സ്വന്തമായി വീട് എന്നത് എല്ലാവരുടെയും സ്വപ്‌നമാണ്. ഇത് പൂര്‍ത്തിയാക്കാന്‍ ഏത് മാര്‍ഗമാണ് എളുപ്പം അത് സ്വീകരിക്കുന്നവരാണ് ഭൂരിഭാഗം ആളുകളും. സാധാരണ നിലയില്‍ ഭവന വായ്പകളെയാണ് കൂടുതല്‍ ആളുകളും ആശ്രയിക്കാറ്. ഇത്തരത്തില്‍ ഭവന വായ്പകളെ ആശ്രയിക്കുന്നവരുടെ എണ്ണം ഇന്ത്യയില്‍ വര്‍ധിച്ചു വരുന്നതായാണ് കണക്കുകള്‍ വ്യക്തമാക്കുന്നത്.

എന്നാല്‍ ആലോചിക്കാതെ ധൃതിപിടിച്ച് ലോണ്‍ എടുക്കുന്നത് ഭാവിയില്‍ വലിയ സാമ്പത്തിക ബാധ്യത സൃഷ്ടിച്ചേക്കാം. ഭവന വായ്പയ്ക്ക് അപേക്ഷിക്കുന്നതിന് മുന്‍പ് ചില കാര്യങ്ങള്‍ അറിഞ്ഞിരിക്കേണ്ടത് അത്യാവശ്യമാണ്. അവ ചുവടെ:

1. ആദ്യം സാമ്പത്തിക ശേഷി കൃത്യമായി വിലയിരുത്തുകയാണ് വേണ്ടത്. വിവിധ ബാങ്കുകളുടെ വായ്പാ ഓഫറുകള്‍ തമ്മില്‍ താരതമ്യം ചെയ്ത് ഏറ്റവും അനുയോജ്യമായത് തെരഞ്ഞെടുക്കാം. പ്രതിമാസ വരുമാനത്തിന്റെ 45 ശതമാനത്തില്‍ കൂടുതല്‍ ഇഎംഐ തുകയായി മാറാതിരിക്കാന്‍ ശ്രദ്ധിക്കുക. വായ്പയെടുക്കുന്ന സമയത്ത് ഉയര്‍ന്ന തുക ഡൗണ്‍ പേയ്മെന്റായി നല്‍കിയാല്‍ പ്രതിമാസ ഇഎംഐ കുറയ്ക്കാന്‍ സാധിക്കും.

2. വായ്പാ അപേക്ഷ നല്‍കുന്ന സമയത്ത് അഡ്മിനിസ്‌ട്രേറ്റീവ് ഫീസുകള്‍, പ്രോസസിങ് ഫീസുകള്‍, മറ്റ് സര്‍വീസ് ചാര്‍ജുകള്‍ തുടങ്ങിയവ ബാങ്കുകള്‍ ഉപഭോക്താക്കളില്‍ നിന്ന് ഈടാക്കാറുണ്ട്. വായ്പ അപേക്ഷ നല്‍കുന്നതിന് മുന്‍പ് തന്നെ ഇത്തരം നിരക്കുകളെക്കുറിച്ച് വായ്പ നല്‍കുന്ന ധനകാര്യ സ്ഥാപനവുമായി ബന്ധപ്പെട്ട് വ്യക്തമായി മനസ്സിലാക്കേണ്ടതുണ്ട്. ഈ ചാര്‍ജുകള്‍ ഒറ്റത്തവണയായി അടക്കേണ്ടതാണോ അതോ പ്രതിമാസം നല്‍കേണ്ടതാണോ എന്ന കാര്യവും ഉറപ്പുവരുത്തുക.

3. തിരിച്ചടവ് കാലാവധി നിശ്ചയിക്കുമ്പോള്‍ ശ്രദ്ധിക്കുകയാണ് അടുത്തതായി ചെയ്യേണ്ടത്. കാലാവധി കൂടുന്തോറും പ്രതിമാസ തിരിച്ചടവ് കുറയുമെങ്കിലും ബാങ്കിന് നല്‍കേണ്ടിവരുന്ന ആകെ പലിശ വര്‍ദ്ധിക്കും. അതിനാല്‍ സാമ്പത്തിക ശേഷി നോക്കി കുറഞ്ഞ കാലാവധി തെരഞ്ഞെടുക്കുന്നതാണ് പലിശ ലാഭിക്കാന്‍ ഏറ്റവും ഉത്തമം.

4.വായ്പ വേഗത്തില്‍ അനുവദിച്ചു കിട്ടാനും കുറഞ്ഞ പലിശ ലഭിക്കാനും 750ന് മുകളിലുള്ള ക്രെഡിറ്റ് സ്‌കോര്‍ അത്യന്താപേക്ഷിതമാണ്.

5.ഭാവിയില്‍ വായ്പ മുന്‍കൂട്ടി അടച്ചു തീര്‍ക്കുന്നതുമായി ബന്ധപ്പെട്ട വ്യവസ്ഥകളെക്കുറിച്ചും വ്യക്തമായി മനസ്സിലാക്കണം. ആവശ്യമായ എല്ലാ രേഖകളും മുന്‍കൂട്ടി തയ്യാറാക്കുന്നത് നടപടികള്‍ വേഗത്തിലാക്കും.