി എന്ന് വിശേഷിപ്പിക്കുന്ന ഡിജിറ്റല് ഇന്ത്യയെ വടിവേലുവേെിന്റ കഥാപാത്രം കളിയാക്കുന്നുണ്ട്. ഇതാണ് ബിജെപിയെ പ്രകോപിപ്പിച്ചിരിക്കുന്നത്.
ജിഎസ്ടി നടപ്പാക്കിയതിലെ വീഴ്ചയ്ക്കെതിരേയും നോട്ട് നിരോധനത്തിനെതിരേയും ഉയരുന്ന പ്രതിഷേധങ്ങളെ തടയാന് ബിജെപി പാടുപെടുന്ന അവസ്ഥയിലാണ് വിജയ്യും സിനിമ വഴി വിമര്ശനവുമായി എത്തിയിരിക്കുന്നത്. ആറ്റ്ലി സംവിധാനം ചെയ്ത ചിത്രത്തിന് തീയറ്ററുകളില് നിന്ന് മികച്ച പ്രതികരണമാണ് ലഭിക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
