ദേ ഒരു റോബോട്ട് അല്ലെ ഓടിപ്പോകുന്നത്?; എന്തൊക്കെ മാറ്റങ്ങളാണ് ദുബൈയിൽ സംഭവിക്കുന്നത്! (വിഡിയോ)

ദുബൈ: ഏറ്റവും പുതിയ സാങ്കേതികവിദ്യകളും പുത്തൻ ആശയങ്ങളും അവതരിപ്പിക്കുന്നതിൽ എപ്പോഴും മുന്നിലാണ് യു എ ഇ. എയർ ടാക്സി മുതൽ ഡ്രൈവറില്ലാ വാഹനങ്ങൾ വരെ വാണിജ്യാടിസ്ഥാനത്തിൽ ഉടൻ പ്രവർത്തനം ആരംഭിക്കുമെന്നാണ് അധികൃതർ പറയുന്നത്. ഇപ്പോഴിതാ റോബോട്ടുകളുമായി ബന്ധപ്പെട്ട മേഖലയിലും കഴിവ് തെളിയിക്കാനൊരുങ്ങുകയാണ് രാജ്യം.

ദുബൈ ഫ്യൂച്ചർ ലാബ്സ് യൂണിട്രീ ജി1 എന്ന റോബോട്ടിനെ വികസിപ്പിച്ചെടുത്തിരുന്നു. കഴിഞ്ഞ ദിവസം ദുബൈയിലെ യൂണിയൻ ഹൗസിൽ വെച്ച് യു എ ഇ വൈസ് പ്രസിഡന്റും പ്രധാനമന്ത്രിയുമായാ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ മുന്നിൽ റോബോട്ടിനെ അവതരിപ്പിക്കുകയും ചെയ്തു. ഈ റോബോട്ടിന് മനുഷ്യനെപ്പോലെ തന്നെ നടക്കാനും അതിവേഗം പ്രതികരിക്കാനും സാധിക്കും എന്നതാണ് പ്രത്യേകത.

യൂണിട്രീ ജി1എന്ന ഈ റോബോട്ടിന് 130 സെന്റീമീറ്റർ ഉയരവും 35 കിലോഗ്രാം ഭാരവുമുണ്ട്. ഹ്യൂമനോയിഡ് എന്ന വിഭാഗത്തിൽപ്പെടുന്ന റോബോട്ടും കൂടിയാണ് ഇത്. 8-കോർ ഹൈ-പെർഫോർമൻസ് സി പി യു ഉപയോഗിച്ചാണ് ഇത് നിർമ്മിച്ചിരിക്കുന്നത്. ഡെപ്ത് ക്യാമറ, അത്യാധുനിക സെൻസർ, മൈക്രോഫോൺ സ്പീക്കറുകളും ഇവയിൽ ഘടിപ്പിച്ചിട്ടുണ്ട്. രണ്ട് മണിക്കൂർ തുടർച്ചയായി പ്രവർത്തിക്കാൻ ഇതിന് സാധിക്കും.

കഴിഞ്ഞ ദിവസം പരീക്ഷണാടിസ്ഥാനത്തിൽ ഈ റോബട്ടിനെ ദുബൈയിലൂടെ അധികൃതർ നടത്തി കൊണ്ട് പോകുന്ന ദൃശ്യങ്ങൾ സാമൂഹിക മാധ്യങ്ങളിൽ പ്രചരിച്ചിരുന്നു. സാങ്കേതിക വിദ്യ ഉപയോഗിച്ച് പുതിയ കണ്ടുപിടുത്തങ്ങൾ നടത്തുന്നത് വരും തലമുറക്ക് പ്രചോദനമാകുമെന്നും യു എ ഇയുടെ സാമ്പത്തിക വളർച്ചക്ക് പുതിയ ഊർജ്ജം നൽകുമെന്നും ഷെയ്ഖ് മുഹമ്മദ് പറഞ്ഞു.