വളരെ പെട്ടെന്ന് തയ്യാറാക്കാവുന്ന ഒരു വിഭവമാണ് വെള്ള മങ്ങാ അച്ചാർ. സാധാരണയായി കാണാറുള്ള ചുവന്ന മുളകുപൊടി ചേർത്ത അച്ചാറുകളിൽ നിന്ന് കാഴ്ചയിലും രുചിയിലും ഇവ വ്യത്യസ്ഥമാണ്. പച്ചമുളകിന്റെ എരിവും സു​ഗന്ധവ്യഞ്ജനങ്ങളുടെ മണവും ചേരുന്ന ഈ വെള്ള മാങ്ങ അച്ചാർ ചോറിനൊപ്പവും കഞ്ഞിക്കൊപ്പവുമൊക്കെ നല്ല കോംമ്പിനേഷനാണ്.

ഈ അച്ചാർ പെട്ടെന്ന് കേടാകാതെ കൂടുതൽ കാലം സൂക്ഷിച്ചുവയ്ക്കാൻ സാധിക്കുമെന്നതാണ് മറ്റൊരു പ്രത്യേകത. മാങ്ങയുടെ സ്വാഭാവികമായ പുളിയും കടുപ്പവും ചോർന്നു പോകാതെ, എന്നാൽ എല്ലാ സുഗന്ധവ്യഞ്ജനങ്ങളുടെയും രുചി ഇറങ്ങിച്ചെല്ലുന്ന രീതിയിലാണ് ഇത് തയ്യാറാക്കുന്നത്.

വെള്ള മാങ്ങ അച്ചാർ റെസിപ്പി നോക്കാം.

ചേരുവകൾ

• പച്ച മാങ്ങ – 500 ഗ്രാം (നീളത്തിൽ അരിഞ്ഞത്)

• വെളുത്തുള്ളി – 15 അല്ലി (അരിഞ്ഞത്)

• ഇഞ്ചി – 1 വലിയ കഷ്ണം (അരിഞ്ഞത്)

• പച്ചമുളക് – 7–8 എണ്ണം (നീളത്തിൽ അരിഞ്ഞത്)

• കടുക് – 1 ടീസ്പൂൺ

• ഉലുവ – ½ ടീസ്പൂൺ

• മഞ്ഞൾപ്പൊടി – ½ ടീസ്പൂൺ

• കായപ്പൊടി – 1 ടീസ്പൂൺ

• വിനാഗിരി – 1 കപ്പ്

• പഞ്ചസാര – 1 ടീസ്പൂൺ

• കറിവേപ്പില – 1 പിടി

• നല്ലെണ്ണ – 2 ടേബിൾസ്പൂൺ

• ഉപ്പ് – ആവശ്യത്തിന്

തയ്യാറാക്കുന്ന വിധം

• ഒരു പാനിൽ നല്ലെണ്ണ ഒഴിച്ച് ചൂടാക്കാം.

• എണ്ണ ചൂടാകുമ്പോൾ കടുകും ഉലുവയും ചേർത്ത് പൊട്ടിക്കാം.

• അതിലേക്ക് അരിഞ്ഞു വെച്ചിരിക്കുന്ന ഇഞ്ചി, വെളുത്തുള്ളി, പച്ചമുളക്, കറിവേപ്പില എന്നിവ ചേർക്കുക. ഇവ നേരിയ പൊൻനിറമാകുന്നത് വരെ നന്നായി വഴറ്റാം.

• തീ കുറച്ചതിനു ശേഷം മഞ്ഞൾപ്പൊടിയും കായപ്പൊടിയും ചേർത്ത് ചെറുതായി വഴറ്റാം.

• അതിനുശേഷം വിനാഗിരിയും ആവശ്യത്തിന് ഉപ്പും ഒഴിച്ച് നന്നായി ഇളക്കാം.

• ഇനി അരിഞ്ഞു വെച്ചിരിക്കുന്ന പച്ച മാങ്ങ കഷ്ണങ്ങൾ ചേർത്ത് മസാല എല്ലാ കഷ്ണങ്ങളിലും നന്നായി പിടിക്കുന്നത് വരെ പതുക്കെ ഇളക്കി യോജിപ്പിക്കാം.

• ഒരു ടീസ്പൂൺ പഞ്ചസാര കൂടി ചേർത്ത് അവസാനമായി ഒരിക്കൽ കൂടി ഇളക്കാം.

• ഉടൻ തന്നെ അടുപ്പിന്റെ തീ അണയ്ക്കാം.

മാങ്ങ വേവിക്കാൻ പാടില്ല. മാങ്ങയുടെ കടുപ്പവും മൊരിവും അതേപടി നിലനിൽക്കണം. കൂട്ടിലെ ചൂട് തന്നെ മാങ്ങയിൽ മസാലയും രുചികളും പിടിക്കാൻ ധാരാളമാണ്.