ന്യൂഡല്ഹി: ഡോളറിനെതിരെ മൂല്യം ഉയര്ന്ന് രൂപ. വ്യാപാരത്തിന്റെ തുടക്കത്തില് 31 പൈസയുടെ നേട്ടത്തോടെ 85.05 എന്ന നിലയിലേക്കാണ് രൂപയുടെ മൂല്യം ഉയര്ന്നത്. ഓഹരി വിപണിയില് നിന്നുള്ള അനുകൂല സൂചനകള് അടക്കമുള്ള വിഷയങ്ങളാണ് രൂപയുടെ മൂല്യത്തെ സ്വാധീനിച്ചത്.
ചൊവ്വാഴ്ച വ്യാപാരത്തിന്റെ തുടക്കത്തില് രൂപ കരുത്ത് കാട്ടിയെങ്കിലും പിന്നീട് നഷ്ടത്തോടെയാണ് വ്യാപാരം അവസാനിച്ചത്. എണ്ണ കമ്പനികള് ഡോളര് വാങ്ങിക്കൂട്ടിയതാണ് രൂപയുടെ മൂല്യം താഴാന് ഇടയാക്കിയത്. എണ്ണവില കൂടുന്നത്് മൂലമുള്ള നഷ്ടം കുറയ്ക്കാന് ഇറക്കുമതിക്കാര് ഹെഡ്ജ് ചെയ്യാന് തുടങ്ങിയതോടെയാണ് ഡോളര് ആവശ്യകത വര്ധിച്ചത്. ഇതാണ് രൂപയില് പ്രതിഫലിച്ചത്. ഇന്നലെ ഓഹരി വിപണി കനത്ത ഇടിവാണ് രേഖപ്പെടുത്തിയത്. ഇതും രൂപയെ സ്വാധീനിച്ചു.
അതിനിടെ ഇന്നലത്തെ കനത്ത ഇടിവിന് ശേഷം വ്യാപാരത്തിന്റെ തുടക്കത്തില് മികച്ച മുന്നേറ്റം കാഴ്ചവെച്ച ഓഹരി വിപണിയില് ഇപ്പോള് കാര്യമായ ചലനമില്ല. 200 പോയിന്റ് നേട്ടത്തോടെ 81,300 പോയിന്റിന് മുകളിലാണ് സെന്സെക്സ്. അതേസമയം അതിര്ത്തിയില് അടുത്തിടെ ഉണ്ടായ ഇന്ത്യ- പാകിസ്ഥാന് സംഘര്ഷത്തിന് പിന്നാലെ ഇന്ത്യന് പ്രതിരോധ കമ്പനികളുടെ ഓഹരിയില് ഉണ്ടായ മുന്നേറ്റം ഇന്നും തുടര്ന്നു. പുതിയ ഓര്ഡറുകള് ലഭിക്കുമെന്ന പ്രതീക്ഷയില് കേരളം ആസ്ഥാനമായുള്ള കൊച്ചിന് ഷിപ്പ്യാര്ഡ്, ഗാര്ഡന് റീച്ച് (ജിആര്എസ്ഇ), മസഗോണ് ഡോക് എന്നി ഓഹരികള് 17 ശതമാനം വരെയാണ് ഉയര്ന്നത്. അതിര്ത്തി സംഘര്ഷത്തിന്റെ പശ്ചാത്തലത്തില് കപ്പല്നിര്മ്മാണ ശാലകളുടെ ശേഷി ഉയര്ത്താന് കേന്ദ്രസര്ക്കാര് കൂടുതല് നിക്ഷേപം നടത്തുമെന്നും ഇത് കൂടുതല് ഓര്ഡര് ലഭിക്കാന് സഹായകമാകുമെന്നുമുള്ള പ്രതീക്ഷയാണ് കപ്പല്നിര്മ്മാണ ശാലകളുടെ ഓഹരികളില് പ്രതിഫലിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates