ശ്രേയസ് അയ്യര്‍ വീണ്ടും കളത്തിലേക്ക് തിരിച്ചെത്തുന്നു; വിജയ് ഹസാരെ ട്രോഫിയില്‍ കളിച്ചേക്കും

മുംബൈ: പരിക്കിനെത്തുടര്‍ന്ന് ശസ്ത്രക്രിയയ്ക്ക് വിധേയനായി വിശ്രമത്തിലായിരുന്നു യുവതാരം ശ്രേയസ് അയ്യര്‍ ക്രിക്കറ്റ് കളത്തിലേക്ക് മടങ്ങിയെത്തുന്നു. വിജയ് ഹസാരെ ട്രോഫി ടൂര്‍ണമെന്റില്‍ ഹിമാചല്‍ പ്രദേശിനെതിരായ മത്സരത്തില്‍ ശ്രേയസ് മുംബൈയ്ക്ക് വേണ്ടി കളിക്കുമെന്നാണ് റിപ്പോര്‍ട്ട്. ഈ മാസം ആറിനാണ് മത്സരം.

അതേസമയം ശ്രേയസ് അയ്യരെ ന്യൂസിലന്‍ഡിനെതിരായ പരമ്പരയ്ക്കുള്ള ടീമില്‍ എടുക്കുന്ന കാര്യം ഫിറ്റ്‌നസ്സ് അടക്കമുള്ള കാര്യങ്ങള്‍ പരിശോധിച്ച ശേഷമായിരിക്കുമെന്ന് ബിസിസിഐ അധികൃതരെ ഉദ്ധരിച്ച് പിടിഐ റിപ്പോര്‍ട്ട് ചെയ്തു. കഴിഞ്ഞ ഒക്ടോബറില്‍ സിഡ്‌നിയില്‍ ഓസ്‌ട്രേലിയക്കെതിരായ മൂന്നാം ഏകദിന മത്സരത്തിനിടെയാണ് ശ്രേയസിന് പരിക്കേറ്റത്.

പ്ലീഹയ്ക്ക് പരിക്കേല്‍ക്കുകയും ആന്തരിക രക്തസ്രാവം ഉണ്ടാകുകയും ചെയ്തതിനെത്തുടര്‍ന്ന് ശ്രേയസിനെ ശസ്ത്രക്രിയയ്ക്ക് വിധേയനാക്കുകയും ചെയ്തിരുന്നു. ഇന്നലെ നടത്തിയ മത്സരക്ഷമതാ പരിശോധനയില്‍ വിജയിച്ചുവെന്നും, വിജയ് ഹസാരെ ട്രോഫി ടൂര്‍ണമെന്റില്‍ കളിച്ചേക്കുമെന്നുമാണ് ബിസിസിഐ ബംഗലൂരു അക്കാദമി അറിയിച്ചത്.

ഒരു തവണ കൂടി മത്സര സന്നദ്ധമായോ എന്നു തീരുമാനിക്കാനുള്ള പരിശോധന നടത്തുമെന്നും, അതിനുശേഷമാകും അന്തിമ ഫിറ്റ്‌നസ് ക്ലിയറന്‍സ് നല്‍കുകയുള്ളൂവെന്നും അധികൃതര്‍ സൂചിപ്പിച്ചു. ക്രിക്കറ്റിലേക്ക് മടങ്ങിയെത്താനായി, ബിസിസിഐയുടെ ബംഗളൂരുവിലെ സെന്റര്‍ ഓഫ് എക്സലന്‍സില്‍ തീവ്ര പരിശീലനം നടത്തിവരികയായിരുന്നു ശ്രേയസ്.