തിരുവനന്തപുരം: പോസ്റ്റർ വിവാദമായതിന് പിന്നാലെ നീക്കം ചെയ്ത് വർക്കല താലൂക്ക് ​ഗവൺമെന്റ് ആശുപത്രി. 'കൊച്ചിയിലെ കാറ്റ് കൊണ്ടാൽ കാറ്റു പോകും, എന്നാൽ തിരുവനന്തപുരം ആഹാ!!!' എന്ന പോസ്റ്ററാണ് വിവാദമായത്.

ശുദ്ധവായു ശ്വസിക്കുന്നത് പ്രോത്സാഹിപ്പിക്കൽ ലക്ഷ്യമിട്ട് ഹോസ്പിറ്റൽ ഇൻഫെക്ഷൻ കൺട്രോൾ കമ്മിറ്റി തയ്യാറാക്കിയ പോസ്റ്ററാണ് വിവാദമായി മാറിയത്. ആശുപത്രിയിൽ എത്തിയവർ പോസ്റ്ററിന്റെ ചിത്രം സാമൂഹിക മാധ്യമങ്ങളിൽ പങ്കുവച്ചതോടെയാണ് രൂക്ഷ വിമർശനമുയർന്നത്.

ഉടൻ തന്നെ അധികൃതർ പോസ്റ്റർ നീക്കം ചെയ്തു. 'പുലിവാൽ കല്യാണം' എന്ന സിനിമയിൽ നടൻ സലിം കുമാർ പറയുന്ന ഡയലോ​ഗ് പോസ്റ്ററിന് ഉപയോ​ഗിക്കുകയായിരുന്നുവെന്നാണ് ആശുപത്രി അധികൃതർ നൽകിയ വിശദീകരണം.