പൊതുമേഖലാ ബാങ്കുകളിലെ കസ്റ്റമർ സർവീസ് അസോസിയേറ്റ് തസ്തികകളിലേക്ക് ഇൻസ്റ്റിറ്റ്യൂട്ട് ഓഫ് ബാങ്കിങ്​ പേഴ്​സണൽ സെലക്ഷൻ (ഐ ബി പി എസ്​) നിയമനം നടത്തുന്നു. 10,277 ഒഴിവുകളാണ് റിപ്പോർട്ട് ചെയ്തിരിക്കുന്നത്. കേരളത്തിൽ 330 ഒഴിവുണ്ട്. ഓഗസ്റ്റ് 21 ന് മുൻപ് അപേക്ഷ സമർപ്പിക്കണം.

ബാങ്ക്​ ഓഫ്​ ബറോഡ, കനറാ ബാങ്ക്​, ഇന്ത്യൻ ഓവർസീസ്​ ബാങ്ക്​, യൂക്കോ ബാങ്ക്​, ബാങ്ക്​ ഓഫ്​ ഇന്ത്യ, സെൻട്രൽ ബാങ്ക്​ ഓഫ്​ ഇന്ത്യ, പഞ്ചാബ്​ നാഷണൽ ബാങ്ക്​, യൂണിയൻ ബാങ്ക്​ ഓഫ്​ ഇന്ത്യ, ബാങ്ക്​ ഓഫ്​ മഹാരാഷ്ട്ര, ഇന്ത്യൻ ബാങ്ക്​, പഞ്ചാബ്​ ആൻഡ്​ സിന്ധ്​ ബാങ്ക്​ എന്നീ ബാങ്കുകളിലാണ്​ ഒഴിവുകൾ ഉള്ളത്.

അംഗീകൃത സർവകലാശാലയിൽ നിന്ന് ബിരുദം അല്ലെങ്കിൽ കേന്ദ്രസർക്കാർ അംഗീകരിച്ച തത്തുല്യ യോഗ്യത ഉള്ളവർക്ക് അപേക്ഷ നൽകാം. ഏതെങ്കിലും ഒരു സംസ്ഥാനം/കേന്ദ്രഭരണ പ്രദേശത്ത് മാത്രമേ അപേക്ഷിക്കാൻ പാടുള്ളൂ. പ്രായപരിധി 20 – 28 വയസ് വരെ. ​അപേക്ഷാഫീസ് 850 രൂപയാണ് സംവരണ വിഭാഗത്തിന് 175 രൂപ.

അപേക്ഷിക്കുന്ന സ്ഥലത്തെ പ്രാദേശിക ഭാഷയിൽ പരിജ്ഞാനം ആവശ്യമാണ്. പ്രിലിമിനറി പരീക്ഷയ്​ക്ക്​ തിരുവനന്തപുരം, കൊല്ലം, കോട്ടയം, എറണാകുളം, ആലപ്പുഴ, പാലക്കാട്​, മലപ്പുറം, തൃശൂർ, കോഴിക്കോട്​, കണ്ണൂർ എന്നിവിടങ്ങളിൽ പരീക്ഷാകേന്ദ്രങ്ങളുണ്ട്​. വിശദവിവരങ്ങൾക്ക്​ www.ibps.in സന്ദർശിക്കുക.