വാണിയംകുളത്ത് തെരുവുനായ ആക്രമണം; 7 ആടുകളെ കടിച്ചു കൊന്നു

പാലക്കാട് : വാണിയംകുളത്ത് തെരുവുനായ സ്വകാര്യ വ്യക്തിയുടെ 7 ആടുകളെ കടിച്ചു കൊന്നു. ഇന്ന് പുലർച്ചെ 4 മണിയോടെയാണ് സംഭവം. വാണിയംകുളം കോതയൂർ ചൂരക്കോട്ടിൽ അയ്യപ്പൻ്റെ വീട്ടിലെ ആടുകളെയാണ് കടിച്ച് കൊന്നത്.

ഗർഭിണികളായ 3 വലിയ ആടുകളെയും 3 ചെറിയ ആടുകളെയും ആണ് കൂട്ടിൽ കടിച്ച് കൊന്ന നിലയിൽ കണ്ടത്. ഒരു ആട്ടിൻകുട്ടിയെ തെരുവു നായ കടിച്ച് കൊണ്ടുപോവുകയും ചെയ്തു.18 ആടുകൾ ഉണ്ടായിരുന്ന കൂട്ടിൽ 5 ആടുകൾക്ക് തെരുവു നായയുടെ ആക്രമണത്തിൽ പരിക്കേറ്റിട്ടുണ്ട്. വെറ്ററിനറി ഡോക്ടർ എത്തി പരിക്കേറ്റ ആടുകൾക്ക് ചികിത്സ നൽകി.

മാസങ്ങൾക്ക് മുൻപ് അയ്യപ്പൻ്റെ തന്നെ 6 ആടുകളെ തെരുവു നായ കടിച്ച് കൊന്നിരുന്നു. കൂടാതെ 15 ദിവസം മുൻപ് ഇയാളുടെ തന്നെ പശു ഫാമിലെ 2 പശുക്കളെയും തെരുവു നായ കടിച്ച് കൊന്നിരുന്നു. ക്ഷീര കർഷകനായ അയ്യപ്പൻ്റെ പ്രധാന വരുമാന മാർഗമാണിത്. ഏകദേശം ഒരു ലക്ഷം രൂപയോളം നഷ്‌ടം വന്നതായി അയ്യപ്പൻ പറഞ്ഞു.

കഴിഞ്ഞ ദിവസങ്ങളിൽ ചെട്ടിത്തൊടിയിൽ വിജേഷിൻ്റെ 2 പശുക്കളെയും, എടക്കോട് സ്വദേശി പ്രഭയുടെ 2 പശുക്കളെയും തെരുവു നായ കടിച്ച് കൊന്നിരുന്നു. പ്രദേശത്തെ തെരുവു നായ ശല്യം പരിഹരിക്കാൻ നടപടി സ്വീകരിക്കണമെന്ന് വാർഡ് മെമ്പർ ജയശ്രീ പറഞ്ഞു. പഞ്ചായത്ത് വൈസ് പ്രസിഡൻ്റ് കെ.കൃഷ്ണകുമാർ ഉൾപ്പെടെയുള്ള പഞ്ചായത്ത് അധികൃതർ സ്ഥലം സന്ദർശിച്ചു.