കൗമാരക്കാരുടെ സന്തോഷം തല്ലിക്കെടുത്തുന്നതിൽ സോഷ്യൽമീഡിയ വലിയ പങ്ക് വഹിക്കുന്നുണ്ടെന്ന് ലോക സന്തുഷ്ടി റിപ്പോർട്ട്. ലോകത്തെ ഏറ്റവും സന്തുഷ്ട രാജ്യം എന്ന ബഹുമതി തുടർച്ചയായ ഒമ്പതാം തവണയും ഫിൻലാൻഡ് നിലനിർത്തി. സന്തുഷ്ടി സൂചികയിലെ 147 രാജ്യങ്ങളിൽ 116-ാം സ്ഥാനത്താണ് ഇന്ത്യ. കഴിഞ്ഞ വർഷം ഇത് 118-ാം സ്ഥാനമായിരുന്നു.

ചെറുപ്പക്കാരുടെ, പ്രത്യേകിച്ച് 15 വയസ്സിന് താഴെയുള്ള പെൺകുട്ടികളുടെ ജീവിതത്തിൽ സോഷ്യൽമീഡിയ ഉണ്ടാക്കുന്ന ശക്തമായ ആഘാതം റിപ്പോർട്ട് ചൂണ്ടിക്കാണിച്ചു. ദിവസവും അഞ്ച് മണിക്കൂറിൽ കൂടുതൽ സോഷ്യൽമീഡിയയിൽ ചെലവിടുന്ന പെൺകുട്ടികളുടെ ജീവിതം സന്തോഷകരമായിരിക്കില്ലെന്നാണ് റിപ്പോർട്ട്.

അൽ​​ഗൊരിതം ഫീഡുകളിൽ ഇൻഫ്ലുവൻസർമാരും താരതമ്യപ്പെടുത്തൽ പ്രോത്സാഹിപ്പിക്കുന്നതാണ് പ്രധാന കാരണം. അനലിറ്റിക്സ് സ്ഥാപനമായ ​ഗാലപ്പ്, യുഎൻ, സസ്സെയ്നബിൾ ഡിവലപ്മെന്റ് സൊലൂഷൻസ് നെറ്റ് വർക്ക് എന്നിവയുമായി സഹകരിച്ച് ഒക്സഫഡ് സർവകലാശാലയിലെ വെൽബീയിങ് റിസർച്ച് സെന്ററാണ് എല്ലാവർഷവും ലോക സന്തുഷ്ടി റിപ്പോർട്ട് പുറത്തിറക്കുന്നത്.