പാപ്പർ കോടതികൾ സ്ഥാപിക്കാൻ ഒരുങ്ങി യു എ ഇ

ദുബൈ: യു എ ഇയിൽ പാപ്പർ കോടതികൾ സ്ഥാപിക്കാനുള്ള നടപടി ക്രമങ്ങൾ പൂർത്തിയതായി അധികൃതർ. തിരിച്ചടവിന് ശേഷിയില്ലാതെ പാപ്പരായവരുടെ കേസുകൾ പരിഗണിക്കാനാണ് അബുദാബി ഫെഡറൽ കോടതിക്ക് കീഴിൽ പാപ്പർ കോടതികൾ സ്ഥാപിക്കുന്നത്. രാജ്യത്തെ ഏതെങ്കിലും ഒരു എമിറേറ്റിൽ ഒന്നോ അതിലതികമോ കോടതിയുടെ ശാഖകൾ സ്ഥാപിക്കാനാണ് തീരുമാനം.

അബുദാബി ഫെഡറൽ കോടതിയുടെ അതേ അധികാരം തന്നെയാകും ശാഖകളായി പ്രവർത്തിക്കുന്ന കോടതികൾക്കും ഉണ്ടാകുക. പ്രസിഡന്റിനെയും വിദഗ്ധരായ ജഡ്ജിമാരെയും കോടതി നപടികൾക്കായി ഫെഡറൽ ജുഡീഷ്യറി കൗൺസിൽ നിയമിക്കും.

കോടതിയെ സഹായിക്കാനായി ഈ മേഖലയിൽ വിദഗ്‌ദ്ധരായ ഉപദേശകരെയും നിയമിക്കും. ഇവർ പാപ്പരായവരുടെ ഫണ്ടുകളും ബിസിനസുകളും കൈകാര്യം ചെയ്യുകയും, കേസുമായി ബന്ധപ്പെട്ടുള്ള ആളുകളുമായി ചർച്ച നടത്താനും കോടതി നടപടികൾ വളരെ വേഗത്തിൽ തീർക്കാനും ഇവർ സഹായിക്കും.

പാപ്പരത്ത കോടതി സ്ഥാപിക്കാനുള്ള തീരുമാനം സർക്കാർ അംഗീകരിച്ചതായി നീതിന്യായ മന്ത്രി അബ്ദുള്ള സുൽത്താൻ ബിൻ അവാദ് അൽ നുഐമി അറിയിച്ചു. പുതിയ തീരുമാനം സാമ്പത്തിക മേഖലയുടെ വളർച്ചയ്ക്കും,സാമ്പത്തിക ഭദ്രത ഉറപ്പു വരുത്താനും സാധിക്കുമെന്ന് വിദഗ്‌ദ്ധർ അഭിപ്രായപ്പെട്ടു.