ഭക്ഷണം കഴിച്ച ഉടൻ നടക്കുന്നതാണോ ശീലം? അതോ കുറച്ചുനേരം വിശ്രമിച്ച ശേഷമാണോ നടക്കാറ്? ഭക്ഷണത്തിന് ശേഷമുള്ള ചെറിയ നടത്തം പോലും ആരോ​ഗ്യത്തിന് വളരെ ​ഗുണം ചെയ്യുമെന്ന് ആരോ​ഗ്യവിദ​ഗ്ധരും ചൂണ്ടിക്കാണിക്കുന്നു. പ്രത്യേകിച്ച് രക്തത്തിലെ പഞ്ചസാരയുടെ നിയന്ത്രണത്തിലും ദഹനത്തിനും. എന്നാൽ എപ്പോൾ നടക്കണം, എത്ര നേരം നടക്കണം, എത്ര വേ​ഗത്തിൽ നടക്കണം തുടങ്ങിയ കാര്യത്തിൽ ആളുകൾക്ക് ഇപ്പോഴും ആശയക്കുഴപ്പമുണ്ട്.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

എപ്പോൾ നടക്കണം?

ഭക്ഷണശേഷം അൽപനേരം വിശ്രമിച്ചിട്ട് നടക്കാമെന്ന് കരുതി കാത്തിരിക്കണമെന്നില്ല, ഏകദേശം അഞ്ചോ പത്തോ മിനിറ്റിനുള്ളിൽ പതുക്കെ നടക്കാം. എന്നാൽ വേ​ഗത്തിൽ നടക്കുന്നതും ഓടുന്നതും കഠിനമായ വ്യായാമം ചെയ്യുന്നതും ഒഴിവാക്കാം.

പ്രത്യേകിച്ച് വയറുനിറയെ ഭക്ഷണം കഴിച്ചിട്ടുണ്ടെങ്കിൽ വയറിന് അസ്വസ്ഥതയോ വയറുവേദനയോ ഉണ്ടാക്കാം. ഭക്ഷണശേഷം ശരീരത്തിന് അമിതമായി ആയാസം നൽകാതെ സാവധാനത്തിൽ നടക്കുന്നതാണ് നല്ലത്.

എത്ര നേരം നടക്കണം?

സാധാരണ ഭക്ഷണശേഷം 10-15 മിനിറ്റ് വരെ പതുക്കെ നടക്കുന്നത് നല്ലൊരു ശീലമാണ്. തുടക്കക്കാർ അഞ്ച് മിനിറ്റ് നടന്നുകൊണ്ട് ആരംഭിക്കാം. പിന്നീട് സൗകര്യത്തിന് സമയം കൂട്ടാം. ഉച്ചഭക്ഷണത്തിനും അത്താഴത്തിനും ശേഷം ചെറിയൊരു നടത്തം പതിവാക്കുന്നത് ദിവസം മുഴുവൻ ശാരീരിക പ്രവർത്തനം വർധിപ്പിക്കാൻ സഹായിക്കും.

ഭക്ഷണശേഷം നടക്കുന്നതു കൊണ്ടുള്ള ആരോ​ഗ്യ​ഗുണങ്ങൾ

രക്തത്തിലെ പഞ്ചസാര നിയന്ത്രിക്കാൻ സഹായിക്കും

ഭക്ഷണ കഴിച്ചശേഷം രക്തത്തിലെ ഗ്ലൂക്കോസിന്റെ അളവ് സ്വാഭാവികമായി ഉയരുന്നു. ഈ സമയത്ത് പേശികൾ പ്രവർത്തിക്കുമ്പോൾ ഗ്ലൂക്കോസ് ഉപയോഗിക്കപ്പെടുന്നതിനാൽ രക്തത്തിലെ പഞ്ചസാരയുടെ വർധന നിയന്ത്രിക്കാൻ നടത്തം സഹായിച്ചേക്കാം.

പ്രമേഹമുള്ളവർക്കും പ്രമേഹസാധ്യതയുള്ളവർക്കും ഭക്ഷണശേഷമുള്ള ചെറിയ നടത്തം നല്ല ശീലമാണ്. എന്നാൽ ഇത് മരുന്നുകൾക്കും ചികിത്സയ്ക്കും പകരമല്ല.

ദഹനത്തിന് നല്ലത്

ഭക്ഷണം കഴിച്ചശേഷം പതുക്കെ നടക്കുന്നത് ചിലരിൽ വയറുവീർക്കുന്നത് കുറയ്ക്കാൻ സഹായിച്ചേക്കാം. എന്നാൽ എല്ലാവരിലും ഒരേ ഫലം ഉണ്ടാകണമെന്നില്ല. ഭക്ഷണശേഷം ഉടൻ കിടക്കുന്നതിനു പകരം കുറച്ചുനേരം ഇരിക്കുകയോ പതുക്കെ നടക്കുകയോ ചെയ്യുന്നത് നല്ല ശീലമാണ്.

ശരീരഭാരം നിയന്ത്രിക്കാൻ സഹായിക്കും

നടത്തം കലോറി ചെലവഴിക്കാൻ സഹായിക്കും. എന്നാൽ നടത്തം മാത്രം കൊണ്ട് ശരീരഭാരം കുറയുമെന്ന് കരുതാനാകില്ല. ഭക്ഷണക്രമം, ഉറക്കം, മറ്റ് ശാരീരിക പ്രവർത്തനങ്ങൾ എന്നിവയും ശരീരഭാരത്തെ സ്വാധീനിക്കുന്നു.

ഹൃദയാരോഗ്യം

പതിവായ നടത്തം ഹൃദയാരോഗ്യം മെച്ചപ്പെടുത്താനും രക്തസമ്മർദം നിയന്ത്രിക്കാനും സഹായിക്കുന്ന ശാരീരിക പ്രവർത്തനമാണ്. ഭക്ഷണശേഷമുള്ള ചെറിയ നടത്തം ദിവസേനയുള്ള ശാരീരിക പ്രവർത്തനത്തിന്റെ അളവ് വർധിപ്പിക്കാനുള്ള ലളിതമായ മാർഗമാണ്.

ദീർഘനേരം ഇരിക്കുന്ന ശീലം കുറയ്ക്കാം

ഓഫീസിലിരുന്ന് ജോലി ചെയ്യുന്നവരും വീട്ടിൽ കൂടുതൽ സമയം ഇരിക്കുന്നവരും ഭക്ഷണശേഷം അൽപനേരം നടക്കുന്നത് ശാരീരിക പ്രവർത്തനം കൂട്ടാൻ സഹായിക്കും. ചെറിയ ഇടവേളകളിൽ എഴുന്നേറ്റുനടക്കുന്നതും ആരോഗ്യകരമായ ജീവിതശൈലിയുടെ ഭാഗമാണ്.

ഒഴിവാക്കേണ്ട തെറ്റുകൾ

• വയറുനിറയെ ഭക്ഷണം കഴിച്ച ഉടൻ വേഗത്തിൽ നടക്കുന്നത്.

• ഭക്ഷണശേഷം ദീർഘനേരം കഠിനമായ വ്യായാമം ചെയ്യുന്നത്.

• വയറിന് അസ്വസ്ഥതയുണ്ടായിട്ടും നടത്തം തുടരുന്നത്.

• നടക്കുന്നതുകൊണ്ട് മാത്രം ഭക്ഷണക്രമം നോക്കരുതെന്ന് കരുതുന്നത്.

• ഭക്ഷണശേഷം നടക്കുന്നത് പ്രമേഹമരുന്നുകൾക്ക് പകരമാണെന്ന് കരുതരുത്.

മാത്രമല്ല, നടക്കുന്നതിനിടെ നെഞ്ചുവേദന, കടുത്ത ശ്വാസംമുട്ടൽ, ബോധക്ഷയം തുടങ്ങിയ ലക്ഷണങ്ങൾ ഉണ്ടായാൽ അടിയന്തര വൈദ്യസഹായം തേടണം. ഭക്ഷണത്തിന്റെ അളവ്, ആരോഗ്യസ്ഥിതി, പ്രായം, ശാരീരികക്ഷമത എന്നിവ അനുസരിച്ച് നടത്തത്തിൻ്റെ രീതിയും ദൈർഘ്യവും ക്രമീകരിക്കാവുന്നതാണ്.