രാവിലെ ഉറക്കമുണർന്ന ഉടൻ കൈ നേരെ പോകുന്നത് ഫോണിലേക്കായിരിക്കും. സമയം നോക്കാനായി ഫോൺ എടുത്ത് തുടങ്ങുന്ന പലരും പിന്നീട് അറിയാതെ തന്നെ വാട്സ്ആപ്പ് സന്ദേശങ്ങളും സോഷ്യൽ മീഡിയയും വാർത്തകളും ഇമെയിലുകളും പരിശോധിക്കും. ഏതാനും മിനിറ്റിനുള്ളിൽ തീർക്കാമെന്ന് കരുതിയ ഫോൺ ഉപയോഗം അരമണിക്കൂറോ അതിലധികമോ നീളുകയും ചെയ്യും

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ഉറക്കത്തിൽ നിന്ന് ഉണർന്ന ഉടൻ തന്നെ ഫോൺ സ്ക്രീനിൽ ശ്രദ്ധ കേന്ദ്രീകരിക്കുന്നത് ദിവസത്തിന്റെ തുടക്കത്തിലെ ശ്രദ്ധയും മാനസികാവസ്ഥയും ബാധിക്കാമെന്ന് വിദഗ്ധർ ചൂണ്ടിക്കാട്ടുന്നു. അതുകൊണ്ട് രാവിലെ എഴുന്നേറ്റതിന് ശേഷമുള്ള ആദ്യ കുറച്ച് സമയം ഫോൺ ഒഴിവാക്കുന്നത് ഒരു നല്ല ശീലമാക്കാം. അതിനായി വലിയ മാറ്റങ്ങളൊന്നും വേണ്ട. ചില ചെറിയ കാര്യങ്ങൾ പതിവാക്കുന്നതിലൂടെ തന്നെ ഫോൺ ഉപയോഗം കുറയ്ക്കാൻ സാധിക്കും.

ഫോൺ കിടക്കയ്ക്ക് സമീപം വയ്ക്കാതിരിക്കുക

രാവിലെ ഫോൺ നോക്കുന്നതിന്റെ പ്രധാന കാരണം അത് കൈയെത്തും ദൂരത്ത് ഇരിക്കുന്നതാണ്. അലാറം ഓഫ് ചെയ്യാൻ ഫോൺ എടുത്താൽ തന്നെ നോട്ടിഫിക്കേഷനുകളും മെസേജുകളും കണ്ണിൽപ്പെടും. അതുകൊണ്ട് ഉറങ്ങാൻ പോകുമ്പോൾ ഫോൺ കിടക്കയിൽനിന്ന് കുറച്ച് അകലെയായി വയ്ക്കുക. അലാറത്തിനായി പ്രത്യേക ക്ലോക്ക് ഉപയോഗിക്കുന്നതും മറ്റൊരു മാർഗമാണ്. അങ്ങനെ ചെയ്താൽ അലാറം ഓഫ് ചെയ്യാനുള്ള ആവശ്യത്തിനായി ഫോൺ കൈയിലെടുക്കേണ്ടി വരില്ല.

സമയപരിധി തീരുമാനിക്കുക

ഒറ്റയടിക്ക് രാവിലെയുള്ള ഫോൺ ഉപയോഗം പൂർണമായും ഒഴിവാക്കുന്നത് ചിലർക്ക് കഠിനമാകാം. ഫോൺ ഉപയോഗിക്കാതിരിക്കാനുള്ള പൊതുവായ ഒരു നിശ്ചിത സമയപരിധി തീരുമാനിക്കാം. ഉറക്കമുണർന്നതിന് ശേഷം ആദ്യത്തെ 30 മിനിറ്റ് ഫോൺ ഉപയോഗിക്കില്ലെന്ന് തീരുമാനിക്കാം. പിന്നീട് ഇത് 45 മിനിറ്റായും ഒരു മണിക്കൂറായും മാറ്റാം. ഈ സമയത്ത് ഫോൺ നോക്കുന്നതിന് പകരം കിടക്കയിൽനിന്ന് എഴുന്നേറ്റ് വെള്ളം കുടിക്കുക, മുഖം കഴുകുക, ചെറിയ വ്യായാമം ചെയ്യുക, കുളിക്കുക, ചെടികൾക്ക് വെള്ളം നൽകുക തുടങ്ങിയ കാര്യങ്ങൾ ചെയ്യാം.

രാവിലെ ചെയ്യാനുള്ള കാര്യങ്ങളുടെ ഒരു ചെറിയ ലിസ്റ്റ് തയ്യാറാക്കുക

രാവിലെ എഴുന്നേറ്റ ഉടൻ ഫോൺ നോക്കാനുള്ള ഒരു കാരണം എന്ത് ചെയ്യണമെന്ന് അറിയാതെ കിടക്കയിൽ തന്നെ സമയം ചെലവഴിക്കുന്നതാണ്. അതുകൊണ്ട് തലേദിവസം രാത്രി തന്നെ രാവിലെ ചെയ്യേണ്ട മൂന്ന് നാല് കാര്യങ്ങൾ ഒരു പേപ്പറിൽ കുറിച്ചുവയ്ക്കാം.

ഫോൺ നോട്ടിഫിക്കേഷനുകൾ നിയന്ത്രിക്കുക

രാവിലെ ഫോൺ നോക്കാനുള്ള വലിയ പ്രേരണകളിലൊന്നാണ് നോട്ടിഫിക്കേഷനുകൾ. രാത്രി ഉറങ്ങിക്കിടക്കുമ്പോൾ വന്ന സന്ദേശങ്ങൾ, സോഷ്യൽ മീഡിയ അപ്ഡേറ്റുകൾ, വാർത്താ അലർട്ടുകൾ തുടങ്ങിയവ രാവിലെ സ്ക്രീനിൽ കാണുമ്പോൾ അവ പരിശോധിക്കാനുള്ള ആഗ്രഹം സ്വാഭാവികമായി ഉണ്ടാകും.

അതുകൊണ്ട് ആവശ്യമില്ലാത്ത ആപ്പുകളുടെ നോട്ടിഫിക്കേഷനുകൾ ഓഫ് ചെയ്യാം. പ്രധാനപ്പെട്ട ഫോൺ കോളുകളും ആവശ്യമായ സന്ദേശങ്ങളും മാത്രം ലഭിക്കുന്ന തരത്തിൽ നോട്ടിഫിക്കേഷനുകൾ ക്രമീകരിക്കാം.

രാവിലെ ഫോൺ എടുക്കാനുള്ള കാരണം മാറ്റുക

'ഫോൺ എടുക്കരുത്' എന്ന് സ്വയം പറയുന്നതിന് പകരം ഫോൺ എടുക്കാനുള്ള ആവശ്യം തന്നെ കുറയ്ക്കുകയാണ് മറ്റൊരു മാർഗം. സമയം അറിയാൻ ക്ലോക്ക് ഉപയോഗിക്കുക. രാവിലെ ചെയ്യേണ്ട കാര്യങ്ങൾ പേപ്പറിൽ എഴുതിവയ്ക്കുക. വ്യായാമത്തിനായി ഫോൺ ഉപയോഗിക്കേണ്ടതില്ലെങ്കിൽ ഒരു സാധാരണ വാച്ച് ഉപയോഗിക്കാം.

ഉണർന്ന ഉടൻ ശരീരത്തെ സജീവമാക്കുക

രാവിലെ എഴുന്നേറ്റ ഉടൻ ചെയ്യുന്ന ആദ്യ പ്രവർത്തനം ഫോൺ സ്ക്രോൾ ചെയ്യുന്നതാണെങ്കിൽ അതേ ശീലം ആവർത്തിക്കാൻ സാധ്യത കൂടുതലാണ്. പകരം എഴുന്നേറ്റ ഉടൻ ജനൽ തുറക്കുക, മുറിയിൽ കുറച്ച് നടക്കുക, വെള്ളം കുടിക്കുക, മുഖം കഴുകുക, ചെറിയ സ്ട്രെച്ചിങ് ചെയ്യുക തുടങ്ങിയ കാര്യങ്ങൾ ചെയ്യാം.

വാരാന്ത്യത്തിലും ഇതേ ശീലം തുടരുക

തിങ്കൾ മുതൽ വെള്ളി വരെ ഫോൺ നിയന്ത്രിച്ചിട്ട് ശനി, ഞായർ ദിവസങ്ങളിൽ രാവിലെ മണിക്കൂറുകളോളം ഫോൺ ഉപയോഗിച്ചാൽ ശീലം മാറ്റാൻ ബുദ്ധിമുട്ടാകും. അതുകൊണ്ട് വാരാന്ത്യങ്ങളിലും ഉണർന്ന ഉടൻ ഫോൺ നോക്കാത്ത ശീലം തുടരാൻ ശ്രമിക്കുക.

രാവിലെ ഫോൺ പൂർണമായും ഒഴിവാക്കുക എന്നത് എല്ലാവർക്കും സാധിക്കണമെന്നില്ല. ജോലിയുമായി ബന്ധപ്പെട്ട സന്ദേശങ്ങൾ പരിശോധിക്കേണ്ടവർക്കും അടിയന്തരമായി ഫോൺ ലഭിക്കേണ്ടവർക്കും വ്യത്യസ്തമായ സാഹചര്യമുണ്ടാകും. അതിനാൽ ഫോൺ ഉപയോഗം പൂർണമായി നിർത്തുന്നതിന് പകരം ആവശ്യത്തിനുള്ള ഉപയോഗവും ശീലത്തിന്റെ ഭാഗമായുള്ള അനാവശ്യ സ്ക്രോളിങ്ങും തമ്മിൽ തിരിച്ചറിയുക എന്നതാണ് പ്രധാന കാര്യം.