ന്യൂഡല്‍ഹി: കോണ്‍ഗ്രസ് നേതാവും ലോക്‌സഭയിലെ പ്രതിപക്ഷ നേതാവുമായ രാഹുല്‍ ഗാന്ധി വീണ്ടും വിദേശയാത്രയ്‌ക്കൊരുങ്ങുന്നു. ഈ മാസം 16 മുതല്‍ 19 വരെ രാഹുല്‍ അമേരിക്കന്‍ സന്ദര്‍ശനം നടത്തുമെന്നാണ് റിപ്പോര്‍ട്ട്. ന്യൂയോര്‍ക്കിലും ചിക്കാഗോയിലും ഇന്ത്യന്‍ സമൂഹത്തിന്റെയും വിദ്യാര്‍ത്ഥികളുടെയും പരിപാടികളില്‍ രാഹുല്‍ പങ്കെടുക്കും.

അതേസമയം, രാഹുലിന്റെ വിദേശയാത്രയില്‍ വിമര്‍ശനവുമായി ബിജെപി രംഗത്തെത്തി. 'ഇവിടെ വോട്ടുകവര്‍ച്ചയൊന്നുമില്ല, രാഹുലിന്റെ 'കാംചോരി' (ജോലിയില്‍ നിന്നുള്ള ഒളിച്ചോട്ടം) മാത്രമേയുള്ളൂ. അദ്ദേഹത്തിന് രാജ്യത്ത് നില്‍ക്കാന്‍ കഴിയുന്നില്ല. നേതാവ് വിദേശത്തായിരിക്കുമ്പോള്‍ കോണ്‍ഗ്രസ് എങ്ങനെയാണ് വോട്ടുകള്‍ പ്രതീക്ഷിക്കുക?' ബിജെപി വക്താവ് ആര്‍ പി സിങ് പരിഹസിച്ചു.

'കഴിഞ്ഞ തവണ രാഹുല്‍ ഗാന്ധി വിദേശത്ത് പോയപ്പോള്‍ ഇല്‍ഹാന്‍ ഉമറിനെ കണ്ടുവെന്നാണ് ഒരു ദേശീയ മാധ്യമം റിപ്പോര്‍ട്ട് ചെയ്തത്. ഇത്തരത്തിലുള്ള ആളുകളെയാണ് അദ്ദേഹം വിദേശത്ത് പോകുമ്പോള്‍ കണ്ടുമുട്ടുട്ടുന്നതെന്നും ആര്‍ പി സിങ് കൂട്ടിച്ചേര്‍ത്തു. മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ പ്രതിഷേധം ശക്തമായിരിക്കുന്നതിനിടെ രാഹുല്‍ ഗാന്ധി നാലുദിവസത്തെ വിയറ്റ്നാം സന്ദര്‍ശനത്തിന് പോയിരുന്നു. രാഹുലിന്റെ വിദേശയാത്രകളെ ബിജെപി രാഷ്ട്രീയ ആയുധമാക്കാറുണ്ട്.