കൊച്ചി: സോഷ്യൽ മീഡിയയിൽ തന്റെ പേരിലെ അപരനെക്കുറിച്ച് മുന്നറിയിപ്പുമായി മുൻ എം.പി. സെബാസ്റ്റ്യൻ പോൾ. തെരഞ്ഞെടുപ്പിലെന്നപോലെ സോഷ്യൽ മീഡിയയിലും തനിക്കൊരു അപരൻ പ്രത്യക്ഷപ്പെട്ടിരിക്കുന്നുവെന്നും ഈ വ്യാജ പോസ്റ്റ് ഷെയർ ചെയ്യുകയോ ഫോർവേഡ് ചെയ്യുകയോ ചെയ്യരുതെന്ന് ഫേസ്ബുക്ക് വിഡിയോയിൽ അദ്ദേഹം പറഞ്ഞു. 

"കഴിഞ്ഞ വർഷം ഏപ്രിലിലാണ് ഈ കുറിപ്പ് എന്റെ ശ്രദ്ധയിൽപ്പെട്ടത്. അന്ന് അത് നിഷേധിച്ചുകൊണ്ട് ഞാനൊരു കുറിപ്പിട്ടെങ്കിലും വ്യാജപോസ്റ്റ് അതിനേക്കാൾ വേ​ഗത്തിൽ പ്രചരിച്ചു. നരേന്ദ്ര മോദിയെ പുകഴ്ത്തുന്ന ഈ കുറിപ്പ് ഇപ്പോൾ ഇംഗ്ലീഷിലും പ്രചരിക്കുന്നുണ്ട്. ഇം​ഗ്ലീഷ് കുറിപ്പിന് താഴെ സിപിഎമ്മിന്റെ മുൻ എംപി ആണ് സെബാസ്റ്റ്യൻ പോൾ എന്നും ചേർത്തിട്ടുണ്ട്", വിഡിയോയിൽ അദ്ദേഹം വിവരിച്ചു. 

വ്യാജനെ സ്വാഭാവികമായി മരിക്കാൻ വിടുക. ആരും എന്നെ ബി.ജെ.പി. ആക്കേണ്ട. മോദിയെ സ്തുതിക്കണമെന്ന് തോന്നിയാൽ ഞാനത് സ്വന്തംനിലക്കു ചെയ്തുകൊള്ളാമെന്നും കുറിച്ചാണ് അദ്ദേഹം എഫ് ബി പോസ്റ്റ് അവസാനിപ്പിച്ചിരിക്കുന്നത്.