എന്തുകൊണ്ടാണ് മമ്മൂട്ടിയേയും മോഹന്‍ലാലിനേയും ഇതിഹാസങ്ങളെന്ന് വിളിക്കുന്നതെന്ന് പാര്‍വതി തിരുവോത്ത്. കരിയറിന്‍റെ തുടക്കത്തിലായിരുന്നു പാര്‍വതി മോഹന്‍ലാലിനൊപ്പം ഫ്‌ളാഷ് എന്ന ചിത്രത്തില്‍ അഭിനയിക്കുന്നത്. പിന്നീട് പുഴുവിലൂടെ മമ്മൂട്ടിയ്‌ക്കൊപ്പവും അഭിനയിച്ചു. പിങ്ക് വില്ലയ്ക്ക് നല്‍കിയ അഭിമുഖത്തിലാണ് താരം മനസ് തുറന്നത്.

''ഏറെകാലം മുമ്പാണ് മോഹന്‍ലാലിനൊപ്പം അഭിനയിച്ചത്. എനിക്കന്ന് 19 വയസാണ്. ഇപ്പോള്‍ 38 ആയി. ഏതാണ്ട് 20 വര്‍ഷം മുമ്പായിരുന്നു. അഭിനേതാവ് എന്ന നിലയില്‍ തന്റെ പ്രസന്‍സ് ഓഫ് മൈന്റ് അദ്ദേഹം എപ്പോഴും കാത്തുസൂക്ഷിച്ചിരുന്നു. അത് എന്നെ അത്ഭുതപ്പെടുത്തിയതാമ്. അദ്ദേഹത്തിനൊപ്പം ജഗതി ശ്രീകുമാറും ഉണ്ടായിരുന്നു. എനിക്ക് ഒരു സീന്‍ മാത്രമേ ഉണ്ടായിരുന്നുള്ളൂ'' പാര്‍വതി പറയുന്നു.

''ഒരു നടിയെന്ന നിലയില്‍ ഞാന്‍ എന്താകണമെന്നോ ഈ ക്രാഫ്റ്റ് എന്താണെന്നോ എനിക്ക് അറിയില്ലായിരുന്നു. പലതരത്തിലും ഞാനൊരു കുട്ടിയായിരുന്നു. ഒരു നടിയെന്ന നിലയില്‍ ഭാവിയില്‍ എനിക്ക് ഉണ്ടാകേണ്ട ഗുണം അതാണെന്ന് ഞാന്‍ മനസിലാക്കി. 20 വര്‍ഷങ്ങള്‍ക്ക് ശേഷം അവിടെയെത്തി എന്ന് പറയുന്നതില്‍ എനിക്ക് അഭിമാനമുണ്ട്. എനിക്ക് ഇന്ന് സ്വിച് ഇന്‍ ആകാനും ഔട്ടാകാനും സാധിക്കും. ആ ഇന്റ്യൂഷന്‍സുണ്ട്. എന്റെ കൂടെ അഭിനയിക്കുന്നവരെ സഹായിക്കാനും സാധിക്കുന്നുണ്ട്'' താരം പറയുന്നു.

''സെറ്റിലുള്ളവരെ നോക്കുന്നതില്‍ ഞാന്‍ ശ്രദ്ധിക്കാറുണ്ട്. കാരണം ഈ ഇതിഹാസങ്ങള്‍ സെറ്റില്‍ മെച്ചപ്പെട്ട മനുഷ്യരായി പെരുമാറുന്നതിലൂടെ ഇതിഹാസങ്ങളായി മാറുന്നത് ഞാന്‍ കണ്ടിട്ടുണ്ട്. ബോക്‌സ് ഓഫീസിനെ ഞാന്‍ കാര്യമാക്കുന്നില്ല. കാരണം നിങ്ങളൊരു മോശം മനുഷ്യനാണേല്‍ അതില്‍ കാര്യമില്ല. അതിനാലാണ് ചില താരങ്ങളെ ജനങ്ങള്‍ ഇതിഹാസങ്ങള്‍ എന്നു വിളിക്കുന്നത്. കാരണം അവര്‍ കടന്നു വരുമ്പോള്‍ സെറ്റ് മെച്ചപ്പെട്ട ഇടമാകും'' എന്നും താരം പറയുന്നു.

''മമ്മൂട്ടിയോടൊപ്പവും അങ്ങനെയായിരുന്നു. ഇവര്‍ വരുമ്പോള്‍ സെറ്റ് നിശബ്ദമാകും. അതേസമയം അവര്‍ മുമ്പില്‍ നില്‍ക്കുമ്പോള്‍ ഇതിഹാസങ്ങളാണെന്നത് മറക്കണം. അല്ലാത്തപക്ഷം ഒരുമിച്ച് അഭിനയിക്കാനാകില്ല.

ഉദാഹരണത്തിന്, അവരുടെ കരണത്തടിക്കുന്ന ഒരു രംഗം ഉണ്ടെങ്കില്‍ ഞാന്‍ അവരെ അത്ഭുതത്തോടെ നോക്കി നിന്നാല്‍ എങ്ങനെ അത് സാധിക്കും? ഈ പറയപ്പെടുന്ന ഇതിഹാസങ്ങളും സൂപ്പര്‍താരങ്ങളും തങ്ങളുടെ കലയ്ക്കോ ചെയ്യുന്ന ജോലിക്കോ തടസ്സമായി യാതൊന്നിനെയും അനുവദിക്കാത്തത് ഞാന്‍ ഇഷ്ടപ്പെടുന്നു. ഞാന്‍ ഒരു തുടക്കക്കാരി ആയിരിക്കാം, പക്ഷേ ക്യാമറയ്ക്ക് മുന്നില്‍ ഞങ്ങള്‍ തുല്യരാണ്'' എന്നും താരം പറയുന്നു.