എല്‍പിജി ബുക്കിങ് നിയന്ത്രണം നീക്കി, പാര്‍ട്ടി സസ്‌പെന്‍ഡ് ചെയ്തയാളെ പിഎ ആക്കണമെന്ന് രമ്യ, ചരിത്രം കുറിച്ച് ഇഷാന്‍; ഇന്നത്തെ 5 പ്രധാന വാര്‍ത്തകള്‍

ഗാര്‍ഹിക ഉപഭോക്താക്കള്‍ക്ക് ആശ്വാസമായി എല്‍പിജി ബുക്കിങ് നിയന്ത്രണം നീക്കി. ചിറയിൻകീഴിലെ കയ്യാങ്കളിയെത്തുടർന്ന് കോൺഗ്രസിൽനിന്ന് സസ്പെൻഡ് ചെയ്യപ്പെട്ട പാളയം പ്രദീപിനെ സംരക്ഷിക്കാൻ വീണ്ടും പരസ്യനീക്കവുമായി രമ്യ ഹരിദാസ് എംഎൽഎ. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം.

എല്‍പിജി ബുക്കിങ് നിയന്ത്രണം കേന്ദ്രസര്‍ക്കാര്‍ നീക്കി. ഗ്രാമപ്രദേശങ്ങളില്‍ എല്‍പിജി ബുക്കിങ്ങിന് 45 ദിവസത്തെ ഇടവേള വേണമെന്ന നിയന്ത്രണമാണ് നീക്കിയത്. പാചകവാതക സിലിണ്ടര്‍ വിതരണം മെച്ചപ്പെട്ട സാഹചര്യത്തിലാണ് കേന്ദ്ര പെട്രോളിയം പ്രകൃതി വാതക മന്ത്രാലയത്തിന്റെ തീരുമാനം. നഗര-ഗ്രാമ വ്യത്യാസമില്ലാതെ 25 ദിവസത്തെ ഇടവേളയില്‍ ഇനി എല്‍പിജി ബുക്ക് ചെയ്യാവുന്നതാണെന്ന് കേന്ദ്രം അറിയിച്ചു. 

ചിറയിൻകീഴിലെ കയ്യാങ്കളിയെത്തുടർന്ന് കോൺഗ്രസിൽനിന്ന് സസ്പെൻഡ് ചെയ്യപ്പെട്ട പാളയം പ്രദീപിനെ സംരക്ഷിക്കാൻ വീണ്ടും പരസ്യനീക്കവുമായി രമ്യ ഹരിദാസ് എംഎൽഎ. പാളയം പ്രദീപിനെ തന്റെ അഡീഷണൽ പേഴ്സണൽ അസിസ്റ്റന്റായി (പിഎ) മുൻകാല പ്രാബല്യത്തോടെ നിയമിക്കണമെന്ന് ആവശ്യപ്പെട്ട് രമ്യ നിയമസഭാ സെക്രട്ടറിയുടെ ഓഫീസിൽ കത്ത് നൽകി. 2026 മെയ് 21 മുതൽ മുൻകാല പ്രാബല്യത്തോടെ പ്രദീപിന് നിയമനം നൽകണമെന്നാണ് ആവശ്യം.

ദേശീയപാതയുടെ സുരക്ഷ പരിശോധിക്കണമെന്ന് മുഖ്യമന്ത്രി വി ഡി സതീശന്‍. ഇക്കാര്യം ചൂണ്ടിക്കാട്ടി കേന്ദ്ര ഉപരിതല ഗതാഗത മന്ത്രി നിതിന്‍ ഗഡ്കരിക്ക് മുഖ്യമന്ത്രി കത്തയച്ചു. തൃശൂര്‍ കൈപ്പമംഗലം വാഹനാപകടത്തിന്റെ പശ്ചാത്തലത്തിലാണ് മുഖ്യമന്ത്രി കത്തയച്ചിരിക്കുന്നത്. ദേശീയ പാതയില്‍ വാഹനങ്ങളുടെ അശാസ്ത്രീയവും നിയമവിരുദ്ധവുമായ പാര്‍ക്കിംഗ് തടയുന്നതിന് കര്‍ശന നിയന്ത്രണം ഏര്‍പ്പെടുത്തണം. മുന്നറിയിപ്പ് സംവിധാനങ്ങള്‍ വേണമെന്നും മുഖ്യമന്ത്രി ആവശ്യപ്പെട്ടു. 

പിറന്നാൾ ദിവസം മാസ് ആക്ഷൻ വരവിൽ സോഷ്യൽ മീഡിയയിൽ പൂരമൊരുക്കുകയാണ് മലയാളത്തിന്റെ മമ്മൂക്ക. അധികാരപരിധി തീരും വരെ അവൻ ഭരിക്കുകയും അനുഭവിക്കുകയും ചെയ്യും എന്ന ഡയലോഗ് ഓർമ്മിപ്പിക്കും വിധം മിനുക്കിയെടുക്കുന്ന മമ്മൂട്ടിക്കാലം. നായകനോ വില്ലനോ, നല്ലവനോ കെട്ടവനോ, മമ്മൂട്ടി എന്ന മെഗാസ്റ്റാർ അതിരുകൾ ലംഘിച്ച് കടന്നുചെല്ലുന്ന കഥാപാത്രങ്ങൾക്ക് സ്വാഭാവികതയുടെ സ്വാഗുണ്ട്. ആയാസമില്ലാത്ത ഹീറോയിസമുണ്ട്. എഴുപത്തിയഞ്ചാം വയസ്സിലും രുചിയറിഞ്ഞൊരുക്കുന്ന വിഷ്വൽ ട്രീറ്റുകളാണ് കാലത്തിനപ്പുറത്തേക്ക് ആ താരശോഭ പടർത്തുന്നത്.

ഇഷാന്‍ കിഷന്റെ തകര്‍പ്പന്‍ ഇരട്ട സെഞ്ച്വറിയുടെയും കുമാര്‍ കുഷാഗ്രയുടെ സെഞ്ച്വറിയുടെയും കരുത്തില്‍, ദുലീപ് ട്രോഫി ഫൈനലില്‍ സൗത്ത് സോണിനെതിരെ ഈസ്റ്റ് സോണിന് കൂറ്റന്‍ സ്‌കോര്‍. 708 റണ്‍സിന് ഈസ്റ്റ് സോണ്‍ പുറത്തായതോടെ രണ്ടാം ദിവസത്തെ മത്സരം അവസാനിപ്പിച്ചു. 250 റണ്‍സുമായി റിട്ടയേഡ് ഹര്‍ട്ടായ ഇഷാന്‍, പിന്നീട് ക്രീസിലേക്ക് മടങ്ങിയെത്തി 20 റണ്‍സ് കൂടി കൂട്ടിച്ചേര്‍ത്തു. ദുലീപ് ട്രോഫി ഫൈനലില്‍ ഇരട്ട സെഞ്ച്വറി നേടുന്ന ആദ്യ വിക്കറ്റ് കീപ്പിങ് ബാറ്ററാണ് ഇഷാന്‍ കിഷന്‍.