കരളിന്റെ പ്രവർത്തനം തകരാറിലാകുന്നത് ശരീരത്തെ പലതരത്തിൽ ബാധിക്കാം. കരൾ രോ​ഗികളിൽ പ്രധാനമായും കണ്ടുവരുന്ന ഒരു ലക്ഷണമാണ് രാത്രിയിലെ ഉറക്കക്കുറവും ഉറക്കം നിലനിര്‍ത്താനുള്ള ബുദ്ധിമുട്ടുകളും. പകൽ സമയത്ത് ഇവർക്ക് അമിതമായ ഉറക്കം അനുഭവപ്പെടുകയും ചെയ്യാം.

കരൾ രോ​ഗങ്ങളുള്ള 60 മുതൽ 80 ശതമാനം രോ​ഗികളിലും ഇൻസോമിയ, ഉറക്കക്കുറവ്, പകൽ ഉറക്കം പോലുള്ള ലക്ഷണങ്ങൾ പ്രകടമാണെന്ന് പല പഠനങ്ങളും ചൂണ്ടിക്കാണിക്കുന്നു. ഇത് തിരിച്ചും സംഭവിക്കാം. അതായത്, അമിതമായി ഉറക്കം നഷ്ടപ്പെടുന്ന അവസ്ഥ കരൾ രോ​ഗങ്ങൾക്കുള്ള സാധ്യത വർധിപ്പിക്കാം.

കരള്‍ രോഗികളില്‍ ഉറക്കം കുറയാനുള്ള ഘടകങ്ങള്‍

ഹെപ്പാറ്റിക് എൻസെഫലോപ്പതി (എച്ച് ഇ): കരളിന്റെ പ്രവർത്തനം തകരാറിലാകുന്നതോടെ വിഷവസ്തുക്കൾ പുറന്തള്ളപ്പെടാതാവുകയും തലച്ചോറിൽ അടിഞ്ഞുകൂടുകയും ചെയ്യുന്നതാണ് ഈ അവസ്ഥ.

മെലറ്റോണിൻ മെറ്റബോളിസം: കരൾ രോ​ഗമുള്ളവർക്ക് ഉറങ്ങാൻ ബുദ്ധിമുട്ട് ഉണ്ടാകാനുള്ള ഒരു പ്രധാന കാരണം, മെലറ്റോണിൻ എന്ന ഹോർമോൺ ആണ്. കരൾ രോ​ഗമുള്ളവരിൽ മെലറ്റോണിന്റെ ഉൽപാദനം വ്യത്യാസപ്പെട്ടിരിക്കാം ഇത് ശരീരത്തിന്റെ സ്ലീപ് സൈക്കിൾ തകരാറിലാകും.

തെർമോൺഗുലേഷൻ മാറ്റങ്ങൾ: കരൾ രോഗികൾക്ക് പലപ്പോഴും ശരീര താപനില ക്രമീകരിക്കുന്നതിൽ ബുദ്ധിമുട്ട് അനുഭവപ്പെടാറുണ്ട്, ഇത് സാധാരണ ഉറക്ക രീതികളെ തടസ്സപ്പെടുത്തും.

ശരീര വീക്കം: കരൾ രോഗവുമായി ബന്ധപ്പെട്ട ശരീര വീക്കം ഉറക്ക-ഉണർവ് ചക്രത്തെ തടസപ്പെടുത്താം.

കരൾ രോഗമുള്ള രോഗികളിൽ ഉറക്ക തകരാറുകൾ പരിശോധിക്കേണ്ടത് പ്രധാനമാണ്.

ഉറക്കക്കുറവിനെ എങ്ങനെ നേരിടാം

• ഉറങ്ങാന്‍ കൃത്യ സമയം പാലിക്കാം

• ഇരുണ്ട മുറിയില്‍ ഉറങ്ങാന്‍ ശ്രമിക്കുക.

• ഉറങ്ങുന്നതിന് കുറഞ്ഞത് അരമണിക്കൂര്‍ മുന്‍പ് മൊബൈല്‍ പോലുള്ള ഇലക്ട്രോണിക് ഉപകരണങ്ങള്‍ മാറ്റിവയ്ക്കുക.

• മാനസിക സമ്മര്‍ദം കുറയ്ക്കുന്നതിനുള്ള ടെക്നിക്കുകള്‍ പരിശീലിക്കുക.

• വൈകുന്നേര സമയങ്ങളില്‍ കാപ്പി, ചായ പോലെ കഫീന്‍ അടങ്ങിയ പാനീയങ്ങളുടെ ഉപയോഗം കുറയ്ക്കുക.

• മദ്യപാനം, പുകവലി എന്നിവ പരിമിതപ്പെടുത്തുക.