കണ്ണൂര്‍: പ്രസ് ക്ലബ് റോഡിലെ വ്യാപാരി നാസറിന്റെ സ്‌കൂട്ടറില്‍ കയറി കൂടിയ പാമ്പ് പരിഭ്രാന്തി പരത്തി. ഒടുവില്‍ പാമ്പിനെ തിരിച്ചറിഞ്ഞപ്പോള്‍ എല്ലാവരുടെയും ശ്വാസം നേരെ വീണു. ചേര കുഞ്ഞായിരുന്നു സ്‌കൂട്ടറില്‍ കയറിയത്.

ചൊവ്വാഴ്ച രാവിലെ 10 ഓടെയായിരുന്നു സംഭവം. സ്‌കൂട്ടറിന്റെ മുന്‍വശത്ത് എന്തോ അനക്കം കണ്ട് വ്യാപാരി നാസര്‍ വിശദ പരിശോധന നടത്തിയപ്പോഴാണ് പാമ്പാണ് എന്ന് വ്യക്തമായത്. ഓടിക്കൂടിയ ചിലരില്‍ അത് മൂര്‍ഖനാണെന്ന് പറഞ്ഞതോടെ ഭീതിയായി.

എന്നാല്‍ മുന്‍വശത്തെ ബോഡി ഇളക്കി പാമ്പിനെ പുറത്തെത്തിച്ചപ്പോള്‍ കണ്ടത് ഒരു ചേരക്കുഞ്ഞിനെയായിരുന്നു. ഇതോടെ ആശ്വാസത്തിലായ ജനം പാമ്പിനെ തൊട്ടടുത്ത കാട്ടില്‍ തുറന്നുവിട്ടു.