ഒരു താരത്തിനു തന്നെ 3 മഞ്ഞ കാർഡ്! ലോകകപ്പ് ഫിഫയുടെ 'കള്ളക്കളിയോ'?

ഫിഫ ലോകകപ്പ് സ്ക്രിപ്റ്റഡ് അല്ലെങ്കിൽ 'റി​ഗ്ഗിങ്' ആണെന്ന വിവാദം കത്തുകയാണല്ലോ. ഏതാണ്ട് ഫിഫ ലോകകപ്പ് തുടങ്ങിയ കാലം മുതൽക്കു തന്നെ പഞ്ഞമില്ലാതെ ഉയർന്നു വന്ന വിവാ​ദങ്ങളും നിരവധിയാണ്. റിഗ്ഗിങ് വിവാ​ദം ഫിഫയ്ക്ക് പുത്തരിയല്ലെന്നു ചുരുക്കം. അർജന്റീന- ഈജിപ്ത് മത്സരത്തിലെ വിവാ​ദ റഫറിയിങാണല്ലോ ഇത്തവണ വിവാദം കൂടുതൽ കത്തിച്ചത്. സമാന ആരോപണം അർജന്റീനയ്ക്കെതിരെ കഴിഞ്ഞ ലോകകപ്പിലും ഉയർന്നിരുന്നു. അന്ന് ലൂയീസ് വാൻ ​ഗാൽ എന്ന നെതർലൻഡ്സ് പരിശീലകനാണ് ഈ ലോകകപ്പ് മെസിക്കും അർജന്റീനയ്ക്കും നൽകാൻ ഫിഫ തീരുമാനിച്ചിട്ടുണ്ടെന്ന വിവാദ​ പരാമർശം നടത്തിയത്. അർജന്റീനയോടു ക്വാർട്ടറിൽ നെതർലൻഡ്സ് തോറ്റതിനു പിന്നാലെയാണ് വാൻ ​ഗാലിന്റെ ഈ വിവാ​ദ പരാമർശം. സമാന ആരോപണമാണ് ഈജിപ്ത് പരിശീലകൻ ഹോസം ഹസമും കഴിഞ്ഞ ദിവസം ഉന്നയിച്ചത്.

വിജയികളെ ഫിഫ നേരത്തെ തന്നെ തീരുമാനിച്ചിട്ടുണ്ടാകുമെന്നും അതിനായുള്ള തിരക്കഥയിലെ നടൻമാരാണ് റഫറി അടക്കമുള്ള ഒഫീഷ്യൽസുമെന്ന ​ഗൂഢാലോചന സിദ്ധാന്തം പല തവണ കേട്ടിട്ടുണ്ട്. ഇക്കാര്യത്തിൽ തെളിവുകളൊന്നും കാര്യമായി ആരും വെളിപ്പെടുത്തിയിട്ടില്ല. ചിലർ ഈ ​ഗൂഢാലോചന സിദ്ധാന്തത്തെ പിന്തുണയ്ക്കുന്നവരാണ്. 1998ൽ ഫ്രാൻസ് ആദ്യമായി ലോകകപ്പ് സ്വന്തമാക്കിയതടക്കം ഈ റി​ഗ്​ഗിങ് വിവാ​ദത്തിലുണ്ട്.

പ്ലാറ്റിനിയുടെ വെളിപ്പെടുത്തൽ

ഈ വിവാ​ദത്തിനു ശക്തിപകരുന്ന ഒരു വെളിപ്പെടുത്തൽ ഫ്രാൻസ് ഇതിഹാസവും പിന്നീട് യുവേഫ അധ്യക്ഷനായി വന്ന് അഴിമതിയിൽ പുറത്താകുകയും ചെയ്ത മിഷേൽ പ്ലാറ്റിനിയുടെ വെളിപ്പെടുത്തലായിരുന്നു.

1998 ലോകകപ്പ് നറുക്കെടുപ്പിൽ 'ചെറിയ ഒത്തുകളി' നടന്നുവെന്ന് മിഷേൽ പ്ലാറ്റിനിയുടെ വെളിപ്പെടുത്തൽ 2018ലാണ് വന്നത്. ആതിഥേയരായ ഫ്രാൻസും നിലവിലെ ചാംപ്യന്മാരായ ബ്രസീലും ഫൈനലിന് മുമ്പ് പരസ്പരം ഏറ്റുമുട്ടുന്നില്ല എന്ന് ഉറപ്പാക്കാൻ 1998 ലെ ഫിഫ ലോകകപ്പ് നറുക്കെടുപ്പിൽ 'ചെറിയൊരു തന്ത്രം' ഉപയോഗിച്ചിരുന്നു എന്ന് വെളിപ്പെടുത്തിക്കൊണ്ട് 2018ൽ മിഷേൽ പ്ലാറ്റിനി വലിയൊരു വിവാദത്തിന് തിരികൊളുത്തി. 1998ലെ ലോകകപ്പ് ഓർഗനൈസിങ് കമ്മിറ്റിയുടെ സഹ അധ്യക്ഷനായിരുന്ന പ്ലാറ്റിനി, 'ഫ്രാൻസ് ബ്ലൂ' റേഡിയോയ്ക്ക് നൽകിയ അഭിമുഖത്തിലാണ് ഈ കാര്യം വ്യക്തമാക്കിയത്. ഇരു ടീമുകളും തങ്ങളുടെ ഗ്രൂപ്പുകളിൽ ഒന്നാം സ്ഥാനത്ത് എത്തിയാൽ, നോക്കൗട്ട് ഘട്ടത്തിൽ അവർക്ക് പരസ്പരം വരാത്ത രീതിയിൽ പട്ടികയുടെ ഇരുവശങ്ങളിലായി മാറ്റാൻ സംഘാടകർ ചില 'തന്ത്രങ്ങൾ' പ്രയോഗിച്ചുവെന്നാണ് അദ്ദേഹം വെളിപ്പെടുത്തിയത്.

സ്വന്തം രാജ്യത്തെ ടീം പരമാവധി മുന്നോട്ട് പോകാൻ സഹായിക്കുന്നതിനായി ആതിഥേയ രാജ്യങ്ങൾ പലപ്പോഴും നറുക്കെടുപ്പുകളിൽ ഇത്തരം കൃത്രിമങ്ങൾ കാണിക്കാറുണ്ട് എന്ന് പ്ലാറ്റിനി സമ്മതിച്ചെങ്കിലും, അദ്ദേഹത്തിന്റെ ഈ പ്രസ്താവന ആഗോളതലത്തിൽ വലിയ ചർച്ചകൾക്കും സംവാദങ്ങൾക്കും കാരണമായി. എന്നാൽ അക്കാലത്ത് ഫിഫയുടെ ജനറൽ സെക്രട്ടറിയായിരിക്കുകയും മാഴ്സെയിൽ വെച്ച് നടന്ന ഔദ്യോഗിക നറുക്കെടുപ്പിന് നേതൃത്വം നൽകുകയും ചെയ്ത സെപ്പ് ബ്ലാറ്റർ, പ്ലാറ്റിനിയുടെ ഈ വാദങ്ങളെ തള്ളിപ്പറഞ്ഞു. അവിടെ അഴിമതിയൊന്നും നടന്നിട്ടില്ലെന്നും, ടൂർണമെന്റിന്റെ ആതിഥേയരെയും നിലവിലെ ചാംപ്യന്മാരെയും നറുക്കെടുപ്പിൽ രണ്ട് വ്യത്യസ്ത ഭാഗങ്ങളിലേക്ക് മാറ്റുന്നത് ഫിഫയുടെ സാധാരണമായ ഒരു നടപടിക്രമം മാത്രമായിരുന്നു എന്നുമാണ് ബ്ലാറ്റർ വാദിച്ചത്.

എന്തായാലും, ആ ലോകകപ്പിൽ ഫ്രാൻസും ബ്രസീലും തങ്ങളുടെ ഗ്രൂപ്പുകളിൽ ഒന്നാം സ്ഥാനത്ത് എത്തുകയും വിജയകരമായി മുന്നേറി ഫൈനലിൽ ഏറ്റുമുട്ടുകയും ചെയ്തു. ഫൈനലിൽ ബ്രസീലിനെ 3-0 ന് പരാജയപ്പെടുത്തിക്കൊണ്ടാണ് ഫ്രാൻസ് തങ്ങളുടെ ചരിത്രത്തിലെ ആദ്യത്തെ ലോകകപ്പ് കിരീടം സ്വന്തമാക്കിയത്.

ഇത്തരത്തിൽ മുൻപും നിരവധി വിവാദങ്ങൾ ലോകകപ്പിലുണ്ടായിട്ടുണ്ട്. ഫുട്ബോൾ ചരിത്രത്തിലെ ഏറ്റവും മികച്ച ചില നിമിഷങ്ങൾക്ക് ലോകകപ്പ് സാക്ഷ്യം വഹിച്ചിട്ടുണ്ടെങ്കിലും വിവാദങ്ങളിൽ നിന്നു ലോകകപ്പ് ഒരിക്കലും മുക്തമായിരുന്നില്ല. ഡീഗോ മാറഡോണ മുതൽ 2018ൽ റഷ്യയ്ക്കും 2022-ൽ ഖത്തറിനും ടൂർണമെന്റ് അനുവദിച്ചതു വരെ, ലോകകപ്പ് എണ്ണമറ്റ തർക്ക വിഷയങ്ങൾ സൃഷ്ടിച്ചിട്ടുണ്ട്. അത്തരത്തിൽ ലോകകപ്പിനിടെ നടന്ന വലിയ വിവാദങ്ങൾ ഇവയാണ്.

ഫ്രാൻസിനെതിരെ ഇറ്റലിയുടെ ഫാസിസം (1938)

ഫ്രാൻസിനെതിരായ ക്വാർട്ടർ ഫൈനൽ മത്സരത്തിൽ ഇറ്റലിക്ക് വെള്ള കിറ്റ് ധരിക്കേണ്ടി വന്നു. കാരണം ഫ്രാൻസ് നീല കിറ്റായിരുന്നു ധരിച്ചിരുന്നത്, കൂടാതെ അവർ ആതിഥേയരുമായിരുന്നു. എന്നാൽ ബെനിറ്റോ മുസ്സോളിനിയുടെ ഉത്തരവിനെ തുടർന്ന് ഇറ്റാലിയൻ കളിക്കാർ കറുത്ത കിറ്റ് ധരിച്ചാണ് മൈതാനത്തേക്ക് വന്നത്. കറുപ്പ് നിറം അക്കാലത്തെ കുപ്രസിദ്ധമായ ഇറ്റാലിയൻ ഫാസിസ്റ്റ് പാരാമിലിട്ടറിയുടെ പ്രതീകമായിരുന്നു. ഇത് ഫാസിസ്റ്റ് ഇറ്റലിയെ വെറുത്തിരുന്ന ഫ്രഞ്ച് കാണികളെ കൂടുതൽ പ്രകോപിപ്പിച്ചു. മത്സരത്തിൽ ഇറ്റലി 3-1 ന് വിജയിക്കുകയും ആ വർഷത്തെ ലോകകപ്പ് നേടുകയും ചെയ്തു.

ബാറ്റിൽ ഓഫ് സാന്റിയാഗോ (1962)

ടൂർണമെന്റ് ചരിത്രത്തിലെ ഏറ്റവും കുപ്രസിദ്ധമായ മത്സരങ്ങളിൽ ഒന്നായ 'ബാറ്റിൽ ഓഫ് സാന്റിയാഗോ' 1962ൽ ചിലിയും ഇറ്റലിയും തമ്മിലാണ് നടന്നത്. ചിലിയിലെ സാന്റിയാഗോ നഗരം 9.5 റിക്ടർ സ്കെയിൽ രേഖപ്പെടുത്തിയ ഭൂകമ്പത്തിൽ നിന്ന് കരകയറുന്നതേ ഉണ്ടായിരുന്നുള്ളൂ. ആ സമയത്ത് ഇറ്റാലിയൻ മാധ്യമപ്രവർത്തകർ സാന്റിയാഗോയെ ഒരു 'ചവറ്റുകുട്ട' എന്ന് വിളിച്ചത് ഇരുരാജ്യങ്ങളും തമ്മിൽ കടുത്ത പിരിമുറുക്കത്തിന് കാരണമായി. മത്സരത്തിൽ ഇരുപക്ഷവും പരസ്പരം ക്രൂരമായി ആക്രമിക്കാൻ തുടങ്ങി. ആദ്യ ഫൗൾ കളി തുടങ്ങി 12ാം സെക്കൻഡിലും, ആദ്യത്തെ പുറത്താക്കൽ 12ാം മിനിറ്റിലുമായിരുന്നു. ഇടിയും ചവിട്ടും കടുത്ത വഴക്കുകളും കാരണം മത്സരത്തിനിടെ മൂന്ന് തവണയാണ് പൊലീസ് ഇടപെടേണ്ടി വന്നത്. ഈ മത്സരത്തിൽ ചിലി 2-0 ന് വിജയിച്ചു.

ലോകകപ്പ് ട്രോഫി മോഷ്ടിക്കപ്പെടുന്നു (1966)

ഇംഗ്ലണ്ടിൽ ലോകകപ്പ് ടൂർണമെന്റ് ആരംഭിക്കുന്നതിന് നാല് മാസം മുമ്പ്, വെസ്റ്റ്മിൻസ്റ്റർ സെൻട്രൽ ഹാളിലെ ഒരു പൊതു പ്രദർശനത്തിനിടെ ലോകകപ്പ് ട്രോഫി (ജൂൾസ് റിമെറ്റ് ട്രോഫി) മോഷ്ടിക്കപ്പെട്ടു. 24 മണിക്കൂറും സുരക്ഷയുണ്ടായിരുന്നിട്ടും നടന്ന ഈ മോഷണം വലിയ ജനരോഷത്തിന് കാരണമായി. മോഷണം നടത്തിയവർ 15,000 പൗണ്ട് മോചനദ്രവ്യമായി ആവശ്യപ്പെട്ടു. ലണ്ടൻ പൊലീസ് മുഴുവൻ അന്വേഷണത്തിൽ ഏർപ്പെട്ടെങ്കിലും, ഒടുവിൽ 'പിക്ലസ്' എന്നു പേരുള്ള ഒരു വളർത്തു നായയാണ് ലണ്ടനിലെ ഒരു തോട്ടത്തിൽ പേപ്പറിൽ പൊതിഞ്ഞ നിലയിൽ ട്രോഫി കണ്ടെത്തിയത്.‌

ഇംഗ്ലണ്ട്- പശ്ചിമ ജർമനി (1966 ഫൈനൽ)

1966ലെ ലോകകപ്പ് ഫൈനലിൽ ഇംഗ്ലണ്ടും പശ്ചിമ ജർമനിയും തമ്മിലുള്ള മത്സരത്തിലാണ് ലോകകപ്പ് ചരിത്രത്തിലെ മറ്റൊരു വലിയ വിവാദ നിമിഷം ഉണ്ടായത്. 101ാം മിനിറ്റിൽ ഇംഗ്ലണ്ട് സ്‌ട്രൈക്കർ ജിയോഫ് ഹർസ്റ്റ് തൊടുത്ത ഷോട്ട് ക്രോസ്ബാറിൽ തട്ടി താഴേക്ക് പതിച്ച് ഗോൾ ലൈനിന് പുറത്തേക്ക് തെറിച്ചു. പന്ത് ലൈൻ കടന്നോ എന്ന കാര്യത്തിൽ സ്വിസ് റഫറി ഗോട്ട്ഫ്രൈഡ് ഡീസ്റ്റിന് ഉറപ്പില്ലായിരുന്നു. എന്നാൽ സോവിയറ്റ് ലൈൻസ്‌മാൻ ടോഫിക് ബഖ്‌റമോവ് അത് ഗോൾ ആണെന്ന് സിഗ്നൽ നൽകിയതോടെ ഇംഗ്ലണ്ട് 3-2 ന് മുന്നിലെത്തി. അത് ഗോൾ ആയിരുന്നോ അതോ അല്ലായിരുന്നോ എന്ന തർക്കം ഇപ്പോഴും ഫുട്ബോൾ ലോകത്തെ ഭിന്നിപ്പിച്ചു തീർ‌പ്പാകാതെ നിൽക്കുന്നു.

അന്നും അർജന്റീനയ്ക്ക് വേണ്ടി? (1978)

ജനറൽ ജോർജ്ജ് റാഫേൽ വിദേലയുടെ സൈനിക സ്വേച്ഛാധിപത്യ ഭരണത്തിന്റെ സ്വാധീനത്താൽ അർജന്റീനയുടെ ആദ്യ ലോകകപ്പ് വിജയം ഒത്തുകളിയാണെന്ന് പലരും വിശ്വസിക്കുന്നു. അർജന്റീനയിൽ വെച്ച് നടന്ന ഈ ടൂർണമെന്റിൽ ഇത്തരമൊരു നിഗമനത്തിലേക്ക് നയിക്കുന്ന പല സംഭവങ്ങളും ഉണ്ടായി. ഉദാഹരണത്തിന്, രണ്ടാം റൗണ്ട് ഗ്രൂപ്പ് ഘട്ടത്തിലെ അവസാന മത്സരത്തിൽ ബ്രസീലിന് പകരം ഫൈനലിൽ കടക്കാൻ അർജന്റീനയ്ക്ക് പെറുവിനെതിരെ നാല് ഗോളുകളുടെ വ്യത്യാസത്തിൽ ജയിക്കേണ്ടിയിരുന്നു. എന്നാൽ അർജന്റീന 6-0 എന്ന സ്കോറിനാണ് ആ മത്സരത്തിൽ വിജയിച്ചത്. ഇത് വ്യാപകമായി ഒത്തുകളിയാണെന്ന് ആരോപിക്കപ്പെടുന്നു. പെറു ഗോൾകീപ്പർ റാമോൺ 'എൽ ലോക്കോ' ക്വിറോഗ അർജന്റീനയിലാണ് ജനിച്ചത് എന്നതും ഈ സംശയങ്ങൾക്ക് ആക്കം കൂട്ടി.

തുടർന്ന് നെതർലൻഡ്‌സിനെതിരായ ഫൈനലിൽ ഡച്ച് ടീമിനെ സ്റ്റേഡിയത്തിലേക്ക് വരാൻ നീണ്ട റൂട്ട് എടുപ്പിച്ചു. കൂടാതെ അർജന്റീന ടീം വരുന്നതിന് 10 മിനിറ്റ് മുമ്പ് അവരെ മൈതാനത്തിറക്കി. ഇത് കാരണം ഡച്ച് കളിക്കാർക്ക് 70,000 വരുന്ന അർജന്റീനിയൻ ആരാധകരുടെ കടുത്ത ശത്രുത നേരിടേണ്ടി വന്നു. കളി കടുത്തതായിരുന്നു എങ്കിലും മിക്ക തീരുമാനങ്ങളും ആതിഥേയർക്ക് അനുകൂലമായിരുന്നു. ഒടുവിൽ അവർ 3-1 ന് വിജയികളായി.

അൾജീരിയയ്‌ക്കെതിരെ പശ്ചിമ ജർമ്മനി ഓസ്ട്രിയ ഒത്തുകളി (1982)

'ആന്റി ഫുട്ബോൾ' എന്ന പേരിൽ പ്രശസ്തമായ മത്സരമാണിത്. തങ്ങളുടെ ആദ്യ ലോകകപ്പ് കളിക്കുന്ന അൾജീരിയ ശക്തരായ പശ്ചിമ ജർമനിയെ 2-1 ന് തോൽപ്പിച്ച് ലോകത്തെ ഞെട്ടിച്ചിരുന്നു. അവർ അടുത്ത ഘട്ടത്തിലേക്ക് കടക്കാനുള്ള വലിയ സാധ്യതയിലായിരുന്നു. എന്നാൽ അവസാന ഗ്രൂപ്പ് മത്സരങ്ങൾ വ്യത്യസ്ത സമയങ്ങളിലാണ് നടന്നിരുന്നത്. അതിനാൽ 1-0 ന് ജയിച്ചാൽ തങ്ങൾക്കും ഓസ്ട്രിയയ്ക്കും അടുത്ത റൗണ്ടിലേക്ക് കടക്കാമെന്നും അൾജീരിയ പുറത്താകുമെന്നും പശ്ചിമ ജർമ്മനിക്ക് അറിയാമായിരുന്നു.

കളി തുടങ്ങി പത്താം മിനിറ്റിൽ ഹോർസ്റ്റ് ഹ്രുബേഷിലൂടെ ജർമനി ഗോൾ നേടി. തുടർന്ന് ഇരു ടീമുകളും ആ സ്കോർ നിലനിർത്താൻ വേണ്ടി മത്സരത്തിലുടനീളം ഒന്നും ചെയ്യാതെ സമയം കളഞ്ഞു. അൾജീരിയ പരാതിപ്പെട്ടെങ്കിലും ഫലമുണ്ടായില്ല, അവർ ടൂർണമെന്റിൽ നിന്ന് പുറത്തായി. ഈ സംഭവത്തിന് ശേഷമാണ് ലോകകപ്പിലെ അവസാന ഗ്രൂപ്പ് മത്സരങ്ങൾ എല്ലാം ഒരേ സമയം നടത്തുന്ന രീതിയിലേക്ക് മാറ്റിയത്.

ഹരാൾഡ് ഷൂമാക്കർ പാട്രിക് ബാറ്റിസ്റ്റണെ വീഴ്ത്തുന്നു (1982)

പശ്ചിമ ജർമനിയും ഫ്രാൻസും തമ്മിലുള്ള ലോകകപ്പ് സെമിഫൈനലിനിടെ, പകരക്കാരനായി ഇറങ്ങിയ ഫ്രഞ്ച് താരം ബാറ്റിസ്റ്റൺ ജർമൻ പെനാൽറ്റി ബോക്സിലേക്ക് വന്ന പന്ത് ലക്ഷ്യമാക്കി ഓടുകയായിരുന്നു. എന്നാൽ ജർമൻ ഗോൾകീപ്പർ ഷൂമാക്കർ തന്റെ നേരെ വരുന്നത് അദ്ദേഹം കണ്ടിരുന്നില്ല.

ഷൂമാക്കർ തികച്ചും ക്രൂരമായ രീതിയിൽ വായുവിൽ വെച്ച് ഫ്രഞ്ച് താരത്തെ ഇടിച്ചു വീഴ്ത്തി. ഇത് ബാറ്റിസ്റ്റന്റെ ജീവിതത്തെ തന്നെ മാറ്റിമറിച്ചു. കശേരുക്കൾക്ക് കേടുപാടുകൾ സംഭവിക്കുകയും, രണ്ട് പല്ലുകൾ തകരുകയും, ബോധരഹിതനാകുകയും ചെയ്ത ബാറ്റിസ്റ്റണെ സ്ട്രെച്ചറിലാണ് മൈതാനത്തു നിന്നു പുറത്തെത്തിച്ചത്. അദ്ദേഹത്തിന് ജീവൻ തന്നെ നഷ്ടപ്പെടുമായിരുന്നു. എന്നാൽ ഷൂമാക്കറിന് റഫറി ഒരു കാർഡും നൽകിയില്ല, പകരം ഒരു ഗോൾ കിക്ക് മാത്രമാണ് വിധിച്ചത്. മത്സരത്തിൽ ജർമനി ജയിക്കുകയും ഫൈനലിൽ ഇറ്റലിയോട് പരാജയപ്പെടുകയും ചെയ്തു.

ഹാൻഡ് ഓഫ് ഗോഡ് (1986)

ലോകകപ്പ് ചരിത്രത്തിലെ ഏറ്റവും അവിശ്വസനീയമായ നിമിഷമെന്ന് പറയാവുന്ന ഒന്നാണ് 1986ൽ നടന്നത്. ക്വാർട്ടർ ഫൈനലിൽ ഇംഗ്ലണ്ട് ഗോൾകീപ്പർ പീറ്റർ ഷിൽട്ടന് മുകളിലൂടെ ഡീഗോ മാറഡോണ തന്റെ കൈകൊണ്ട് ബോൾ തട്ടി വലയിലിട്ട് അർജന്റീനയെ 1-0 ന് മുന്നിലെത്തിച്ചു. അദ്ദേഹം പന്ത് കൈകൊണ്ട് തൊട്ടത് ഇംഗ്ലണ്ട് ടീമിലെ എല്ലാവർക്കും സ്റ്റേഡിയത്തിലുണ്ടായിരുന്ന ഭൂരിഭാഗം പേർക്കും മനസിലായെങ്കിലും, കളിക്കളത്തിൽ അന്തിമ തീരുമാനമെടുക്കേണ്ട റഫറി അത് ഗോൾ ആയി അനുവദിച്ചു. ചരിത്രത്തിലെ ഏറ്റവും മികച്ച കളിക്കാരിൽ ഒരാളായ മാറഡോണയുടെ തികച്ചും അവിശ്വസനീയമായ ഒരു ചതിയെന്നു വിശ്വസിക്കുന്നവർ നിരവധിയുണ്ട്. ആ വർഷം അർജന്റീനയെ കിരീടത്തിലേക്ക് നയിച്ചതും മാറഡോണയായിരുന്നു.

ദക്ഷിണ കൊറിയൻ മാച്ച് ഫിക്സിങ് (2002)

ആതിഥേയ രാജ്യമായ ദക്ഷിണ കൊറിയ പ്രതീക്ഷിച്ചതിലും മികച്ച പ്രകടനം കാഴ്ചവെച്ചതിനെ തുടർന്ന് വിവാദത്തിലായ മറ്റൊരു ടൂർണമെന്റായിരുന്നു ഇത്. 2002ൽ ദക്ഷിണ കൊറിയയ്ക്ക് അനുകൂലമായി വന്ന പല തീരുമാനങ്ങളും കടുത്ത വിവാദങ്ങൾക്ക് വഴിവെച്ചു. ഇറ്റലിക്കെതിരായ പ്രീ ക്വാർട്ടർ മത്സരത്തിൽ, ഇക്വഡോറിൽ നിന്നുള്ള റഫറി ബൈറോൺ മൊറേനോ ഇറ്റലിയുടെ ഒരു ഗോൾ അനുവദിച്ചില്ലെന്ന് മാത്രമല്ല, ഡൈവിംഗിന്റെ പേരിൽ ഫ്രാൻസെസ്കോ ടോട്ടിക്ക് ചുവപ്പ് കാർഡ് നൽകി പുറത്താക്കുകയും ചെയ്തു. ഒടുവിൽ അൻ ജുങ് ഹ്വാന്റെ ഗോൾഡൻ ഗോളിലൂടെ ദക്ഷിണ കൊറിയ 2-1 ന് വിജയിച്ചു.

അടുത്ത റൗണ്ടിൽ സ്‌പെയിനിനെതിരായ മത്സരത്തിൽ, ഈജിപ്ഷ്യൻ റഫറി ഗമാൽ അൽ ഗന്ദൂർ സ്‌പെയിനിന്റെ രണ്ട് നിയമപരമായ ഗോളുകൾ നിഷേധിച്ചു. കൂടാതെ സ്പാനിഷ് കളിക്കാർ നിരന്തരം ഓഫ്‌സൈഡ് ആണെന്ന് ലൈൻസ്‌മാൻ വിധിക്കുകയും ചെയ്തു. പെനാൽറ്റി ഷൂട്ടൗട്ടിൽ ദക്ഷിണ കൊറിയ 5-3 ന് ജയിച്ച് സെമി ഫൈനലിൽ കടന്നു. ടൂർണമെന്റിന് ശേഷം ദക്ഷിണ കൊറിയയെ സഹായിക്കാൻ കൈക്കൂലി വാങ്ങിയതിനും മാച്ച് ഫിക്സിങിനും ഇരു റഫറിമാരും ഒടുവിൽ നിർബന്ധിത വിരമിക്കൽ നടത്തേണ്ടി വന്നു എന്നതും ഈ വിവാദത്തിൽ അന്ത്യത്തിൽ സംഭവിച്ചു എന്നതാണ് ശ്രദ്ധേയം.

ഒരു കളിക്കാരന് മൂന്ന് മഞ്ഞക്കാർഡുകൾ നൽകിയ ഗ്രഹാം പോൾ (2006)

2006ൽ ഇംഗ്ലീഷ് റഫറിയായ ഗ്രഹാം പോൾ, ക്രൊയേഷ്യയും ഓസ്‌ട്രേലിയയും തമ്മിലുള്ള ഗ്രൂപ്പ് ഘട്ട മത്സരത്തിൽ ജോസിപ് സിമുനിച്ച് എന്ന താരത്തിനു മൂന്ന് തവണ മഞ്ഞക്കാർഡ് നൽകിയത് വലിയ വാർത്തയായിരുന്നു. മത്സരത്തിന്റെ 61ാം മിനിറ്റിൽ ഹാരി ക്യൂവലിനെ ഫൗൾ ചെയ്തതിന് സിമുനിച്ചിന് ആദ്യ മഞ്ഞക്കാർഡ് ലഭിച്ചു. തുടർന്ന് 90ാം മിനിറ്റിൽ മറ്റൊരു കടുത്ത ഫൗളിന് രണ്ടാമതും മഞ്ഞക്കാർഡ് ലഭിച്ചെങ്കിലും റഫറി അദ്ദേഹത്തെ പുറത്താക്കിയില്ല. ഒടുവിൽ 93ാം മിനിറ്റിൽ സിമുനിച്ചിന് മൂന്നാമതും മഞ്ഞക്കാർഡ് നൽകിയ ശേഷമാണ് പോൾ അദ്ദേഹത്തിന് ചുവപ്പ് കാർഡ് കാണിച്ച് പുറത്താക്കിയത്.

‌ഫ്രാങ്ക് ലംപാർഡിന്റെ നോൺ ഗോൾ (2010)

2010 ലോകകപ്പിൽ ഇംഗ്ലണ്ടും ജർമനിയും തമ്മിലുള്ള ക്വാർട്ടർ ഫൈനൽ മത്സരത്തിൽ ജർമ്മനി 2-1 ന് മുന്നിട്ടു നിൽക്കുകയായിരുന്നു. ഈ സമയം ഫ്രാങ്ക് ലംപാർഡ് ബോക്സിന് തൊട്ടുപുറത്തുനിന്ന് എടുത്ത ഒരു ഷോട്ട് ക്രോസ്ബാറിൽ തട്ടി ഗോൾ ലൈനിനുള്ളിൽ വ്യക്തമായി പതിച്ചു. ശേഷം അത് തിരികെ പുറത്തേക്ക് വരികയും ജർമ്മൻ ഗോൾകീപ്പർ മാനുവൽ നൂയർ പന്ത് പിടിച്ചെടുത്ത് കളി തുടരുകയും ചെയ്തു. സ്റ്റേഡിയത്തിലുള്ള എല്ലാവർക്കും അത് ഗോൾ ആണെന്ന് മനസിലായെങ്കിലും 1966ൽ നിന്ന് വ്യത്യസ്തമായി റഫറി ഗോൾ അനുവദിച്ചില്ല. ഫുട്ബോളിൽ വിഡിയോ സാങ്കേതികവിദ്യ (വാർ) വേണമെന്ന ആവശ്യത്തിലേക്ക് ലോകത്തെ നയിച്ചത് ഈ നിമിഷമാണ്. മത്സരത്തിൽ ജർമനി 4-1 ന് വിജയിച്ചു.