ന്യൂഡൽഹി: കേന്ദ്ര തെരഞ്ഞെടുപ്പ് കമ്മിഷന്റെ വോട്ടർ പട്ടികയിലെ പ്രത്യേക തീവ്ര പരിഷ്കരണ പ്രക്രിയ ചോദ്യംചെയ്തുള്ള ഹർജികൾ സുപ്രീം കോടതി ഇന്ന് പരിഗണിക്കാനിരിക്കെ, സാമൂഹിക മാധ്യമങ്ങളിൽ അർത്ഥവത്തായ ശിവസ്തുതി പങ്കുവെച്ച് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. മൂന്ന് വെള്ള വരകളും മധ്യത്തിൽ ചുവന്ന തിലകവുമുള്ള ശിവ ചിഹ്നത്തോടൊപ്പം 'സത്യം ശിവം സുന്ദരം' എന്നാണ് രാഹുൽ എക്സിൽ കുറിച്ചത്.

മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനും തെരഞ്ഞെടുപ്പ് കമ്മിഷന്റെ തീരുമാനങ്ങൾക്കുമെതിരെ കോൺഗ്രസ് അധ്യക്ഷൻ മല്ലികാർജുൻ ഖാർഗെ, രാഹുൽ ഗാന്ധി ഉൾപ്പെടെയുള്ള പ്രമുഖ 'ഇന്ത്യ' മുന്നണി നേതാക്കൾ സമർപ്പിച്ച നിർണായക ഹർജികൾ പരമോന്നത കോടതി പരിഗണിക്കുന്നതിന് തൊട്ടുമുമ്പാണ് രാഹുലിന്റെ ഈ ശ്രദ്ധേയമായ പോസ്റ്റ്.

വോട്ടർ പട്ടികയിലെ പ്രത്യേക തീവ്ര പരിഷ്കരണ പ്രക്രിയയുമായി ബന്ധപ്പെട്ട് കേന്ദ്ര തെരഞ്ഞെടുപ്പ് കമ്മിഷനുമായി തുറന്ന പോരാട്ടത്തിലാണ് പ്രതിപക്ഷ പാർട്ടികൾ. വോട്ടർ പട്ടിക പരിഷ്കരണത്തിൽ തെരഞ്ഞെടുപ്പ് കമ്മിഷൻ തങ്ങളുടെ കൂട്ടായ ഭരണഘടനാ അധികാരം ഏകപക്ഷീയമായും അനിയന്ത്രിതമായും ദുരുപയോഗം ചെയ്തുവെന്നാണ് രാഹുൽ ഗാന്ധിയടക്കമുള്ള നേതാക്കൾ സുപ്രീം കോടതിയിൽ സമർപ്പിച്ച ഹർജിയിൽ ചൂണ്ടിക്കാട്ടുന്നത്. മറ്റു തെരഞ്ഞെടുപ്പ് കമ്മിഷണർമാരുടെ അറിവോ അംഗീകാരമോ ഇല്ലാതെയാണോ ചീഫ് ഇലക്ഷൻ കമ്മീഷണർ ഈ സുപ്രധാന തീരുമാനങ്ങൾ എടുത്തതെന്നും ഹർജിയിൽ ചോദ്യം ചെയ്യുന്നുണ്ട്.

അതേസമയം, പ്രതിപക്ഷത്തിന്റെ ആരോപണങ്ങൾ പൂർണ്ണമായി നിഷേധിച്ച് തെരഞ്ഞെടുപ്പ് കമ്മിഷൻ സുപ്രീം കോടതിയിൽ വിശദമായ സത്യവാങ്മൂലം സമർപ്പിച്ചു. വോട്ടർ പട്ടിക പരിഷ്കരണവുമായി ബന്ധപ്പെട്ട മൂന്ന് ഉത്തരവുകളും കമ്മിഷൻ അംഗങ്ങൾ ചേർന്ന് ഏകകണ്ഠമായി എടുത്ത തീരുമാനങ്ങളാണെന്നും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ ഏകപക്ഷീയമായി ഒന്നും ചെയ്തിട്ടില്ലെന്നും കമ്മിഷൻ കോടതിയെ അറിയിച്ചു.

കേവലം ഒരു മാധ്യമ റിപ്പോർട്ടിന്റെ മാത്രം അടിസ്ഥാനത്തിലാണ് വസ്തുതാവിരുദ്ധമായി പ്രതിപക്ഷ നേതാക്കൾ ഇത്തരം ഹർജികളുമായി കോടതിയെ സമീപിച്ചിരിക്കുന്നതെന്നും കമ്മിഷൻ വാദിച്ചു. തെരഞ്ഞെടുപ്പ് പ്രക്രിയയിൽ ഗുരുതര ക്രമക്കേടുകളും വോട്ട് കൊള്ളയും നടക്കുന്നുവെന്ന് ആരോപിച്ച് നേരത്തെ രാഹുൽ ഗാന്ധിയുടെ നേതൃത്വത്തിൽ സുപ്രീം കോടതിയിലേക്ക് പ്രതിഷേധ മാർച്ച് സംഘടിപ്പിക്കുകയും പൗരസമൂഹത്തോട് നീതിക്കായുള്ള പോരാട്ടത്തിൽ പങ്കുചേരാൻ ആഹ്വാനം ചെയ്യുകയും ചെയ്തിരുന്നു. ഇരുവിഭാഗത്തിന്റെയും വാദങ്ങൾ വിശദമായി കേൾക്കുന്ന സുപ്രീം കോടതി ബെഞ്ചിന്റെ ഇന്നത്തെ നിരീക്ഷണങ്ങൾ നിർണായകമാകും.