ദഹനം നന്നായാൽ മാത്രമാണ് ശരീരത്തിന് ആവശ്യമായ പോഷകം ഭക്ഷണത്തിൽ നിന്ന് ആ​ഗിരണം ചെയ്യാൻ സാധിക്കൂ. എന്നാൽ തിരക്കുപിടിച്ച ജീവിശൈലിയിൽ അനാരോ​ഗ്യകരമായ ഭക്ഷണരീതി, മാനസിക സമ്മർദം, വ്യായാമക്കുറവ് പോലുള്ളവ കാരണം ​ഗ്യാസ്, വയറുവീക്കം, മലബന്ധം, നെഞ്ചെരിച്ചിൽ, അസിഡിറ്റി തുടങ്ങിയ ദഹനപ്രശ്നങ്ങൾ ഇന്ന് സാധാരണമായിരിക്കുകയാണ്.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

നമ്മുടെ ദിനചര്യയിൽ ചില മാറ്റങ്ങൾ വരുത്തുന്നതിലൂടെ നമ്മുടെ ദഹനശേഷി മെച്ചപ്പെടുത്താൻ സാധിക്കുമെന്ന് ആരോ​ഗ്യ വിദ​ഗ്ധർ ചൂണ്ടിക്കാണിക്കുന്നു.

ഭക്ഷണം നന്നായി ചവച്ച് കഴിക്കുക

ദഹനപ്രക്രിയ ആരംഭിക്കുന്നത് വായിൽ നിന്നാണ്. ഭക്ഷണം നന്നായി ചവയ്ക്കുമ്പോൾ ഉമിനീരിലെ എൻസൈമുകൾ ഭക്ഷണത്തെ ചെറിയ ഘടകങ്ങളാക്കി മാറ്റാൻ സഹായിക്കുന്നു. ഇത് ആമാശയത്തിന് അമിതഭാരം കുറയ്ക്കുകയും ദഹനം എളുപ്പമാക്കുകയും ചെയ്യും. ഭക്ഷണം സാവധാനത്തിൽ ആസ്വദിച്ചു കഴിക്കാനും ശ്രദ്ധിക്കുക.

ഭക്ഷണത്തിൽ ധാരാളം ഫൈബർ ഉൾപ്പെടുത്തുക

ഫൈബർ സമ്പുഷ്ടമായ ഭക്ഷണങ്ങൾ കുടലിന്റെ ആരോഗ്യം മെച്ചപ്പെടുത്തുകയും മലബന്ധം തടയുകയും ചെയ്യുന്നു. നല്ല കുടൽ ബാക്ടീരിയയുടെ വളർച്ചയ്ക്കും ഫൈബർ സഹായകമാണ്.

ഫൈബർ അടങ്ങിയ ഭക്ഷണങ്ങൾ

• ഓട്സ്

• പച്ചക്കറികൾ

• പഴങ്ങൾ

• പയർവർഗങ്ങൾ

• മുഴുധാന്യങ്ങൾ

• ചിയ വിത്ത്, ഫ്ലാക്സ് സീഡ്

ആവശ്യത്തിന് വെള്ളം കുടിക്കുക

വെള്ളം ദഹനപ്രക്രിയ സുഗമമാക്കാനും മലബന്ധം കുറയ്ക്കാനും സഹായിക്കുന്നു. ശരീരത്തിൽ ജലാംശം കുറയുന്നത് ദഹനത്തെ പ്രതികൂലമായി ബാധിക്കും. ദിവസവും ഏകദേശം 2–3 ലിറ്റർ വെള്ളം കുടിക്കാൻ ശ്രമിക്കുക. വ്യക്തിയുടെ പ്രായം, കാലാവസ്ഥ, ആരോഗ്യസ്ഥിതി എന്നിവ അനുസരിച്ച് ആവശ്യകത വ്യത്യാസപ്പെടാം.

ദിവസവും ശരീരം ചലിപ്പിക്കുക

വ്യായാമം കുടലിന്റെ പ്രവർത്തനം ഉത്തേജിപ്പിക്കുകയും ഭക്ഷണം ദഹനനാളത്തിലൂടെ സുഗമമായി നീങ്ങാൻ സഹായിക്കുകയും ചെയ്യുന്നു. വേഗത്തിലുള്ള നടത്തം, യോഗ, സൈക്ലിങ്, സ്‌ട്രെച്ചിംഗ് പോലുള്ള വ്യായാമങ്ങൾ ചെയ്യാം.

പ്രോബയോട്ടിക് ഭക്ഷണങ്ങൾ ഉൾപ്പെടുത്തുക

പ്രോബയോട്ടിക്കുകൾ കുടലിലെ നല്ല ബാക്ടീരിയയുടെ എണ്ണം വർധിപ്പിച്ച് ദഹനശേഷി മെച്ചപ്പെടുത്തുന്നു. തൈര്, മോര്, പുളിപ്പിച്ച ഭക്ഷണങ്ങൾ പോലുള്ളവയിൽ പ്രോബയോട്ടിക് അടങ്ങിയിട്ടുണ്ട്.

അമിതമായി ഭക്ഷണം കഴിക്കാതിരിക്കുക

ഒറ്റയടിക്ക് വളരെ അധികം ഭക്ഷണം കഴിക്കുന്നത് ആമാശയത്തിന് കൂടുതൽ സമ്മർദ്ദമുണ്ടാക്കും. ചെറിയ അളവിൽ പലതവണ ഭക്ഷണം കഴിക്കുന്നത് ചിലർക്കെങ്കിലും ദഹനത്തിന് കൂടുതൽ സൗകര്യപ്രദമായേക്കാം.

ഭക്ഷണം കഴിച്ച ഉടൻ കിടക്കരുത്

ഭക്ഷണത്തിന് ശേഷം ഉടൻ കിടക്കുന്നത് നെഞ്ചെരിച്ചിലും ആസിഡ് റിഫ്ലക്സും ഉണ്ടാകാനുള്ള സാധ്യത വർധിപ്പിക്കും. ഭക്ഷണത്തിന് ശേഷം കുറഞ്ഞത് 2–3 മണിക്കൂർ കഴിഞ്ഞ് മാത്രമേ ഉറങ്ങാൻ പോകാവൂ.

സമ്മർദ്ദം നിയന്ത്രിക്കുക

മാനസിക സമ്മർദ്ദം കുടലിന്റെ പ്രവർത്തനത്തെ നേരിട്ട് ബാധിക്കും. അതിനാൽ സമ്മർദ്ദം കുറയ്ക്കുന്നത് ദഹനാരോഗ്യത്തിനും ഗുണകരമാണ്. മെഡിറ്റേഷൻ, ശ്വസനവ്യായാമം, യോഗ, മതിയായ ഉറക്കം എന്നിവ സമ്മർദം കുറയ്ക്കാൻ സഹായിക്കും.

ജങ്ക് ഫുഡും അമിത എണ്ണയുള്ള ഭക്ഷണവും കുറയ്ക്കുക

അമിത കൊഴുപ്പ്, പഞ്ചസാര, പ്രോസസ്സ് ചെയ്ത ഭക്ഷണങ്ങൾ ദഹനം മന്ദഗതിയിലാക്കുകയും വയറുവീക്കം വർധിപ്പിക്കുകയും ചെയ്യാം.

ഭക്ഷണസമയം ക്രമീകരിക്കുക

ക്രമരഹിതമായ ഭക്ഷണരീതി ദഹനത്തെ ബാധിക്കാം. എല്ലാ ദിവസവും ഏകദേശം ഒരേ സമയത്ത് ഭക്ഷണം കഴിക്കുന്നത് ദഹനസംവിധാനത്തിന് ഒരു സ്ഥിരത നൽകാൻ സഹായിക്കും.