ജയറാമിന്റെ വൈറല്‍ ട്രെന്റാണ് സലാം കാശ്മീരിലെ പാപ്പമാ സീന്‍. സോഷ്യല്‍ മീഡിയ ലാഗ്വേജിലെ സ്ഥിരം കാഴ്ചയാണിന്ന് പാപ്പമാ മീം. ഇതിന് പിന്നാലെ വീണ്ടുമൊരു ട്രെന്റിന് കൂടി തുടക്കം കുറിച്ചിരിക്കുകയാണ് ജയറാം. ആശകള്‍ ആയിരം സിനിമകളുടെ തിയേറ്റര്‍ വിസിറ്റിനിടെയുള്ള ജയറാമിന്റെ വിഡിയോയാണ് വൈറലായി മാറിയത്.

ഇതിന് പിന്നാലെ ഇപ്പോഴിതാ ജയറാമിനെ അനുകരിക്കുന്ന നടി ദിവ്യ പ്രഭയുടെ വിഡിയോയും വൈറലായി മാറിയിരിക്കുകയാണ്. തന്റെ പുതിയ ചിത്രമായ മസ്തിഷ്‌ക മരണത്തിന്റെ തിയേറ്റര്‍ വിസിറ്റിനിടെയാണ് ദിവ്യ പ്രഭ ജയറാമിനെ അനുകരിച്ചത്. അകത്ത് ഷോ നടക്കുമ്പോള്‍ തിയേറ്ററിന്റെ വാതിലില്‍ ചെവി വച്ച് കേള്‍ക്കുകയും തന്റെ പിന്നിലായി നില്‍ക്കുന്നവരോട് ശബ്ദമുണ്ടാക്കരുതെന്ന് ആംഗ്യം കാണിക്കുകയും ചെയ്യുന്ന ദിവ്യയുടെ വിഡിയോ വൈറലാവുകയാണ്.

നേരത്തെ ആശകള്‍ ആയിരം സിനമിയുടെ തിയേറ്റര്‍ വിസിറ്റിനിടെയായിരുന്നു ജയറാമിന്റെ വൈറല്‍ വിഡിയോ സംഭവിക്കുന്നത്. വാതിലില്‍ ചെവി വച്ച് അകത്തെ ശബ്ദം കേള്‍ക്കുകയായിരുന്നു ജയറാം. ഇതിനിടെ വാതില്‍ തുറക്കാന്‍ ശ്രമിച്ച സഹായിയോട് വേണ്ടെന്ന് ആംഗ്യം കാണിക്കുകയുമായിരുന്നു ജയറാം. പിന്നാലെ വിഡിയോ വൈറലാവുകയും നിരവധി പേര്‍ ട്രോളുകളുമായി എത്തുകയും ചെയ്തു.

ഈ രംഗം അതേ പോലെ അനുകരിക്കുകയാണ് ദിവ്യ പ്രഭ. ട്രെന്റിനൊപ്പമുള്ള ദിവ്യയുടെ വിഡിയോയ്ക്ക് ചിലര്‍ കയ്യടിക്കുമ്പോള്‍ ജയറാമിനെ കളിയാക്കിയത് ശരിയല്ലെന്നും പറയുന്നുണ്ട്. അതേസമയം മികച്ച പ്രതികരണങ്ങളാണ് മസ്തിഷ്‌ക മരണം നേടുന്നത്. കൃഷാന്ദ് സംവിധാനം ചെയ്ത സിനിമയില്‍ രജിഷ വിജയന്‍, നിരഞ്ജ് മണിയന്‍പിള്ള, ജഗദീഷ് തുടങ്ങിയ താരങ്ങളും അഭിനയിക്കുന്നുണ്ട്.