ഒടുവില്‍ ലോകയുടെ കുതിപ്പിന് മുന്നില്‍ എമ്പുരാനും വീണു. മലയാളത്തിലെ ഇന്‍ഡസ്ട്രി ഹിറ്റായി ലോക ചാപ്റ്റര്‍ 1: ചന്ദ്ര. കല്യാണി പ്രിയദര്‍ശന്‍ ചിത്രം മറികടന്നിരിക്കുന്നത് എമ്പുരാന്റെ 268 കോടിയുടെ റെക്കോര്‍ഡിനെയാണ്. അതേസമയം സ്ത്രീ കേന്ദ്രീകൃത കഥ പറഞ്ഞ് സൗത്ത് ഇന്ത്യയില്‍ ഏറ്റവും കൂടുതല്‍ കളക്ഷന്‍ നേടിയ ചിത്രമായി മാറാനും ലോകയ്ക്ക് സാധിച്ചു.

ഈ വര്‍ഷം തന്നെയായിരുന്നു മഞ്ഞുമ്മല്‍ ബോയ്‌സിനെ തകര്‍ത്ത് എമ്പുരാന്‍ ഇന്‍ഡസ്ട്രി ഹിറ്റ് അടിക്കുന്നത്. മാസങ്ങളുടെ വ്യത്യാസത്തില്‍ ലോക എമ്പുരാനെ വീഴ്ത്തിയിരിക്കുകയാണ്. ഇന്ത്യയില്‍ നിന്ന് മാത്രമായി 150 കോടിയാണ് ലോക നേടിത്. കേരളത്തില്‍ നിന്ന് മാത്രമായി 100 കോടിയും നേടി. കേരളത്തില്‍ നിന്ന് മാത്രമായി 100 കോടി നേടുന്ന രണ്ടാമത്തെ ചിത്രമാണ് ലോക. നേരത്തെ ഈ നേട്ടം സ്വന്തമാക്കിയത് തുടരും ആയിരുന്നു.

കല്യാണി പ്രിയദര്‍ശന്‍ സൂപ്പര്‍ ഹീറോയിനായി എത്തുന്ന സിനിമയുടെ സംവിധാനം ഡൊമിനിക് അരുണ്‍ ആണ്. അഞ്ച് സിനിമകളുള്ള സീരിസിലെ ആദ്യ ചിത്രമാണിത്. കല്യാണിയ്‌ക്കൊപ്പം നസ്ലെന്‍, ചന്തു സലിംകുമാര്‍, അരുണ്‍ കുര്യന്‍, സാന്‍ഡി മാസ്റ്റര്‍ തുടങ്ങിയവരും പ്രധാന വേഷങ്ങളിലെത്തിയ സിനിമ കേരളത്തിന് പുറത്തും വലിയ സ്വീകാര്യത നേടിയിരുന്നു.

അതേസമയം ലോകയുടെ അടുത്ത ചാപ്റ്ററില്‍ പ്രധാന വേഷത്തിലെത്തുക ടൊവിനോ തോമസ് ആയിരിക്കുമെന്ന് സംവിധായകന്‍ അറിയിച്ചിരുന്നു. പിന്നാലെയുള്ള ചിത്രത്തില്‍ ദുല്‍ഖര്‍ സല്‍മാന്‍ ആയിരിക്കും നായകന്‍. ഇരുവരും ചന്ദ്രയുടെ കഥയില്‍ അതിഥി വേഷത്തിലെത്തിയിരുന്നു. ഇവര്‍ക്ക് പുറമെ മമ്മൂട്ടി, സണ്ണി വെയ്ന്‍, സൗബിന്‍ ഷാഹിര്‍ തുടങ്ങിയവരും ലോകയില്‍ അതിഥി വേഷത്തിലെത്തിയിരുന്നു.