കണ്ണൂര്: ബിജെപി-ആര്എസ്എസ് പ്രവര്ത്തകരായ വിജിത്ത്, ഷിനോജ് എന്നിവരെ ന്യൂമാഹിയില് ബൈക്ക് തടഞ്ഞുനിര്ത്തി ബോംബെറിഞ്ഞ് വെട്ടിക്കൊലപ്പെടുത്തിയ കേസില് എല്ലാ പ്രതികളെയും കോടതി വെറുതെ വിട്ടു. തലശ്ശേരി അഡീഷണല് ജില്ല സെഷന്സ് കോടതിയുടെതാണ് വിധി. തെളിവുകളില്ലെന്ന് ചൂണ്ടിക്കാട്ടിയാണ് ഉത്തരവ്. കേസില് പതിനഞ്ച് വര്ഷത്തിന് ശേഷമാണ് കോടതി വിധി പറഞ്ഞത്
ടിപി ചന്ദ്രശേഖരന് കൊലക്കേസില് ശിക്ഷിക്കപ്പെട്ട് ജയിലില് കഴിയുന്ന കൊടി സുനി, മുഹമ്മദ് ഷാഫി, ഷിനോജ് എന്നിവര് ഉള്പ്പെടെ 16 സിപിഎം പ്രവര്ത്തകരാണ് കേസിലെ പ്രതികള്. ഇതില് രണ്ടുപേര് വിചാരണക്കിടെ മരിച്ചു. ഈ കേസില് കുറ്റപത്രത്തില് ആരോപിക്കപ്പെട്ട കുറ്റങ്ങളൊന്നും സംശായതീതമായി തെളിയിക്കാനായില്ലെന്നതിന്റെ അടിസ്ഥാനത്തില് മുഴുവന് പ്രതികളെയും കുറ്റക്കാരല്ലെന്ന് കണ്ട് വെറുതെ വിടുകയായിരുന്നെന്ന് പ്രതികള്ക്ക് വേണ്ടി ഹാജരായ അഭിഭാഷകന് സികെ ശ്രീധരന് മാധ്യമങ്ങളോട് പറഞ്ഞു.
ജനുവരി 22-നാണ് കേസില് വിചാരണ തുടങ്ങിയത്. ജൂലായില് സാക്ഷിവിസ്താരം പൂര്ത്തിയായി. 63 തൊണ്ടിമുതലും 140 രേഖകളും ഹാജരാക്കി. പ്രോസിക്യൂഷന് 44 സാക്ഷികളെയും പ്രതിഭാഗം രണ്ടു സാക്ഷികളെയും വിസ്തരിച്ചു. കൊല്ലപ്പെട്ട ഷിനോജിന്റെ പൊലീസ് സ്റ്റേഷനിലുള്ള ബൈക്ക് വിചാരണ തുടങ്ങിയ ദിവസം കോടതിയില് ഹാജരാക്കി. വിചാരണ തുടങ്ങുമ്പോള് പരോളിലായിരുന്ന കൊടി സുനി കോടതി അനുമതിയോടെയാണ് വിചാരണയ്ക്ക് ഹാജരായത്. കോഴിക്കോട്, കണ്ണൂര് ജില്ലകളില് പ്രവേശിക്കരുതെന്ന ഉപാധിയോടെയായിരുന്നു പരോള്. നാലാംപ്രതി മുഹമ്മദ് ഷാഫി, 13-ാംപ്രതി ഷിനോജ് എന്നിവര് കണ്ണൂര് സെന്ട്രല് ജയിലില്നിന്നാണ് വിചാരണയ്ക്കെത്തിയത്.
2010 മേയ് 28-ന് രാവിലെ 11-ന് ന്യൂമാഹി പെരിങ്ങാടി റോഡില് കല്ലായില്വെച്ചായിരുന്നു കൊലപാതകം.മാഹി കോടതിയില് ഹാജരായി തിരിച്ചുവരുമ്പോള് ബൈക്ക് തടഞ്ഞുനിര്ത്തി ബോംബെറിഞ്ഞ് വെട്ടിക്കൊലപ്പെടുത്തിയെന്നാണ് കേസ്. വിജിത്തിന്റെ അമ്മ രാജമ്മ ഹൈക്കോടതിയെ സമീപിച്ചതിനെത്തുടര്ന്നാണ് കേസില് സ്പെഷ്യല് പ്രോസിക്യൂട്ടറെ നിയമിച്ചത്. പള്ളൂര് കോയ്യോട് തെരുവിലെ ടി സുജിത്ത് (36), മീത്തലെച്ചാലില് എന്കെ സുനില്കുമാര് (കൊടി സുനി-40), നാലുതറയിലെ ടി.കെ.സുമേഷ് (43), ചൊക്ലി പറമ്പത്ത് ഹൗസില് കെകെ മുഹമ്മദ് ഷാഫി (39), പള്ളൂരിലെ ടിപി ഷമില് (37), കവിയൂരിലെ എ.കെ.ഷമ്മാസ് (35), ഈസ്റ്റ് പള്ളൂരിലെ കെ.കെ.അബ്ബാസ് (35), ചെമ്പ്രയിലെ രാഹുല് (33), നാലുതറ കുന്നുമ്മല്വീട്ടില് വിനീഷ് (44), നാലുതറ പടിഞ്ഞാറെപാലുള്ളതില് പി.വി.വിജിത്ത് (40), പള്ളൂര് കിണറ്റിങ്കല് കെ.ഷിനോജ് (36), ന്യൂമാഹി അഴീക്കല് മീത്തലെ ഫൈസല് (42), ഒളവിലം കാട്ടില് പുതിയവീട്ടില് സരീഷ് (40), ചൊക്ലി തവക്കല് മന്സില് ടി.പി.സജീര് (38) എന്നിവരാണ് പ്രതികള്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
