കോഴിക്കോട്: റവന്യൂ എസ്റ്റാബ്ലിഷ്മെന്റ് വിഭാഗത്തിൽ ചട്ടങ്ങൾ കാറ്റിൽപ്പറത്തി അഞ്ച് ടൈപ്പിസ്റ്റുകൾക്ക് നൽകിയ അനധികൃത കാറ്റഗറി മാറ്റ പ്രമോഷനുകൾ കോഴിക്കോട് ജില്ലാ കളക്ടർ എം.എസ്. മാധവിക്കുട്ടി റദ്ദാക്കി. കേരള അഡ്മിനിസ്ട്രേറ്റീവ് ട്രിബ്യൂണലിന്റെഉത്തരവിനെ തുടർന്നാണ് നടപടി. സ്ഥാനക്കയറ്റം റദ്ദാക്കിയ ജീവനക്കാരെ അവരുടെ പ്രാരംഭ തസ്തികകളിലേക്ക് തരംതാഴ്ത്തിക്കൊണ്ട് കളക്ടർ ഉത്തരവിറക്കി. നിയമവിരുദ്ധ നിയമനങ്ങൾക്കെതിരെ രണ്ടര വർഷത്തോളമായി ശക്തമായ നിയമപോരാട്ടം നടത്തിവന്നലോവർ ഡിവിഷൻ ക്ലർക്ക് റാങ്ക് ലിസ്റ്റിലെ ഉദ്യോഗാർഥികൾക്ക് അനുകൂലമായാണ് ട്രിബ്യൂണലിന്റെ വിധി വന്നത്.

ഈ തിരുത്തൽ നടപടിയോടെ, തെറ്റായ കാറ്റഗറി മാറ്റം വഴി ഉണ്ടായ ഒഴിവുകളിൽ നിയമിക്കപ്പെട്ട മറ്റ് അഞ്ച് ടൈപ്പിസ്റ്റുകളെ പുനർവിന്യസിക്കേണ്ട അവസ്ഥയുമുണ്ടായിട്ടുണ്ട്. ഇതോടെ യഥാർത്ഥ ക്ലർക്ക് ഒഴിവുകൾ വീണ്ടും കേരള പബ്ലിക് സർവീസ് കമ്മീഷന് റിപ്പോർട്ട് ചെയ്യാനുള്ള വഴിയൊരുങ്ങി.

2024-ൽ കോഴിക്കോട് റവന്യൂ എസ്റ്റാബ്ലിഷ്മെന്റിൽ നടന്ന ഗുരുതരമായ ചട്ടലംഘനങ്ങളാണ് വിവാദങ്ങൾക്ക് വഴിവെച്ചത്. നിലവിലുള്ള ചട്ടങ്ങൾ പ്രകാരം ടൈപ്പിസ്റ്റ് തസ്തികയിൽനിന്ന് ക്ലർക്ക് തസ്തികയിലേക്ക് കാറ്റഗറി മാറ്റം ആഗ്രഹിക്കുന്ന ജീവനക്കാർ സർവീസിൽ പ്രവേശിച്ച് ആറ് മാസത്തിനകം ഓപ്ഷൻ നൽകണം. കൂടാതെ, കുറഞ്ഞത് അഞ്ച് വർഷത്തെ സർവീസും പ്രൊബേഷൻ പൂർത്തിയാക്കിയതായുള്ള ഔദ്യോഗിക പ്രഖ്യാപനവും ഉണ്ടെങ്കിൽ മാത്രമേ ഇത്തരം കാറ്റഗറി മാറ്റങ്ങൾ അനുവദിക്കാൻ പാടുള്ളൂ.

എന്നാൽ, മുൻ ഭരണനേതൃത്വത്തിന്റെ കാലത്ത് ഈ അഞ്ച് വർഷത്തെ നിർബന്ധിത സേവന കാലാവധി പൂർണ്ണമായും ഒഴിവാക്കിക്കൊണ്ട്, സർവീസിൽ പ്രവേശിച്ച് വെറും ആറ് മാസം മാത്രമായ അഞ്ച് ടൈപ്പിസ്റ്റുകൾക്ക് എൽഡിസി തസ്തികകളിലേക്ക് നിയമവിരുദ്ധമായി മാറ്റം നൽകുകയായിരുന്നു. ഇതിനുപുറമെ, നിലവിൽ വന്ന എൽഡിസി ഒഴിവുകൾ കൃത്യമായി പിഎസ്‌സിക്ക് റിപ്പോർട്ട് ചെയ്യാതിരുന്ന അധികൃതർ, നിലവിലുണ്ടായിരുന്ന എൽഡിസി റാങ്ക് ലിസ്റ്റിനെ മറികടന്ന് ടൈപ്പിസ്റ്റ് തസ്തികകളിലേക്ക് പുതിയ ആളുകളെ നിയമിക്കുകയാണുണ്ടായത്.

റവന്യൂ വകുപ്പിലെ ഈ ക്രമക്കേടുകൾക്കെതിരെ കോഴിക്കോട് കളക്ടറേറ്റിന് മുന്നിൽ യുവജന സംഘടനകളും ഉദ്യോഗാർഥി കൂട്ടായ്മകളും നിരന്തരം ശക്തമായ പ്രതിഷേധ സമരങ്ങൾ സംഘടിപ്പിച്ചിരുന്നു. കഷ്ടപ്പെട്ട് പഠിച്ച് പിഎസ്‌സി റാങ്ക് ലിസ്റ്റിൽ ഇടംപിടിച്ച ഉദ്യോഗാർഥികളുടെ സർക്കാർ ജോലി സാധ്യതകളെ തകർക്കുന്ന ഇത്തരം നിയമവിരുദ്ധ നടപടികൾ മാധ്യമങ്ങളിലും വലിയ ചർച്ചയായി. തുടർന്ന് ഉദ്യോഗാർഥികൾ നടത്തിയ ദീർഘനാളത്തെ നിയമപോരാട്ടത്തിനൊടുവിലാണ് ഇപ്പോൾ ട്രിബ്യൂണലിന്റെ ഇടപെടലിലൂടെ അനധികൃത സ്ഥാനക്കയറ്റം റദ്ദാക്കപ്പെട്ടതും നീതി നടപ്പിലായതും.