കേന്ദ്ര സർക്കാർ സ്ഥാപനമായ കൗൺസിൽ ഓഫ് സയന്റിഫിക് ആൻഡ് ഇൻഡസ്ട്രിയൽ റിസർച്ചിന് (CSIR) കീഴിലുള്ള ന്യൂഡൽഹിയിലെ നാഷണൽ ഫിസിക്കൽ ലബോറട്ടറിയിൽ (CSIR-NPL) മൾട്ടി ടാസ്‌കിങ് സ്റ്റാഫ് (MTS) തസ്തികയിലേക്ക് അപേക്ഷ ക്ഷണിച്ചു. ആകെ 25 ഒഴിവുകളാണുള്ളത്. പത്താം ക്ലാസ് വിജയിച്ചവർക്ക് അപേക്ഷിക്കാം. താൽപര്യമുള്ള ഉദ്യോഗാർഥികൾക്ക് ഡിസംബർ 23 വരെ അപേക്ഷ സമർപ്പിക്കാം.

യോഗ്യതയും പ്രായപരിധിയും

• അംഗീകൃത ബോർഡിൽ നിന്ന് പത്താം ക്ലാസ് അല്ലെങ്കിൽ തത്തുല്യ പരീക്ഷ വിജയിച്ചിരിക്കണം.

• പ്ലസ് ടു യോഗ്യതയുള്ളവർക്ക് മുൻഗണന ലഭിക്കും.

• അപേക്ഷകർക്ക് 18 വയസ്സ് പൂർത്തിയായിരിക്കണം.

• എസ്‌സി, എസ്ടി വിഭാഗക്കാർക്ക് അഞ്ച് വർഷവും ഒബിസി (നോൺ ക്രീമി ലെയർ) വിഭാഗക്കാർക്ക് മൂന്ന് വർഷവും പ്രായപരിധിയിൽ ഇളവുണ്ട്.

• ഭിന്നശേഷിക്കാർക്കും വിമുക്തഭടന്മാർക്കും കേന്ദ്ര സർക്കാർ ചട്ടങ്ങൾ പ്രകാരം ഇളവുകൾ ലഭിക്കും.

ശമ്പളം

ഏഴാം ശമ്പള കമ്മീഷൻ പ്രകാരമുള്ള ലെവൽ 1 ശമ്പളമാണ് ലഭിക്കുക. അടിസ്ഥാന ശമ്പളം 18,000 രൂപയാണ്. ഡിഎ, എച്ച്ആർഎ, ട്രാൻസ്‌പോർട്ട് അലവൻസ് തുടങ്ങിയ ആനുകൂല്യങ്ങൾ ഉൾപ്പെടെ പ്രതിമാസം ഏകദേശം 41,040 രൂപ ലഭിക്കും.

അപേക്ഷിക്കേണ്ട വിധം

അപേക്ഷാഫോം CSIR-NPL-ന്റെ ഔദ്യോഗിക വെബ്സൈറ്റായ www.nplindia.in-ൽ നിന്ന് ഡൗൺലോഡ് ചെയ്യണം. പൂരിപ്പിച്ച അപേക്ഷയോടൊപ്പം പ്രായം, വിദ്യാഭ്യാസ യോഗ്യത, ജാതി, അനുഭവം എന്നിവ തെളിയിക്കുന്ന രേഖകളുടെ സ്വയം സാക്ഷ്യപ്പെടുത്തിയ പകർപ്പുകൾ ഉൾപ്പെടുത്തണം. ബാധകമായ വിഭാഗങ്ങളിലെ ഉദ്യോഗാർഥികൾ 500 രൂപയുടെ ഡിമാൻഡ് ഡ്രാഫ്റ്റ്/പേ ഓർഡറും സമർപ്പിക്കണം.

അപേക്ഷയും അനുബന്ധ രേഖകളും കവറിലാക്കി “APPLICATION FOR THE POST OF MTS” എന്ന് രേഖപ്പെടുത്തി തപാൽ മുഖേന അയയ്ക്കണം.

വിലാസം:

Senior Controller of Administration,
CSIR–National Physical Laboratory,
Dr. K.S. Krishnan Marg,
New Delhi – 110012.