'പുലിവാൽ കല്യാണം' ശരിക്കും സലിം കുമാറിന്റെ സിനിമയാണെന്ന് നടൻ ജയസൂര്യ. തന്റെ പുതിയ ചിത്രമായ 'ആട് 3' യുടെ പ്രൊമോഷന്റെ ഭാ​ഗമായി നൽകിയ അഭിമുഖത്തിൽ സംസാരിക്കുകയായിരുന്നു ജയസൂര്യ. പുലിവാൽ കല്യാണത്തിൽ താനായിരുന്നു നായകനെങ്കിലും സലിം കുമാർ അവതരിപ്പിച്ച 'മണവാളൻ' എന്ന കഥാപാത്രമാണ് സ്കോർ ചെയ്തതെന്നും ജയസൂര്യ പറഞ്ഞു.

ഷാഫി സംവിധാനം ചെയ്ത് 2003 ൽ പുറത്തിറങ്ങിയ ചിത്രമാണ് പുലിവാൽ കല്ല്യാണം. ചിത്രത്തിൽ സലിം കുമാർ അവതരിപ്പിച്ച മണവാളൻ എന്ന കഥാപാത്രവും കൊച്ചിൻ ഹനീഫയുടെ ധർമേന്ദ്ര എന്ന കഥാപാത്രവും തമ്മിലുള്ള കോമ്പിനേഷൻ രം​ഗങ്ങളൊക്കെ മലയാളികളെ പൊട്ടിച്ചിരിപ്പിച്ചിരുന്നു.

ജയസൂര്യയ്ക്കൊപ്പം കാവ്യ മാധവൻ, ലാൽ, ഹരിശ്രീ അശോകൻ, സലിം കുമാർ, കൊച്ചിൻ ഹനീഫ, ലാലു അലക്സ്, ജ​ഗതി എന്നിവരാണ് ചിത്രത്തിൽ പ്രധാനകഥാപാത്രങ്ങളായെത്തിയത്. ഉദയകൃഷ്ണ, സിബി കെ തോമസ് എന്നിവർ ചേർന്നാണ് ചിത്രത്തിന്റെ രചന നിർവ്വഹിച്ചിരിക്കുന്നത്. ബോക്സ് ഓഫീസിലും ചിത്രം വിജയമായി മാറിയിരുന്നു.

അതേസമയം മിഥുൻ മാനുവൽ തോമസ് ആണ് ആട് 3 സംവിധാനം ചെയ്യുന്നത്. ഷാജി പാപ്പൻ എന്ന കഥാപാത്രമായാണ് ചിത്രത്തിൽ ജയസൂര്യ എത്തുന്നത്. ഷാജി പാപ്പനെ മലയാളികൾ ഇത്തവണയും ഏറ്റെടുക്കുമെന്നാണ് പ്രതീക്ഷിക്കുന്നതെന്നും ജയസൂര്യ പറഞ്ഞു. എപിക്- ഫാന്റസി ചിത്രമായാണ് ആട് 3 ഒരുങ്ങുന്നത്.